1.     Klei kƀĭn phung bi ala kluôm Đảng tal 13 tŭ jing jăk siam

Khua gĭt gai Đảng Nguyễn Phú Trọng mñă klă: “Klei kƀĭn phung bi ala kluôm Đảng tal 13 tŭ jing jăk siam”. Klei kƀĭn mdưm leh 6 bruă klam kñăm leh anăn 3 hdră êlan êdah kdlưn, bi klă hdră tă, bruă kñăm, bruă klam hlăm 5 thŭn kơ anăp, anăn jing truh thŭn 2025, Việt Nam jing ala čar hlăk đĭ kyar, mâo bruă tuh tia hluê êlan mrâo mrang, dưi êgao hnơ̆ng prăk ba wĭt kah knar ƀiă, ba mdah hdră tă truh thŭn 2030, bi hdơr 100 thŭn mkŏ mjing Đảng, ala čar drei jing ala čar hlăk đĭ kyar, mâo bruă tuh tia mrâo mrang, ênoh prăk ba wĭt kah knar lu leh anăn tă hdră truh thŭn 2045, bi hdơr 100 mkŏ mjing ala čar, Việt Nam jing ala čar đĭ kyar, mâo ênoh prăk ba wĭt lu.

            Klei kƀĭn kluôm Đảng tal 13 mñă klă: “Ala čar dưi mâo dŭm boh tŭ dưn prŏng, yuôm bhăn hlăm hbuê ênuk, đĭ kyar ktang, kluôm ênŭm mkă qhŏng dŭm thŭn ka mâo klei mlih mrâo, ala čar drei ka tuôm mâo ôh klei jing, klei găl, kơhưm msĕ hŏng ară anei”.

2. Hdră ruah phung bi ala bruă kƀĭn ala gưl XV lehanăn phung bi ala Êpul gơ̆ng bruă ƀuôn sang dŭm gưl wưng thŭn 2021 – 2026 tŭ jing hlăm wưng dôk bluh mâo klei ruă tưp.

Hruê 23/5/2021, giăm 70 êklăk čô mnuih nao mplĕ hră (mâo 99,6% ênoh mnuih nao ruah) čiăng ruah phung bi ala bruă kƀĭn ala gưl XV lehanăn phung bi ala Êpul gơ̆ng bruă ƀuôn sang dŭm gưl wưng thŭn 2021 – 2026, lu hĭn kơ ênoh lehanăn đĭ kơ hnơ̆ng mkă hŏng wưng ruah khua êlâo anăn.

Hdră ruah khua dưi mkŏ mjing hŏng klei ngă phŭn mil pô, djŏ hdră bhiăn, mtăp mđơr, rơ̆ng klei êđăp ênang, mkiểt mkriêm lehanăn klă sĭt jing sa Hruê m’ak prŏng kơ jih jang mnuih ƀuôn sang. Hdră ruah khua mâo leh lu gru kruăk jăk siam “Gưl tal êlâo” msĕ si: Dưi mkŏ mjing hdră ruah khua tŭ jing, êđăp ênang hlăm wưng klei ruă Covid 19 bluh mâo; gưl tal êlâo hlăm hƀuê ênuk 76 thŭn mơ̆ng Anôk bruă kƀĭn ala mâo dua čô bi ala mơ̆ng mnuih djuê ana ƀiă hĭn êdi mnuih jing djuê ana Lự lehanăn Brâu nao hgŭm hlăm Anôk bruă kƀĭn ala./.

3.Mtrŭt mđĭ bruă hŏng tač êngao, mđĭ hĭn kơhưm ala čar.

