VOV4.Êđê - Tlam hruê 22/11, Dhar bruă gĭt gai anôk bruă kƀĭn ala brei leh klei blŭ kơ bruă ksiêm wĭt klei bi kƀĭn tal 2 lehanăn brei klei blŭ kơ bruă mprăp kơ klei bi kƀĭn mdê hjăn lehanăn Klei bi kƀĭn tal 3, Anôk bruă kƀĭn ala gưl 15. Ti anôk bi kƀĭn, Khua anôk bruă kƀĭn ala Vương Đình Huệ mtă kơ dŭm êpul êya bruă hnưm mprăp jăk klei bi kƀĭn mdê hjăn hŏng 5 bruă yuôm bhăn djŏ tuôm kơ hdră mkŏ mkra ala čar, đru kơ yang ƀuôn. Hluê si Khua hlăm Anôk bruă kƀĭn ala Bùi Văn Cường: Klei bi kƀĭn mdê hjăn dưi mkŏ mjing hluê hdră online, tĭng srăng bi kƀĭn hlăm 4 hruê. Bi ala anôk bruă kƀĭn ala srăng bi mklă klei bi tŭ ư hluê kdrăp phần mềm dưi mkŏ dưm ti kdrăp điện tử. 5 bruă phŭn mâo Dhar bruă gĭt gai anôk bruă kƀĭn ala akâo kơ Knŭk kna hnưm ba mdah čiăng brei klei blŭ ti anôk bi kƀĭn mdê hjăn anei, anăn jing: Ksiêm dlăng klei čih mkra Hdră bhiăn mkra mlih, thiăm mbŏ dŭm mta klei mơ̆ng 10 hdră bhiăn; Hdră čih mkra hdră bruă êlan êran pral Dưr – Dhŭng kwar Ngŏ wưng thŭn 2021-2025; Klei čih mkra hdră bhiăn dŭm klei bhiăn, hdră mtrŭn mđĭ kyar ƀuôn prŏng Cần Thơ; Hdră čih mkra klei bhiăn, hdră mtrŭn bruă ngăn prăk čiăng đru pŏk hluê ngă pral Hdră lŏ krŭ wĭt lehanăn mđĭ kyar bruă duh mkra – ala ƀuôn..../. 

H’Nêč pô mblang