Hơdrô̆ lơ̆m sơnăm 2025, dêh char hơdrin ăn 2.500 ‘nu năm tơ̆ teh đak đe bơ̆jang, tŏk hloh 1 puăt pơting hăm  sơnăm hơdrol. Vă iŏk đei tơdrong hơgăt tơlĕch ăn, Đắk Lắk hlôi athei Anih pơvih pơvăn tơdrong jang bơ̆jang hơdai hăm dôm anih mơdro sa đei tơdrong jang ăn bơngai năm jang tơ̆ teh đak đe, pơgơ̆r tơroi tơbăt, pơtho tơƀôh tơ̆ dôm pơlei păng kueng kơphô̆ lơ̆m tơring. Hơdai hăm ‘noh, dêh char kŭm tơlĕch jang kĭ pơkăp tơdrong jang hơdai hăm Anih tơm pơgơ̆r Khŭl lĭnh dêh char vă pơgơ̆r pơtho tơƀôh ăn kơ đe lĭnh vă jê̆ brŏk đơ̆ng pơm ƀô̆ đô̆i.

Ƀok Nguyễn Quang Thuân, Phŏ Kơdră vei lăng Anih tơm Nội vụ dêh char Đắk Lắk roi tơbăt, tơring hlôi tơlĕch jang đei yua dôm tơdrong jang tơgŭm bơngai jang hŏk tơdrong jang păng năm jang tơ̆ teh đak đe; mă loi ‘noh jĭ kon pơlei kon kông đei tơgŭm đơ̆ng 12 truh 16 triệu hlak jên ăn kơ 1 ‘nu bơngai jang vă hŏk tơdrong jang, hŏk nơ̆r păng pơm hla ar asong visa:

“ ‘Nâu jĭ bơngai jang tôch kơ tih vă tơgŭm pơm tơdrong hiôk tơchă ăn tơdrong jang ăn kơ đe oh, mă loi ‘noh jĭ bơngai kon kông. Tơdrong ‘nâu nhôn kŭm hlôi pơgơ̆r ăn dôm Anih pơtho pơhrăm tơdrong jang, pơtho pơhrăm hơnơ̆ng lơ̆m dêh char vă đei tơdrong jang hơdai hrơ̆ch. Hrei ‘nâu Anih jang kŭm tŏk bŏk hơnơ̆ng bơ̆jang hăm dôm anih jang joăt jang vă đei tơdrong jang tơgŭm mă lăp lơ̆m tơdrong pơtho pơhrăm tơdrong jang ăn kơ hơdruh tơdăm kon kông kŭm nhen tơchă ăn tơdrong jang ăn kơ bơngai ‘nâu”.