Thŭn 2021, khădah klei ruă tưp Covid-19 ăt dôk dleh dưi ksiêm dlăng hlăm tar rŏng lăn, ƀiădah bruă hŏng tač êngao lu tĭng leh anăn 2 tĭng mơ̆ng Việt Nam ăt dưi ngă nanao. Êdah hĭn klei bruă Khua gĭt gai Đảng Nguyễn Phú Trọng mâo klei blŭ hrăm hŏng khua gĭt gai dŭm ala čar, drông lu êpul phung tuê dlông rŏng lăn, Khua lăn čar Nguyễn Xuân Phúc nao čuă ala čar Russia, Cuba, Campuchia, Khua knŭk kna Phạm Minh Chính nao čuă ala čar Japon, nao hgŭm hlăm klei kƀĭn trông gưl dlông ASEAN tal 38, 39  leh anăn dŭm klei kƀĭn trông gưl dlông djŏ tuôm, nao hgŭm hlăm klei kƀĭn tal 26 dŭm tĭng nao hgŭm hlăm klei kuôl kă mbĭt mơ̆ng Êpul hgŭm lu ala čar kơ klei mlih yan adiê (COP26) leh anăn mâo klei bi tuôm hŏng khua gĭt gai dŭm ala čar, nao čuă leh anăn mă bruă ti ala čar Angle, klă klơ̆ng nao čuă ala čar Prăng. Khua bruă kƀĭn ala Vương Đình Huệ nao čuă Ơrôp, Dhŭng Korea, India…

Thŭn 2021, Klei kƀĭn trông bruă hŏng tač êngao kluôm ala tui ngă hdră mtrŭn mơ̆ng klei kƀĭn kluôm Đảng tal 13 jing klei kƀĭn trông tal êlâo mơ̆ng phung bruă kđi čar, êpul khua bruă Đảng klă anăp gĭt gai mkŏ mjing, bi trông kơ bruă hŏng tač êngao mơ̆ng Đảng, bruă hŏng tač êngao knŭk kna, bruă hŏng tač êngao mnuih ƀuôn sang leh anăn wăt kơ bruă kđi čar.

Hlăm thŭn 2021, Việt Nam lŏ dơ̆ng klam lu mta bruă yuôm bhăn hlăm tar rŏng lăn, jing khua kiă kriê djŏ tuôr mlan 4 leh anăn khua kiă kriê djŏ tuôr mơ̆ng Êpul gơ̆ng bruă răng mgang klei êđăp ênang mơ̆ng Êpul hgŭm lu ala čar, djŏ ruah jing sa hlăm êpul gơ̆ng mkŏ mjing klei mtô mjuăt bi hriăm, klei kreh knhâo leh anăn dhar kreh Êpul hgŭm lu ala čar (UNESCO). Việt Nam mâo leh klei čŏng ngă bruă leh anăn hur har nao hgŭm hlăm dŭm bruă mbĭt mơ̆ng dŭm êpul êya tar rŏng lăn, đru mguôp klă klơ̆ng hlăm klei bi trông, tui duah hdră êlan kơ dŭm boh klei mâo klei uêñ mĭn mbĭt hlăm tar rŏng lăn, mâo dŭm ala čar mkăn yap yuôm bhăn, bi êdah kơhưm ala čar Việt Nam ƀrư̆ hruê ƀrư̆ đĭ hlăm rŏng lăn.

4. Klei bi kƀĭn bruă Dhar kreh kluôm ala lŏ krŭ wĭt klei čang hmăng djuê ana, mđĭ lar boh tŭ yuôm dhar kreh, ai ktang mơ̆ng anak mnuih Việt Nam.

Leh 75 thŭn, lŏ čuê dŭm klei jăk siam mâo tui ksiêm hriăm mơ̆ng 2 Klei bi kƀĭn bruă Dhar kreh kluôm ala thŭn 1946, 1948; Klei bi kƀĭn bruă Dhar kreh kluôm ala thŭn 2021 dưi čang hmăng srăng lŏ čuê bruă “Dhar kreh atăt êlan kơ ƀuôn sang hlăm kluôm ala êbat nao”, mdưm bruă dhar kreh bi knar hng bruă kđi čar, bruă duh mkra, ala ƀuôn. Klei bi kƀĭn bruă Dhar kreh kluôm ala jng tur knơ̆ng ba ala čar anei pŏk sa wưng đĭ kyar mrâo, hŏng klei mĭn čŏng pô gĭr ktưn, ngă phŭn mil pô mơ̆ng mnuih ƀuôn sang drei, mơ̆ng anăn ba mdah dŭm hdră msir mđĭ kyar bruă dhar kreh Việt Nam đĭ kyar, jiă knhuah djuê ana hlăm hdră mkŏ mkra lehanăn mđĭ kyar lăn čar.

