Anih vei lăng kon pơlei dêh char Đắk Lắk athei dôm anih jang tŭn pran tơroi tơbăt, vei kơjăp tôm dôm tơdrong tơm truh kang ƀô̆, bơngai jang kơ teh đak păng bơngai jang, vă vei sơđơ̆ng tơdrong bơ̆jang kiơ̆ ƀlep tơdrong hơgăt. Lơ̆m kơ plăh proh hơmet bơngai jang, tơdăh đei kang ƀô̆ apĭnh pơdơh hưu dăh mă pơdơh kơ jang, dôm anih jang kăl dăr hơlen vă băt hơdăh bơngai, ưh kơ asong ăn pơdơh hăm dôm bơngai jang gơh hơgei, pơm lăp hăm ‘meh vă tơdrong jang.

Hla ar hô sơ athei hơmet pơ ‘lơ̆ng trong jang tơgŭm kăl kơ mă tôm roi tơbăt hơlen lăng kiơ̆ tơdrong hơgăt mă hơdăh, ƀlep hăm dôm trong tơlĕch jang păng hla ar athei đơ̆ng dêh char. Truh khei ‘năr âu, Đắk Lắk đei dang 1.086 kang ƀô̆, bơngai jang kơ teh đak păng bơngai jang apĭnh pơdơh hưu hrôih dăh mă pơdơh kơ jang. Lơ̆m noh 806 ‘nu bơngai pơdơh hưu hơdrol kơ sơnăm gơh pơdơh 280 ‘nu bơngai pơdơh kơ jang. Lơ̆m kơsô̆ âu đei 28 kang ƀô̆ đơ̆ng apŭng tơ̆ kơpal, 198 kang ƀô̆, 131 bơngai jang, 714 kang ƀô̆, bơngai jang kơteh đak tơ̆ xăh păng 22 ‘nu bơngai jang kiơ̆ pơm hla ar pơkăp bơ̆jang.