VOV4.Êđê -  Ti Hà Nội, Anôk bruă bi ala Chile ti Việt Nam mkŏ mjing leh Knăm bi hdơr 50 thŭn hruê mkŏ mjing klei bi mjĕ Việt Nam – Chile. Ară anei, Chile jing ƀĭng hgŭm bruă mnia mblei prŏng tal 4 mơ̆ng Việt Nam ti krĭng Mi Latino lehanăn Việt Nam jing ƀĭng hgŭm bruă mnia mblei prŏng êdi mơ̆ng Chile hlăm Êpul ASEAN, hŏng ênoh prăk bi mnia mblei hlăm mlan 10 thŭn anei mâo 1,6 êklai USD. Ti knăm anei, K’iăng khua phŭn bruă hŏng tač êngao Nguyễn Quốc Dũng lŏ ksiêm wĭt leh ktuê êlan bi hgŭm hlăm 50 thŭn êgao, mbĭt anăn brei thâo, ênoh prăk bi mnia mblei dua nah hlăm 9 mlan akŏ thŭn 2021 mâo giăm 1,470 êklai USD, đĭ 59% mkă hŏng wưng thŭn 2020. Việt Nam lehanăn Chile lŏ dơ̆ng bi hgŭm kjăp lehanăn bi đru kơ hdơ̆ng găp ti dŭm êpul bruă prŏng tar rŏng lăn lehanăn klei bi kƀĭn trông lu tĭng, lŏ dơ̆ng bi hgŭm mdrơ̆ng hŏng klei ruă tưp, bi êdah ai tiê bi mguôp, bi mjĕ mjuk plah wah mnuih ƀuôn sang dua ala čar./.

H’Nêč pô mblang