Pathau mikva saong taong abih gauk! Jit ruak Covid-19 dak harei dak khang, rilo tỉnh, ban gah meraong daok peih ngak Sarak 16 haong dom jalan ngak khang jang. Kayua yau nan ye, dom harei tapa, dom janih kaya nong yau ye baoh kayau, njam patam, baoh kraoh, kaya ikan, ralow menuk ada...rilo labik daok hu biak rilo, min bruk pajeng ba gaok rilo kan kandah, ba tal pataom pambuk kaya pandap, labik labaih, labik kurang. Anak bruk yau nan, brei hu dom jalan ngak siam lagaih, njauk haong bruk di anak meta. Vinh Quang, urang vak di rayo sap ndom VN daok di ban raya HCM hu kadha vak ndom ka bruk ini.

Ginum biai pak hội trường ka bruk buh jien tame ngak Danak dak pakat negar patrun kathaot khang kajap tukvak 2021 – 2025 (hadei di ini iew katut lac Danak dak), dom urang QH jeng njauk hatai haong bruk lac njauk padang Danak dak piah patui jalan patagok dom jak jeng saong pasiam veik dom tavak tavaiy dalam bruk patrun kathaot dalam tukvak tapa. Taphia di nan, daok hu rilo panuac rik daong biak siam, ba tabiak dom jalan ngak piah pamedeih tagok hu hatai caong khin saong ngak jeng pren khang piah ka dom urang kan kathaot caong khin tabiak truh kathaot. Kadha vak di Phan Phương angaok mbao Tin Tức brei thau ka panuac di urang QH Nguyễn Thị Mai Hoa ( kapul Đồng Tháp) ndom ka bruk ini:

Pathau mikva saong taong abih gauk! Dalam tuk kan kandah kayua jit ruak Covid-19, dom pakat công đoàn TPHCM hu yam takai nao sa jalan haong urang ngak meng rilo jalan daong biak siam, lagaih, samar, drah. Kadha vak di Mỹ Trang – urang vak di Rayo sap ndom bhap bini TPHCM brei thau dom bruk ngak biak njauk pok meyaom ini:

Pathau mikva saong taong abih gauk! Ong Nguyễn Thành Phong , urang pan akaok UBND TPHCM brei thau, urak ini jit ruak rah tabiak kan si kuhria mboh dahlau, hu makna meng oh ngak catang bruk pa-atah di gauk di dom rahra. Hu dom labik daok rah tabiak bruk taom gaok, ndom biai nao mai haong gauk, rilo menuac daok tabiak jalan yaom lac ban raya daok peih bruk brei daok pa-atah di gauk tui Sarak 16. Yau nan, rahra daok dalam dom labik pacang veik, njauk ngak saong oh brei ngak hagait piah oh ngak suan bruk pacang caga jit, ba tal njauk taong phạt jien, atau mek caik guk, da-a mikva saong taong abih gauk duah thau tapa kadha vak hadei ini:

Gam haong dom tỉnh, ban karei dalam negar, dom pakat, dom gah di tỉnh An Giang daok peih ngak rilo bruk samar drah, khang hatai pacang caga jit Covid-19 hu siam lagaih. Meng bruk “Pacang jit yau pacang khamang”, taphia dom kham merat di karja, daok hu bruk ba tangin tame di UBMT negar Việt Nam, Kapul nyaom dom pakat haong dom urang halan hatian, rik daong pakhang hatai jia, daong ka rahra sahanag hatai pa-atah di gauk, jhul kadun likuk jit ruak. Kadha vak di Phan Ánh, urang vak di rayo sap ndom VN daok di bhum taneran kraong Cuu Long:

Piah samar pasang iek, pacang veik, duah labik pambak ruak, khang hatai patrun patakik njom mbak di jit Covid-19 dalam bhap bini, rilo doanh nghiệp di tỉnh Ninh Thuận hu padang jalan ngak song peih bruk ngak dalam tuk pacang caga jit. Daa mik va song tong abih gauk duah thau tapa kadha vak di Anh Tuấn – Hà Anh angaok mbao Ninh Thuận:

Pathau mik va…: Jit ruak Covid-19 dok rah tabiak khang, rilo tỉnh ban, njauk brei paatah di gauk, bruk pablei salih nao mai brei patakik veik ngak ka bruk pablei kaya ikan di Bình Thuận gaok rilo kan kandah. Dom labik blei kaya ikan dalam tỉnh dok having akaok bayar jien ka labik khik piah pandap liar, dalam tuk nan jit ruak ka oh thau tuk halei meng hu pasang iek . Kadha vak di Đoàn Sĩ – urang vak di rayo sap ndom VN dok di ban raya HCM hu ndom ka bruk ni:

Ban raya HCM dok peih bruk brei F1 daok karei di sang di tong abih dom quận huyện dalam ban raya, piah patrun naong trak ka dom labik brei dok karei. Rilo urang tong yaom, ini jeng lac bruk XHH dalam pacang caga jit Covid-19. Kadha vak di Kim Dung – urang vak di rayo sap ndom VN dok di ban raya HCM:

Saman mesruh, dom urang dahlau daih ngak bol lin hu rik daong prein yava, ralow darah piah peih paha taneh ia. Saman sron mbon, dom urang nan jeng daok sahneng lac ngak habar piah hu rik prein padang palei negar. Tui jalan sahneng yau nan, dom anai, dom cei dahlau daih ngak bol lin di palei Tấn Ngọc Đông (xã Ngọc Chánh huyện Đầm Dơi, t.Cà Mau) ba gauk nao ngak pasiam dom jalan palei. Dom bruk ngak hu makna, hu rahra anit ranam, hu karja pok meyaom hu khan brei thau dalam kadha vak di Trần Hiếu, urang vak di rayo sap ndom VN daok di bhum taneran kraong CL.

Dom harei tapa, rilo urang pablei salih di bal raya HCM biak bui sambai tuk taduan mek hu jien daong meng pok jien 886 tỷ đồng di bal raya. Nruk njauk biai nan lac, jaik abih dom urang ini oh cang ngak harak gar hagait piah likau pasang iek, daong brei. Kadha vak di Minh Thắm – urang vak di rayo sap ndom VN daok di bal raya HCM.