Lac urang bangsa Cam, di bhum taneh cuah patih thun lagu di Ninh Thuận, muk Châu Thị Xéo daok di xã Phước Hải, huyện Ninh Phước yam tagok ngak kaya meda meng bruk pala măng tây xanh hu pagap lac “njam patao”. Muk Xéo lac sa dalam 100 urang ngak nong dalam negar anak tal hu pok meyaom, alin brei angan “Urang nong Viet Nam naih gheih thun 2022”. Kadha vak “Urang kumei Cam ngak Yam ndok di Ninh Thuận ma-om hijao mbon cuah meng “njam patao” di Đức Cường angaok harak mbao điện tử Dân Việt

Rilo thun tapa, langiu mon pato bac, gru Nguyễn Nhựt Tân – Sang bac Tiểu học ban sit Phong Điền 1, huyện Phong Điền, ban Cần Thơ nao pablei vé số piah hu jien daong ka rilo anek saih kan kathaot saong mikva sang kan kandah. Hatung hatian di gru hu pambak praong bruk anit ranam tal rilo menuac. Kadha “menuac gheih bruk siam” adit ini, da-a mikva saong taong abih gauk pang kadha vak “Dalikan ka gru pato bac nao pablei vé số daong ka anek saih kan kandah, urang kan kathaot” di Hồng Phương, urang vak di rayo sap ndom VN daok di bhum taneran kraong CL.

Melam 6-8-2022, Jabat cảnh sát pacang khuah padam khuah saong daong duah urang njauk bala, Công an tỉnh Quảng Nam daong hu ka sa kapul anek saih, gru pato di Quảng Nam tuk nao ma-in di craoh gaok hajan khang, ia meng mangaok ceik tuh mai biak khang, nan ye oh tapa hu gah deih piah mai sang. Kadha manuac gheih bruk siam adit ini, khol drei pang kadha vak di Lê Trung hu ba tagok mbao Tuổi Trẻ hu pok mayaom bruk oh huac metai lahik di dom urang lin daong urang njauk bala:

Meng dua palak tangin saoh, meng hu phun jien mesre di Gilang pariak sarak karja gam haong hatai kham merat yam tapa kan kandah, sa-ai Thị Mai, urang bangsa Châu Ro daok di ấp Bình Hòa, xã Xuân Phú, huyện Xuân Lộc, tỉnh Đồng Nai hu yam tabiak truh kan kathaot, grap tanat rai diuk. Oh lac tok cak rok patagok kinh tế ka sang drei, sa-ai daok hu mbaok tame ngak siam bruk ngak di kapul nyaom urang kamei dalam palei. Kadha vak di urang vak Hoàng Liên hu ndom ka urang kamei bangsa Châu Ro kham merat yam tabiak truh kan kathaot.

Bac tamat Đại học Kiến trúc TPHCM min sa-ai Nguyễn Trọng Nghĩa (ndih tapui thun 1984, daok di xã Nam Chính, huyện Đức Linh, tỉnh Bình Thuận) biak takre asar padai, jeng menuac dang akaok di jaik 3.000 sang urang nong pala padai ndiuk hữu cơ pablei tabiak negar langiu, daong ka mikva huyện bhum ceik atah bayah tabiak truh kan kathaot.

Yaom lac umo jiak 80 thun, song lac thương binh di saman mesruh metak, min ong Nguyễn Đình Phùng, daok di ban Tam Kỳ, tỉnh Quảng Nam jeng dok abih drei haong bruk ngak joa kandang, buh jien kadung di drei tabiak piah ngak tatua ka bhap bini nao mai di dom bhum kan kandah palei Quảng. Jiak 30 boh tatua haong yaom jien yaok tỷ đồng, hu ngak salah ba tame pandar, rik dong ka bhap bini dom palei kan kathaot nao mai mbuan lagaih, tani tanat rai duik . Kadha: menuac gheih bruk siam adit ni, daa mik va song tong abih gauk pang dalikan ngak brei pachreih hatai meng dom bruk ngak di thương binh Nguyễn Đình Phùng, tapa kadha vak di Long Phi, urang vak di rayo sap ndom VN daok di bhum kreh negar:

Amuk Dương Thị Kim Dung (daok di Phường 5, Quận 3, TP.HCM) 30 thun ini tuk halei jeng kham merat hu mbaok tame dom bruk ngak pahla, bhian daong ka dom urang gaok kan kandah. Amuk daok hu brei ka rilo sinh viên kathaot mbang, daok oh mek jien luac dom thun bac đại học. Kadha manuac gheih bruk siam adit ini, khol drei pang kadha vak di Hoàng Minh, urang vak di rayo sap ndom VN daok di ban raya HCM hu ndem tal kreih camin urang kumei ini:

Dalikan ndom ka sang ong Đặng Phụng Tâm daok di ấp Khai Hoang Vàm, xã Quách Phẩm, huyện Đầm Dơi, tỉnh Cà Mau alin brei taneh piah padang labik ngak bruk ka ấp hu manuac sia dalam xã iek prong ka hatung hatai siam mekre pamaong tal bruk ngak siam gheih. Kadha“Manuac gheih bruk siam” adit ini khaol dahlak likau khan kadha vak di Quỳnh Anh angaok harak báo Cà Mau ndom ka hatai hadah tanyak di ong Tâm.

Caik dalam hatai caong hu peih ngak dom bruk pahla, puac thun 2021, adei Triệu Gia Hạnh (tal bac 12C4, sang bac THPT Võ Trường Toản, huyện Cẩm Mỹ, tỉnh Đồng Nai) gam song dom ayut sahabat padang kalup kapul halan hatain YOUTH. Hu bruk dong di Kapul dam dara sang bac song dom gru pato , Kalup kapul tuk camereip hu dom bruk ngak hu makna. Kadha: Menuac gheih bruk siam adit ni , Daa mik va song tong abih gauk pang kadha vak di Hải Yến hu ba tagok mangaok mbao Đồng Nai yaih khan ka Triệu Gia Hạnh- sa dalam 11 urang đoàn naih gheih hu Huyện đoàn Cẩm Mỹ pok meyaom dam dara hadah krahngak tui panuac Wa thun 2022.

Dalam baoh sang sit daok di labik 30D jalan Hiệp Thành 23, phường Hiệp Thành, quận 12, TPHCM, hu sa tal bac anit ranam. Di labik nan, oh hu sap hagar brei thau mon tame bac, tok hu sap ê - a di dom anek saih kan kathaot. Ini lac labik pato akhar haroh oh mek jien ka dom uraniah sang kan kandah oh ka thau akhar haroh atau tapa umo thun nao bac. Kadha “menuc gheih bruk siam” adit ini, kol dahlak likau khan kadha vak di Tuấn Dũng mangaok báo Nhân dân hu ndom ka tal bac anit ranam brei ka uranaih kan kathaot di sa-ai Huỳnh Quang Khải.