Knư̆ giăm hŏng dŭm hrue Tết, klei mă bruă knuă ti dŭm kdrŭn kan nah ngŏ čar Daklak knư̆ hĭn mơh mjhĭt m’uăt. Dŭm êtuh boh hô̆ trah mă kan đuĕ hiu nao mă truh  hlăm wăl êa ksĭ Trường Sa, dŭm êtuh boh hô̆ trah mă kan mkăn wĭt leh, hlăm hô̆ bŏ hŏng kan mâo ênoh. Jih jang mnuih hơ̆k kdơ̆k kyua mâo drông thŭn mrâo hŏng lu kan ba wĭt.  Bùi Văn Xông, ƀuôn hgŭm Phú Yên, čar Daklak mơak brei thâo:

“Thŭn anwi akŏ thŭn klei trah mă kan mâo klei myun, mrâo nao bhiâo riâo mâo leh dŭm pluh drei kan, lač jăk kơ yang adiê êdi. Mâo kan snei mơak êdi. Ênoh čhĭ kan ăt hơĭt mơh.”

Pô trah mă kan Phạm Đắc Dũng, ti alŭ wăl anôk dôk mrô 4, ƀuôn hgŭm Phú Yên hŏng klei mơak lač:

"Thŭn anei adiê siam, kan lu. Pô đuĕ hiu êgao dua pluh hrue mâo truh 2 tôn kan, mbha kơ sa čô mnuih mơ̆ng 15 - 16 êklăk prăk. Phung ayŏng adei mă bruă mâo klei myun, mâo ba wĭt hơĭt.”

Leh kleoi bi mŭt dŭm boh čar Lăn dap kngư, msĕ si Daklak, Gia Lai, Lâm Đồng mâo leh êa ksĭ sơăi. Êa ksĭ amâo mâo djŏ knŏng mâo kan hdang, ƀiădah lŏ jing mbah kơ klei bi mnia mblei hŏng ala tač êngao, jing leh klei găl prŏng kơ krĭng kngư čư̆ čhiăng msĕ si kphê, tiu, boh durian, djam mtam lehanăn mnga jing lu hĭn hŏng kluôm ala. Tui si K’Bril – Khua ƀuôn Kambute, ƀuôn hgŭm Đơn Dương, čar Lâm Đồng boh găl mrâo mơ̆ng bruă lŏ hma dliê kyâo, kan hdang Lăn Dap Kngư amâo mâo djŏ knŏng tĭng kơ ênhă, ƀiădah tĭng hŏng boh tŭ dưn mơ̆ng bruă lŏ hma thâo mĭn.

“Ară anei mnuih ƀuôn sang thâo ba yua leh êdeh kai prŏng, thâo duh bi liê kơ kdrăp krih êa thâo mĭn, thâo dlăng kriê wiê ênăk hŏng klei kreh knhâo... Ƀuôn Kambute lu êlâo dih jing pưk sang hơăi mang, ƀiădah ară anei mâo sang dua tal, 3 tal, ênoh gŏ sang tloh blei êdeh pă boh pông lu leh.” 

​Jih thŭn 2025, hjăn ênoh tŭ dưn boh mnga bruă lŏ hma, dliê kyâo, kan hdang mơ̆ng Lăn dap kngư - Dhŭng kwar krah mâo truh 140.000 êklai prăk. Êlan dơ̆ng pral   Khánh Hoà-Buôn Ma Thuột mâo ngă leh lu kdrêč êlan, êlan dơ̆ng pral Pleiku - Quy Nhơn mâo mkra mơh, đru dŭ ba sa ênoh prŏng boh mnga lŏ hma dliê kyâo kan hdang mơ̆ng lăn dap kngư truh kơ kdrŭn ksĭ hŏng klei ênưih. K’iăng nai prŏng nai prĭn Lê Đức Niêm, K’iăng khua sang hră gưl prŏng Lăn dap kngư lač, lăn dap kngư ară anei mâo leh bruă duh mkra kjăp hĭn: 

“Lăn dap kngư amâo mâo djŏ knŏng jing krĭng pla mjing, amâodah anôk bi êran pui kmlă hŏng ai angĭn, ƀiă dah lŏ jing anôk mkă kjăp hŏng logistics, klei duh mkra êa ksĭ, bruă hiu čhưn ênguê, bruă mkra mjing ktuê hang ksĭ kwar krah. Kyua mơ̆ng lu hdră êlan bi mă bruă anei mjing leh klei găl ênŭm hŏng klei kjăp hĭn.”

​ Hŏng dŭm mta mnơ̆ng mâo klei găl prŏng krĭng pla mjing, bruă dliê kyâo mnơ̆ng hlăm êa jing lu jơr hĭn mkă hŏng kluôm ala, Lăn dap kngư mrâo lŏ mâo êbeh  1000km hang ksĭ, hŏng lu kdrăn mnei ktue hang ksĭ jăk siam hĭn. Mâo ênai êa ksĭ poh ya, nao mbĭt hŏng ênai čing čhar, snănbruă hiu čhưn ênguê mơ̆ng Lăn dap kngư srăng pral hlăm knhuang mrâo. Tui si Lương Nguyễn Minh Triết, Khua bruă Đảng čar Daklak, čiăng mâo dưn yua jih klei găl  mđĭ kyar, klei găl mâo, mđĭ jih ai ktang mơ̆ng alŭ wăl ktuh êyuh hlăm bruă bi mlih mrô, mkŏ krĭng yŭ ngŏ. Ti Daklak, klei bi mlih mrô jing leh sa mta bruă čoh čuăn:

“Pral mkŏ mjing mđĭ kyar klei kreh knhâo wưng thŭn 2026-2030... Hlue ngă dŭm klei tĭng mrâo mơ̆ng čar msĕ si bruă ngă hră mơar, klei ngă bruă kơ mnuih ƀuôn sang, kơ klei mđĭ kyar bruă lŏ hma, bruă hiu čhưn ênguê hŏng klei thâo mĭn, mdrơ̆ng hŏng klei yan adiê ngă, kiă kriê bruă răng mgang dliê”.

 Hŏng dŭm boh hô̆ trah mă kan nao dăl hlăm jih wưng Tết, dŭm kdrăn čuah kô̆, hlŏng truh kơ dŭm đang kphê, lehanăn kdrăn lŏ, đang hma hŏng sang ală kĭng, mjing leh krĭng duh mkra đĭ kyar hlăm dhŭng kwar krah - Lăn dap kngư êdah klă. Leh mâo êa ksĭ wang wăt dliê, hŏng êlan dơ̆ng pral, hŏng hdră mă bruă mrô, alŭ wăl anei amâo mâo djŏ knŏng mđĭ klei hdĭp mda mnuih ƀuôn sang, ƀiădah lŏ jing klei srăng kpưn đĭ jih hnơ̆ng kơ klei mđĭ kyar mrâo, čiăng bi năng hŏng hdră êlan kpưn đĭ mơ̆ng djuê ana./.