Blŭ hrăm gĭt gai ti anôk bi kƀĭn, Khua gĭt gai Đảng Nguyễn Phú Trọng čang hmăng, hdră bruă dhar kreh srăng mâo dŭm knhuang nao mlih mrâo, đĭ kyar hĭn, kjăp ktang hĭn, tŭ dưn hĭn, čih sa gru kruăk mrâo ti ktuê êlan lŏ mđĭ kyar bruă dhar kreh Việt Nam hlăm ênuk gưl mrâo./.

5. Klei ruă tưp Covid-19 ngă truh klei hmăi kjham. Việt Nam ngă bruă tlŏ mgang prŏng hĭn hlăm hbuê ênuk.

Gưl bluh đĭ klei ruă tưp Covid-19 tal 4, lu hĭn jing kman mlih mrâo Delta mơ̆ng kman SARS-CoV-2, bluh đĭ leh anăn tưp lar hŏng klei hmar, ngă truh lu klei hmăi kjham hlăm klei hdĭp mnuih ƀuôn sang leh anăn bruă duh mkra hlăm dŭm čar, ƀuôn prŏng hlăm ala čar, boh nik jing ƀuôn prŏng Hồ Chí Minh leh anăn dŭm čar krĭng dhŭng. Giăm 30.000 čô mnuih djiê, 346.000 êklai prăk luič liê hlăm bruă duh mkra jing dŭm klei hmăi kjam mơ̆ng klei ruă tưp Covid-19 ngă kơ ala čar drei. Ƀiădah kyua mâo dŭm hdră êlan ktang phĭt, gĭr jih ai, klei ruă tưp Covid-19 ăt dôk leh dưi ksiêm dlăng ƀiădah dưi ƀiă leh.

Knŭk kna bi klă mkŏ mjing keh prăk vaccine gang mkhư̆ klei ruă tưp Covid-19, sa klei tlŏ mgang prŏng hĭn hlăm hƀuê ênuk ti Việt Nam mâo Khua knŭk kna Phạm Minh Chính mtrŭt mjhar. Mbĭt hŏng anăn jing hdră êlan “vaccine hŏng tač êngao” dưi mkŏ mjing hmar, Việt Nam dưi tŭ mă giăm 170 êklăk hnơ̆ng vaccine gang mkhư̆ klei ruă tưp Covid-19. Mjưh ruê̆ thŭn 2021, Việt Nam dưi bi leh bruă tlŏ mgang ênŭm 2 aruăt kơ mnuih ƀuôn sang mơ̆ng 18 thŭn kơ dlông, bi leh bruă tlŏ mgang aruăt tal 1 kơ mnuih mơ̆ng 12 -18 thŭn.

Kjăp hŏng bruă kñăm “Mdưm klei suaih pral, klei hdĭp anak mnuih jing kdlưn hĭn, tal êlâo hĭn”, ti gŭ klei gĭt gai mơ̆ng Đảng gưl dlông, knŭk kna, Khua knŭk kna, bruă gang mkhư̆ klei ruă tưp mâo dŭm hdră êlan mlih mrâo djŏ guôp hŏng boh sĭt klei ruă tưp Covid-19 mơ̆ng “Zero Covid” jing “Hdĭp êđăp ênang, hŏng klei mbruă, ksiêm dlăng tŭ dưn klei ruă tưp Covid-19 ”, gang mkhư̆ klei ruă tưp, krŭ wĭt leh anăn mđĭ kyar bruă duh mkra ala ƀuôn hluê si hdră mtrŭn 86 leh anăn hdră mtrŭn 128 mơ̆ng knŭk kna. Lu hdră êlan bi hơĭt klei hdĭp hŏng ênoh prăk brei čan truh kơ dŭm pluh êklai prăk dưi mkŏ mjing, đru kơ mnuih mă bruă, phung awăt êdu, mnuih ƀuôn sang anôk mâo klei ruă tưp găn jih klei dleh dlan dlan hlăm klei hdĭp.

