Kiơ̆ hla bơar tơbăt bơ̆ jang hơlen dôm tơdrong kon pơlei pơtruh ăn kơ Kuô̆k hô̆i khei 10 păng 11 sơnăm ou, bơngai tăh hla păng Kon pơlei lơ̆m teh đak hlôi pơma tơbăt jơhngơ̆m đon lui yom kơtang hăm tơdrong chĕp pơgơ̆r đơ̆ng Đảng, trong bơ̆ jang tơplih ‘nao, hơmet ming khul jang chinh trĭ kơtoei, bơ̆ jang gơ̆h hơgei, jơnei hơ iă. Tơdrong hơnơ̆ng tơplih ‘nao, hơmet ming khul jang chinh trĭ ‘noh gĭt kăl hloh kơ tơdrong yan ou, bơngai tăh hla păng Kon pơlei hơmĕng tơdrong jang kiơ̆ trong bơ̆ jang gô pơjing đei jơhngơ̆m pran kơtang ăn tơdrong jang vei lăng, tơ iung pơjing păng atŏk tơ iung teh đak, pơjing hơyak pran kơtang vă iung keh đang đĭ đăng rim trong tơlĕch jang kơ Tơdrong tơchơ̆t Hop akŏm tih kơdră tang măt lơ̆m teh đak ‘măng mă 13 kơ Đảng hlôi tơlĕch ăn. Adoi, bơngai tăh hla păng Kon pơlei ‘meh vă mưh jang kiơ̆ hơmet ming Khul kơdră hơmet ming khul kơdră kơtoei, bơ̆ jang gơ̆h hơgei, jơnei hơ iă, kăl lăng truh tơdrong sơđơ̆ng đei iŏk yua ăn kang ƀô̆, bơngai jang. Tơ̆ hop akŏm, Kơdră chĕp pơgơ̆r Hơnih bơ̆ jang vei lăng teh đak păng Sơđơ̆ng Lê Tấn Tới pơma hơdăh: “Hloh đơ̆ng tơƀơ̆p pơma dơnuh hăm bơngai tăh hla ou ki. Ĭnh tơƀơ̆p pơma dơnuh hăm bơngai tăh hla Long An pơma hơdrô̆, tơring Tơmăn đak kroong Cưủ Long pơma atŭm ‘noh tơdrong kăl hloh ‘noh kon pơlei Long An tôch lăp đon hăm tơdrong pơm kơtoei khul kơdră chĕp pơgơ̆r kiơ̆ Tơdrong tơchơ̆t 18 đei ƀơm truh hăm tơpôl tôch tih tên. Găh lơ kon pơlei lăp đon ngăl”.

Tơ̆ Hop akŏm tơƀơ̆p pơma dơnuh hăm bơngai tăh hla đơ̆ng rŏng hop akŏm ‘măng mă 8, Kuô̆k hô̆i jăl 15, Khul Kơdră tang măt Kuô̆k hô̆i dêh char Dak Lăk hlôi mơ̆ng lơ nơ̆r tơgop kăl, lơ̆m ou, bơngai tăh hla Dak Lăk hlôi pơma tơbăt jơhngơ̆m đon lui yom kơtang, iung jang kiơ̆ kơtang tơchơ̆t 18/NQ-TW găh "Hơnơ̆ng tơplih ‘nao, hơmet pơ ‘lơ̆ng tơdrong bơ̆ jang kơ khul jang chinh trĭ”. ‘Nou tơpă jing trong jang kăl hloh găh pơm kơtoei khul kơdră chĕp pơgơ̆r kơ khul chinh trĭ, đei kang ƀô̆, đang viên, bơngai tăh hla lăng truh. Bơngai tăh hla Vũ Mạnh Khuông, oei tơ̆ phường Thành Công, pơlei tơm Buôn Ma Thuột iung pơma:“ Hơmet pơ ‘lơ̆ng khul kơdră chĕp pơgơ̆r đơ̆ng Trung ương truh tơ̆ tơring tôch trŏ lăp hăm jơhngơ̆m đobn kon pơlei, kang ƀô̆ tơring adoi nhen kon pơlei lui kiơ̆ kơjăp hăm Đảng, Teh đak jang kiơ̆ hơmet pơ ‘lơ̆ng dơ̆ng rim hơnih tơm, hơnih jang Trung ương vă pơm hơtŏk trong bơ̆ jang đơ̆ng Đảng ‘noh jĭ iung jang kơtang jơnei kơjăp. Hơpơi ăn khei năr truh ou kơnh Đảng, Teh đak iung jang kơtang hloh dơ̆ng trŏ lăp hăm jơhngơ̆m đon hơpơi ‘meh vă đơ̆ng kon pơlei”.

