Tơ̆ lêh tơlĕch jang, Anih pơgơ̆r sut pơđĭ hnam hiăh hiok dêh char Đắk Nông hlôi pơjao kơsô̆ jên 300 triu tơgŭm ăn 5 unh hnam tơ̆ xăh sơlam Thuận An vă man hnam ‘nao kơjăp ‘lơ̆ng. Kŭm hăm tơgŭm jên, dôm khul kơdră tơring, khul linh tơ̆ tơring vang athei bơngai jang năm tơgŭm vă jăh man đang hnam oei ăn dôm unh hnam pơmat tat. 

Kơsô̆ jên đơ̆ng dôm tơdrong jang, tơdrong tơgŭm păng jên tơpôl vang tơgop, đơ̆ng sơnăm 2020 truh dang ei, dêh char Đắk Nông man ‘nao, pơm hơmet ming hlŏh 1.200 tŏ hnam ăn dôm unh hnam pơmat tat. Lơ̆m dêh char dang ei oei đei hlŏh 6.000 tŏ hnam pơm pơgia, hiăh hiok. Lơ̆m noh vă jê̆ 1.800 tŏ hnam đei tôm tơdrong kăl vă tơgŭm hnam oei đơ̆ng dôm tơdrong jang kơ teh đak. ‘Măng mă âu, dêh char Đắk Nông đei 540 unh hnam đei tơgŭm man hnam ‘nao kiơ̆ tơdrong jang Sut pơđĭ hnam hiăh hiok đơ̆ng Thủ tướng teh đak tơlĕch, hăm kơsô̆ jên đơ̆ng Trung ương tơgŭm truh 40 ti hlak jên.