Hăm jơhngâm đon jang tơnăp ‘lơ̆ng đơ̆ng đe thơ̆, hnam ‘nao kơ đe ‘nhŏng Ksor Si (39 sơnăm tơ̆ plei Mái, xăh Ia Hrung, apŭng Ia Grai) đĭ vă đang bơih. Hnam xă vă jê̆ 50m2 hăm lăm tep, 1 lăm tơmoi. ‘Nhŏng Ksor Si tơroi, unh hnam oei gô chang năr jăh et tŏk hnam, vă unh hnam jăh đei anih oei xa sơđơ̆ng ‘lơ̆ng, kon hơ ‘lơ̆p đei anih hŏk pơhrăm: "Hnam so ki kem xăng xa, mua reh tơnăr, hiăh hiok pă gơ̆h bơih. Dang ei đei hnam ‘nao, kon hơ ‘lơ̆p đei anih hŏk pơhrăm. Inh bơnê kơ Đảng, Teh đak hlôi tơgŭm ăn unh hnam nhôn đei anih oei xa sơđơ̆ng ‘lơ̆ng. Đơ̆ng rŏng kơnh đei anih oei xa ‘lơ̆ng bơih, inh vă adrin man dơ̆ng hnam gŏ păng hnam hum."

Tơ̆ apŭng Ia Grai, 542 unh hnam tơnuh, unh hnam bơngai đei kŏng pơmat tat đei tơgŭm man ‘nao, sut pơđĭ hnam hiăh hiok. Jô̆ truh khei 2/2025, lơ̆m dêh char Gia Lai man ‘nao păng pơm hơmet ming 1.423 tŏ hnam, lơ̆m, noh đei 132 tŏ hnam đĭ man đang bơih. Dôm tŏ hnam âu ‘măn ăn unh hnam đei kŏng, unh hnam tơnuh păng unh hnam vă jê̆ tơnuh, vang tơgop pơm hơtŏk tơdrong arih xa ăn lơ kon pơlei pơmat tat. Vă bơ̆ jang ming man trŏ khei ‘năr hơgăt, ‘ngoăih kơ tơlĕch tôm jên jang, dôm tơring hơnơ̆ng krao hơvơn vang tơgop năr jang đơ̆ng tơpôl, khul linh, mong akŏm jên, tơmam lơ̆m tơpôl vă man hnam ‘nao păng pơm hơmet ming hnam so, mă loi jĭ dôm unh hnam găh 2 tơdrong jang tơm kơ teh đak.

Dêh char iŏk đei tơdrong tơgŭm tih đơ̆ng dôm anih tĕch mơdro păng anih jang tơ̆ Trung ương. Anih tơm vei lăng Công an hlôi pơjao 231 ti hlak jên tơgŭm ăn tơdrong jang, lơ̆m noh 201 ti 301 triu hlôi gơih ăn anih mong jên "Yoa bơngai tơnuh" kơ dêh char. ‘Ngoăih kơ ‘nŏh, 1,2 anih tĕch mơdro đei tơdrong jang xa tơ̆ dêh char kŭm vang tơgŭm hăm kơsô̆ jên vă jê̆ 20 ti. Ƀok Lê Ngọc Quý – Kơdră vei lăng kon pơlei apŭng Ia Grai ăn tơbăt: “Hăm đon pơhnŏng chinh trĭ, ‘ngoăih kơ tơgŭm 60 triu hlak jên vă man ‘nao păng 30 triu hlak jên vă pơm hơmet ming, nhôn oei krao hơvơn kon pơlei, tơ ‘ngla hnam, kơtum kơtŏng ‘nhŏng oh vang tơgop, tơgĕch năr jang đơ̆ng đe khul linh păng krao hơvơn tơgŭm bơ̆n tơmam vă man hnam xă ƀiơ̆, man dơ̆ng bơ̆n hnam hum, hơdrong nhŭng, pơm hơtŏk tơdrong arih xa ăn unh hnam kon pơlei”.