Tơ̆ Hop akŏm Hơnih bơ̆ jang Khul kơdră chĕp pơgơ̆r Kuô̆k hô̆i athei jang ‘lơ̆ng hloh dơ̆ng bơ̆ jang pơrô̆ pơrôp. Kơ yuơ tơdrong hơmet ming đei ƀơm truh kon bơngai, ƀơm truh tơdrong đei iŏk yua sa yuơ kơ kon bơngai. Kăl tơdra hơdrol dôm tơdrong rŏ năng đei ƀôh dơ̆ng, tơdrong tơnap tap păng dôm trong jang vă jang kiơ̆ jơnei rim trong tơlĕch jang hơmet ming hơnih bơ̆ jang kơ Khul jang chinh trĭ kơtoei, bơ̆ jang hơgei jơnei kơjăp. Kơ iĕng Kơdră chĕp pơgơ̆r Kuô̆k hô̆i Nguyễn Thị Thanh athei lăng kơjăp trong bơ̆ jang mă trŏ lăp, rơvơn ăn khul kang ƀô̆ lơ̆m hơmet ming, pơm kơtoei ƀiên chê̆, hơmet ming khul kang ƀô̆ chĕp pơgơ̆r, kang ƀô̆ bơ̆ jang, bơngai jang: “Nhôn tơchĕng kăl đei trong bơ̆ jang kơtang hloh pơtêng hăm sơ̆, vă pơtrŭt dôm bơngai pă 2 sơnăm, 3 sơnăm, 4 sơnăm drơ̆ng nơ̆r pơdơ̆h bơ̆ jang ăn khul kang ƀô̆ sơnăm mơlôh, kang ƀô̆ đei hŏk pơhrăm jrŭ tŏk chĕp pơgơ̆r. Tơdăh bơ̆n ưh kơ đei trong tơgŭm djru ‘lơ̆ng hơ iă lei gơ̆t ưh kơ kĕ dôm kang ƀô̆ mă bơ̆n ‘meh vă gơ̆t păng ưh kơ kĕ vă pơjao dôm kang ƀô̆ mă bơ̆n ‘meh vă năm bơ̆ jang rim tơdrong jang anai”.

Iung pơma tơ̆ hop akŏm, Kơdră chĕp pơgơ̆r Kuô̆k hô̆i Trần Thanh Mẫn athei tĕnh koăng jang keh đang rim trong tơlĕch jang, hơmet ming rim khôi luơ̆t ƀơm truh, iung jang tơplih ‘nao, hơmet pơ ‘lơ̆ng khul jang kơtoei, bơ jang gơ̆h hơgei, jơnei kơjăp. Kơdră chĕp pơgơ̆r Kuô̆k hô̆i athei iung jang xek tơlang keh đang hloi tơdrong tơkêng đunh sơnăm; tơƀôh hơdăh dôm hơnih jang kăl iung jang, gơ̆h jang xek tơlang dôm tơdrong tơkêng lơ bơngai; mă kăl hơlen mă brĕ vă xek tơlang trŏ lăp, xek tơlang keh đang đơ̆ng tơring hloi:“Lăng hơlen vă xek tơlang trŏ lăp. Tơdăh đe tơkêng tơpă lei chă krao hơvơn pơma dơnuh, apĭnh hơlen mă brĕ. Trung ương xek tơlang yă kiơ, tơring xek tơlang yă kiơ vă xek tơlang keh đang hloi. Mă lei ‘ngoăih kơ ‘noh kăl hơlen hơdăh khul ayơ tơkêng, tơdăh kơ yuơ đơ̆ng khul kơnê̆ chă pơtrŭt pơdôr ...lei kăl tơlang mă kơhret”.

Jei tơ̆ ‘măng hop akŏm ou, Hơnih bơ̆ jang Khul kơdră chĕp pơgơ̆r Kuô̆k hô̆i hlôi pơdrơ̆ng kiơ̆ Tơdrong tơchơ̆t găh hơmet ming, pơjing hơnih bơ̆ jang apŭng, tơring jăl jang 2023-2025 kơ dêh char Ninh Bình.