6. Hgao klei ruă tưp Covid 19, GDP ăt đĭ kyar pral. Lu klei bi êdah jăk, mjing klei găl lŏ krŭ wĭt bruă duh mkra hlăm thŭn ti anăp

Khădah klei ruă Covid 19 ba lu klei truh amâo jăk ƀiădah hŏng klei gĭt gai mơ̆ng Knŭk kna, klei sa ai, klei gĭr mơ̆ng dŭm gưl, dhar bruă, dŭm alŭ wăl lehanăn mnuih ƀuôn sang, đăo knăl GDP mơ̆ng ala čar drei thŭn 2021 ăt đĭ kyar, hnơ̆ng hrui wĭt ngăn prăk kơ knŭk kna thŭn 2021 ăt rơ̆ng kjăp lehanăn đĭ mkă hŏng wưng anei thŭn 2020; ênoh prăk bi mnia mblei hlăm bruă ba čhĭ mnơ̆ng dhơ̆ng kơ ala tač êngao êbeh 600 êklai USD. Anôk bruă duh mkra Việt Nam ăt ba yua jăk găl dŭm klei kuôl kă bruă mnia mblei êngiê, boh nik dŭm klei kuôl kă ênuk mrâo, đru bi lu jơr wăl anôk mnia mblei, đru pŏk mlar anôk ba čhĭ mnơ̆ng dhơ̆ng mâo klei găl kơ ala tač êngao, kñăm ba wĭt boh tŭ dưn hĭn. Thŭn 2021 ăt kruăk knăl klei đĭ kyar êdah êdi mơ̆ng anôk bruă mnia mblei điện tử lehanăn bruă duh mkra mrô.

Čiăng dưi mâo mta kñăm đĭ kyar, hlăm thŭn 2021, Việt Nam ba yua leh mđrăm mbĭt dŭm hdră mtrŭn bruă ngăn prăk lehanăn prăk kăk ăt msĕ mơh dŭm hdră mtrŭn djŏ tuôm mkăn. Anôk bruă kƀĭn ala ăt ba mdah lu Hdră mtrŭn bruă ngăn prăk, duh bi liê knŭk kna, lŏ mkŏ dăp hdră duh mkra. Knŭk kna čih mkra leh hdră kčah kluôm kñăm mđĭ kyar bruă duh mkra – ala ƀuôn hluê hdră êlan hdĭp êđăp ênang, čih mkra hdră êlan phŭn hlăm bruă gang mkhư̆, mdrơ̆ng hŏng klei ruă Covid 19./.

7. Bruă mkŏ mjing, ƀuah mkra hlăm Đảng dưi mtrŭt mđĭ kluôm ênŭm, klei klei mlih mrâo. Gang mkhư̆ klei ƀơ̆ng ngăn, klei amâo jăk amâo mâo mdei.

Klei kƀĭn trông gưl dlông 4 gưl 13 ba mdah klei bi klă mrô 21-KL/TW hlăm anăn bi mguôp bruă mkŏ mjing, ƀuah mkra hlăm Đảng mbĭt hŏng mkŏ mjing bruă kđi čar, bi mbŏ thiăm dŭm klei bi êdah klei toh hroh hlăm klei mĭn bruă kđi čar, klei hdĭp, knhuah hdĭp. Phŭn bruă kđi čar tŭ ư lŏ bi mbŏ thiăm mta phŭn “Klei amâo jăk”, bi kluôm ênŭm êpul khua gĭt gai gưl dlông kơ bruă gang mkhư̆ klei ƀơ̆ng ngăn jing êpul khua gĭt gai gưl dlông kơ bruă gang mkhư̆ klei ƀơ̆ng ngăn, klei amâo jăk, mbĭt anăn bi kluôm ênŭm êpul gĭt gai.