Lơ̆m tơdrong jang sut pơđĭ hnam hiăh hiok tơ̆ Gia Lai, khul linh công an păng khul linh ƀô đô̆i jĭ khul jang tơm. Ưh lăp tơgop jơhngâm chơ chuĕn tơmam ming man, ƀŭ, tuh hơmet teh, man không hnam đĕch mă khul linh oei iŏk man, pơm bơbŭng, hơtŏk hrĕnh tơdrong man hnam. 1 kơsô̆ kăn ƀô̆ công an oei tơgop bơ̆n jên khei đơ̆ng kơdih vă tơgŭm ăn unh hnam tơnuh man đei hnam ‘nao. Lơ̆m kơsô̆ âu, thiếu tá Lê Đình Hải - Yŏng Công an xăh Ia Mrơn, apung Ia Pa vang tơgop truh 60 triu hlak jên. Rok kiơ̆ ‘nhŏng, kăn ƀô̆, linh Công an xăh kŭm vang tơgop dơ̆ng 60 triu hlak jên păng tơgĕch jơnăr rơhơi truh tơgŭm ăn mih ma duch nă pơm hnam.

Thiếu tá Lê Đình Hải ăn tơbăt: “Kiơ̆ đơ̆ng chă hơlen năng, ƀôh bơngai yă oei xa hăm 1 ‘nu sâu i păng 2 ‘nu sâu ach, inh ƀôh tơdrong arih kơ đe yă tôch pơmat tat, inh roi tơƀôh ăn Anih chĕp kơ̆l Đảng, Anih vei lăng kon pơlei xăh vă tơgŭm jên man ăn hnam oei. Mă lei bơngai đei măt vă man tơgŭm hnam ‘nŏh jĭ klo yă, oei klo yă ‘nŏh đĭ lôch bơih, kơna tôch pơmat vă gơ̆h iok đei tơdrong tơgŭm. Yoa thoi noh, inh vih tơ̆ hnam pơma nuh hăm hơkăn, đei đe kon vang tơgŭm hai kơna man ăn yă hnam kơjăp ‘lơ̆ng ƀiơ̆ vă gơ̆h đei tơdrong arih xa sơđơ̆ng".

Kiơ̆ trong vă jang, dêh char Gia Lai vă sut pơđĭ 8.485 tơ̆ hnam hiăh hiok lơ̆m sơnăm 2025 kiơ̆ tơdrong jang "Vang tơgŭm man hnam, sut pơđĭ hnam hiăh hiok". Gơnơm đei tơdrong vang jang đơ̆ng rim anih jang chinh trĭ, lăp lơ̆m 2 khei tơjê̆ âu, lơ hnam "5 hlŏh" – pơm hrĕnh hloh, ‘lơ̆ng hlŏh, kơjăp hlŏh, yoa đunh hlŏh păng reh hlŏh – hlôi đei man đang, hơnhăk ba tơdrong chơt hơiă ăn kơhrĕng unh hnam.

Ƀok Rah Lan Chung - Phó Bí thư Đảng dêh char, Kơdră vei lăng kon pơlei dêh char Gia Lai athei: "Tơdrong sut pơđĭ hnam hiăh hiok athei tơlĕch jang mă ‘lơ̆ng, rơđăh rơđong, hơtŏ băl, trŏ ƀlep, kơjăp ‘lơ̆ng păng đei yoa; mong akŏm đei jên, tơmam đơ̆ng dôm anih jang, khul grŭp, anih tĕch mơdro, rim bơngai, tơpôl kon pơlei lơ̆m păng ‘ngoăih kơ dêh char. Atŭm hăm ‘nŏh krao hơvơn kon pơlei vang tơgop vă man đei hnam kơjăp ‘lơ̆ng ƀiơ̆ ăn unh hnam tơnuh. Găh noh dơ̆ng, athei hơnơ̆ng dăr hơlen năng, chih iŏk dôm tơdrong kăl, hơpăh tơmam păng pôk pơ ư dôm khul grŭp, rim bơngai jang rơgei ‘lơ̆ng mưh bơ̆ jang tơdrong ‘nâu."

Hăm tơdrong vang tơgum đơ̆ng rim anih jang chinh trĭ păng khul linh, tơdrong jang sut pơđĭ hnam hiăh hiok tơ̆ Gia Lai tŏk bŏk đei bơ̆jang hrĕnh. Lơ hnam kơjăp ‘lơ̆ng ưh lăp tơgŭm pơm sơđơ̆ng tơdrong arih xa đĕch mă oei pơih trong ‘lơ̆ng vă rim unh hnam tơnuh jang tŏk, tưk tơiung mŭk drăm, vang pơjing tơring tơrang roi đunh roi pơdrŏng, ‘lơ̆ng rŏ.