VOV4.Êđê- Hruê 19/12, Êpul mă bruă mơ̆ng Anôk mkŏ mjing gưl dlông mâo Hoàng Đăng Quang , K’iăng Khua Anôk bruă mkŏ mjing gưl dlông ngă khua êpul mâo leh mmông mă bruă hŏng Anôk dlăng bruă Đảng čar Dak Lak kơ bruă” Ktuê dlăng boh klei hluê ngă kriê dlăng phung mă bruă knŭk kna”. Wưng thŭn 2016-2021, čar Dak Lak bi hrŏ leh êbeh 10% ênoh phung mă bruă knŭk kna dưi jao leh anăn lŏ dăp mnuih mă bruă hlue si hdră kčah. Kluôm čar hrŏ 466 čô mă bruă knŭk kna hlăm dŭm anôk bruă knŭk kna, hrŏ 4.377 čô mnuih hlăm dŭm anôk bruă mơ̆ng knŭk kna, leh anăn hroĭ 543 čô mnuih hlăm êpul knuă druh, mnuih mă bruă gưl să.

Gưl dlông mtă kơ čar Dak Lak lŏ dơ̆ng ktuê dlăng, mbŏ, bi leh bruă klam, klei dưi mơ̆ng grăp knơ̆ng, anôk bruă, alŭ wăl čiăng msir mgaih klei mtŭl mtŭk; bi mklă djŏ bruă mă, mrô bi mklă anăn bruă mă, phung mă bruă knŭk kna. Lŏ dơ̆ng dăp mkŏ mjing hdră mă bruă khuăt, amâo brei mâo ôh klei bi mjhua hŏng hră bi mklă gưl hriăm hlăm hdră bi hrŏ mnuih mă bruă knŭk kna.

Pô mblang: H’Zawut Ƀuôn Yă