Êpul khua bruă Đảng gưl dlông, phŭn bruă kđi čar ba mdah leh 3 hră mơar yuôm bhăn djŏ tuôm hŏng bruă mkŏ mjing, ƀuah mkra hlăm Đảng hŏng lu mta êdeh kdlưn. Anăn jing: Klei bi klă mrô 14 mơ̆ng phŭn bruă kđi čar kơ hdrăm mtrŭt mjhar leh anăn rang mgang phung knuă druh hur har, thâo mbruă kyua klei jăk mbĭt. Klei bi klă mrô 37 mơ̆ng êpul khua bruă Đảng gưl dlông kơ dŭm mta sa čô Đảng viên amâo dưi ngă, klei bi klă mrô 41 mơ̆ng phŭn bruă kđi čar kơ klei ƀuh mkra, brei mdei bruă hŏng phung knuă druh.

Bruă gang mkhư̆ klei ƀơ̆ng ngăn, klei amâo jăk lŏ dưi gĭt gai leh anăn tui ngă ktang phĭt, amâo mâo klei mdei msăn. Dhar bruă ksiêm dlăng gưl dlông knăm leh kơ bruă ksiêm dlăng, ƀuh mkra leh anăn hưn mda, brei ngă klei ƀuah mkra 12 êpul êya bruă Đảng leh anăn 20 čô Đảng viên hlăm phŭn bruă kđi čar, êpul khua bruă Đảng djŏ tuôm hŏng dŭm klei ngă soh, dŭm mta bruă dôk mâo klei ksiêm dlăng mơ̆ng êpul ksiêm dlăng (Hlăm anăn mâo 2 čô khua êmua, khua bruă Đảng gưl dlông, 1 čô bruă sang čư êa čar, 1 čôk hua bruă Đảng čar, 13 čô khua kahan hlăm lĭng kahan.

8. Kčŭt hưn, ba phat mkra klă mngač lu klei ngă soh prŏng, kjham, dleh dưi ksiêm dlăng.

Khădah hmăi prŏng mơ̆ng klei ruă Covid 19, ƀiădah dŭm boh klei mâo hlăm hdră duh mkra, klei ƀơ̆ng ngăn mâo nanao dŭm gưl dhar bruă msir mghaih djŏ hdră bhiăn, ba phat mkra hŏng phung ngă soh, djă akŏ, mčhua hŏng klei dưi, bruă klam čiăng tlĕ mă ngăn drăp mơ̆ng Knŭk kna. Thŭn 2021, anôk bruă kriê dlăng hdră bhiăn kčŭ hưn, ba phat mkra klă mngač lu klei ngă soh prŏng, kjham, dleh dưi ksiêm dlăng, msĕ si: Dŭm boh klei mâo djŏ tuôm hlăm bruă mdrao mgŭn; boh klei mâo ti dŭm êpul êya bruă hlăm Knơ̆ng gĭt gai kahan ksiêm êa ksĭ, Lĭng kahan răng mgang knông lăn, dŭm boh klei ngă soh hŏng klei kčah mtrŭn bruă kriê dlăng lăn ala; kriê dlăng ba yua ngăn drăp knŭk kna mâo ti Bình Dương, Khánh Hòa, ƀuôn prŏng Hồ Chí Minh...

