Hăm 135 unh hnam, kon pơlei Jeh - Triêng oei tơ̆ thôn Dục Nhầy 1, tơring sơlam Đăk Dục, apŭng Ngọc Hồi, dêh char Kon Tum, noh đe kang ƀô̆, khul linh tơ̆ kơđông linh vei sơlam teh Dục Nông nhen 'nhŏng oh po kơdih lơ̆m unh hnam. Tôm kon pơlei lơ̆m thôn adoi akŏm đon bơnôh 'lơ̆ng hloh ƀơ̆t rim 'măng tơroi truh kang ƀô̆, khul linh vei sơlam teh. 'Nhŏng A Luật, minh bơngai lơ̆m thôn tơroi thoi âu: “Kơđông linh vei sơlam teh tơrĕk truh rim unh hnam tơnap tap. Tơgŭm iŏk rong 'me đe hơ-ioh pơti pơtek. Hơnơ̆ng tơgŭm tơnăp hăm kon pơlei lơ̆m tơring teh  Đăk Dục. Inh ƀôh đe linh vei sơlam teh tơ̆ âu đei đon bơnôh 'lơ̆ng rơhau rơhal”.

Pơmai Xiêng Thị Tuý, Ƀĭ thư Chi ƀô̆, Kơdră Thôn Dục Nhầy 1 ăn tơbăt, 3 sơnăm kơ âu, Jơnŭm pơgơ̆r Kơđông linh vei sơlam teh Dục Nông athei Thiếu tá Dương Văn Lương năm akŏm hăm Chi ƀô̆ thôn. Chĕp vei sơnong jang kơ bơngai linh vei sơlam teh, thiếu tá Dương Văn Lương hlôi tơgŭm ăn Chi ƀô̆ tơlĕch dôm Tơchơ̆t vă pơm tơplih kăp gĭt lơ̆m tơdrong jang pơ-‘lơ̆ng Đảng păng hơtŏk tơdrong hơrih ăn kon pơlei. Chi ƀô̆ thôn Dục Nhầy 1 tơmơ̆t đei 2 đảng viên ‘nao, hơtŏk kơsô̆ đảng viên Chi ƀô̆ truh 19 ‘nu, tơjur kơsô̆ unh hnam hin dơnuh lơ̆m thôn oei pă 6 unh hnam: “Đŏng chĭ vang jang hăt hot, tơgop nơ̆r pơ-‘lơ̆ng Chi ƀô̆, tơgŭm Chi ƀô̆ chih akŏm tơdrong jang păng Tơchơ̆t kơ Chi ƀô̆ păng tơdrong akŏm lơ tơdrong kăp gĭt hloh noh hơvơn đei lơ đảng viên truh akŏm. ‘Nguaih kơ dôm tơdrong jang ‘noh, đŏng chĭ adoi hăt hot chă tơgŭm kon pơlei. Đơ̆ng đei khul linh truh vang jang tơ̆ Chi ƀô̆ thôn noh adoi đei jơnei pơkăp Thôn sơđơ̆ng ‘lơ̆ng pran kơjăp, ưh đei unh hnam pơm glăi khôi lươ̆t bơih”.

Vă kơhret kơjăp hloh tơdrong tơguăt khul linh hăm kon pơlei, pơjing  “anih dơ̆ng lơ̆m kon pơlei” kơjăp sơđơ̆ng, đơ̆ng sơnăm 2020 truh dang ei Anih tơm Pơgơ̆r Khul linh vei lăng sơlam teh dêh char Kon Tum hlôi pơtruh sih kuan, khul linh hơbĕch hơbal tơ̆ dôm Kơđông linh vei sơlam teh truh 13 xah tơring sơlam tơkuh hăm teh đak boăl Lào păng Campuchia. Lơ̆m noh đei 4 kang ƀô̆ Kơđông linh vang jang kơpal tơ̆ 4 apŭng; 13 kan ƀô̆ vang jang kơpal tơ̆ 13 xah sơlam; 17 kang ƀô̆ đei pôk lơ̆m Jơnŭm jang vei lăng kon pơlei tơ̆ dêh char, apŭng, xah...

Trung tá A Ngọc Chiến, Kơđông linh vei sơlam teh Đăk Nhoong đei Anih tơm Pơgơ̆r linh vei sơlam teh dêh char Kon Tum  pơtruh jang Phŏ Ƀĭ thư Anih jang Đảng, jang Kơdră Anih jang hơlen tơring sơlam Đăk Nhoong, apŭng Đăk Glei ăn tơbăt: “Inh hlôi tơgŭm ăn kơ Anih jang Đảng chih akŏm Tơchơ̆t pơgơ̆r Anih jang vei lăng kon pơlei, anih jang Măt trâ̆n Tôh kuôk păng dôm anih jang chĭnh trĭ tơpôl minh đon pơm jang vă sơkơ̆t dơ̆ng tơdrong jang hơtŏk mŭk drăm, mă kăl noh tơdrong sut hŭt lê̆ khôi kơtul chơdư vă pơm ăn kon pơlei kon kông hơtŏk tơ-iung klaih đơ̆ng hin dơnuh kơjăp sơđơ̆ng. Nhốn ơkơ̆t hơdah noh pơtăm ‘long pơm pơgang mă mônh noh sâm Ngọc Linh, mă ƀar noh nhôn gô pơtơm pơtăm pơmâu linh chi vă pơm trong hơtŏk tơ-iung mŭk drăm kăp gĭt hloh”.

Hăm pơkăp “Kơđông noh hnam, sơlam noh pơlei pơla, kon pơlei kon kông noh 'nhŏng oh kơtơh”, khul linh vei sơlam teh dêh char Kon Tum hlôi đei lơ tơdrong jang kăp gĭt, hơdah noh kơhret tơdrong tơguăt khul linh hăm kon pơlei tơ̆ tơring sơlam. Hơdah nhen tơdrong jang “Pơjing thôn Đăk Ga, xah Đăk Nhoong apŭng Đăk Glei phĭ tơtŏ, pran kơtang, sơđơ̆ng ‘lơ̆ng”; dôm tơdrong jang pơyua ăn kon pơlei nhen: hnam kơmăi unh hơyuh iĕ Đăk Giao-Đăk Long; đak sŏ nhă rơgoh Bờ Y, Đăk Long, Đăk Blô; tơdrong jang tơguăt đe ƀô đô̆i hăm unh hnam đei tơdrong hơrih tơnap tap, tơgŭm hơtŏk jang klaih đơ̆ng hin dơnuh; tơgŭm 74 ‘nu mon lơ̆m tơdrong jang “Pôk jơ̆ng oh năm truh hnam trưng”; 15 ‘nu kon rong kơ Anih linh vei sơlam teh... Đơ̆ng tơdrong yak hadoi, tơgŭm đơ̆ng kang ƀô̆, khul linh vei sơlam teh, tơdrong hơrih kon pơlei tơ̆ tơring sơlam teh kơ dêh char Kon Tum roi năr roi hơtŏk tơ-iung hloh, “anih dơ̆ng lơ̆m kon pơlei” roi kơjăp pran kơtang hloh.