Mčhua hŏng klei dôk čiăng mjêč kơ kdrăp ksiêm mkă dlăng kman ti dŭm alŭ wăl hlăm kluôm ala, Anôk bruă Việt Á mâo leh klei bi êdah bi hgŭm hŏng dŭm êpul, mnuih djŏ tuôm, ngă soh hŏng klei kčah mtrŭn hlăm bruă mkra mjing, čhĭ kdrăp ksiêm dlăng kman klei ruă Covid 19 kñăm ba wĭt klei tŭ dưn kơ pô. Ksiêm dlăng tal êlâo, Anôk bruă mguôp hnư mkra kdrăp mrâo Việt Á mkăp leh dŭm kdrăp ksiêm dlăng kman kơ 62 čar, ƀuôn prŏng, hrui mâo giăm 4.000 êklai prăk. Anôk bruă ksiêm dlăng dôk tui ksiêm, kčŭt hưn boh klei, tui duah phung ngă soh ba bi mklă, phat mkra; khă snăn, boh klei anei ăt dôk mâo lu klei êmuh kơ klei đua klam mơ̆ng dŭm gưl, dhar bruă djŏ tuôm hlăm hdră ksiêm dlăng, msir mghaih klei ngă soh hlăm bruă gang mkhư̆, mdrơ̆ng hŏng klei ruă Covid 19./.

9. Êlan êdeh treng wăl ƀuôn prŏng Cát Linh – Hà Đông klă klơ̆ng dưi ba yua leh lu blư̆ mâo klei kpăk. Lu klei hriăm yuôm bhăn dưi mâo hlăm bruă mkŏ mkra 10 thŭn anei.

Leh mâo 10 thŭn, 4 blư̆ mâo klei kpăk, hruê 5/11/2021, êlan êdeh treng Cát Linh – Hà Đông – êlan êdeh treng wăl ƀuôn prŏng lông ngă tal êlâo hĭn mơ̆ng Hà Nội leh anăn wăt kơ ala čar klă klơ̆ng dưi ba yua.

Hŏng hnơ̆ng ênoh prăk phŭn kčưm jing êbeh 8.770 êklai prăk, hdră mkăp anei mâo klei mđĭ ênoh truh kơ êbeh 18.002 êklai prăk. Hluê si hdră tal êlâo dưi bi klăm hdră anei srăng dưi ba yua mơ̆ng mlan 6/2015, leh lu blư̆ bi kdung, truh kơ akŏ mlan 11 thŭn 2021, êlan êdeh treng anei dưi ba yua kyua mâo klei gĭt gai ktang phĭt mơ̆ng knŭk kna wưng păn bruă mrâo.

Phŭn bruă êlan klông leh anăn dŭ mdiăng, bruă sang čư êa bp Hà Nội gui leh bruă klam, mtrâo klă phŭn gha, mă klei hriăm ya ngă truh hĕ klei êmưt, mđĭ ênoh prăk, hlăm anăn lu jing dŭm boh klei djŏ tuôm hŏng klei bhiăn ala čar kơ bruă duh bi liê leh mkŏ mkra leh anăn ruh mgaih anôk ala.

10. Gưl tal êlâo hlăm hƀuê ênuk, êpul čưng boh ala čar Việt Nam dưi mŭt hlăm tuôr bi lông tal 3 World Cup 2022 krĭng Asi.

Thŭn 2021, êpul čưng boh Việt Nam gưl tal êlâo dưi mŭt hlăm tuôr bi lông knhal tuič World Cup ti krĭng Asi. Anei amâo djŏ knŏng jing klei čih yap kơ boh tŭ dưn ƀiădah lŏ bi mklă klei thâo lehanăn klei gĭr mơ̆ng êpul čưng boh. Bruă dưi bi lông čưng hŏng dŭm êpul čưng boh mrô sa krĭng lăn đru leh kơ êpul čưng boh Việt Nam lŏ mâo klei thâo hĭn, mjing tur knơ̆ng čiăng kơ epeul čưng boh Việt Nam jhŏng hĭn ti ktuê êlan nao hlăm klei bi lông prŏng hĭn hlăm êdei anăp.

Klei čưng boh Việt Nam mâo leh sa knhuang nao sui êdi čiăng nao mŭt hlăm klei bi lông čưng World Cup khădah ktuê êlan anăn ăt jing sa klei tĭng dlăng ka mâo klei wĭt lač êlâo ôh./.