VOV4.Êđê- Aguah hruê 12/12, bŏ 90 thŭn Hruê mkŏ mjing hdră kdơ̆ng mblah tuh êrah mčah klang mơ̆ng phung mnă cộng sản ti Sang mnă Kon Tum ngă ktư̆ yơ̆ng amâo djŏ ti krĭng Kon Tum, ti ala čar Việt Nam ƀiădah wăt kluôm krĭng Đông Dương, bruă Đảng čar, Êpul gơ̆ng bruă mnuih ƀuôn sang, Anôk bruă sang čư̆ êa, Anôk bruă mặt trận čar Kon Tum mkŏ mjing leh knăm bi hdơr 90 thŭn Hruê mkŏ mjing hdră kdơ̆ng mblah tuh êrah mčah klang kñăm bi hdơr hƀuê ênuk knhuah gru krŭ kgŭ kdơ̆ng kdrưh k’ăm mơ̆ng djuê ana, lač jăk kơ klei jhŏng ktang, săn asei mơ̆ng phung lĭng kahan cộng sản hlăm hdră mblah bi kdơ̆ng hŏng phung roh Prăng ti Sang mnă Kon Tum.

Sang mnă Kon Tum mâo Prăng rŭ mdơ̆ng mơ̆ng dŭm ênuk thŭn 1915-1917, jing anôk krư̆ kđăl phung mnă mă bruă kđi čar mâo mkŏ mjing hnưm êdi ti krĭng Lăn dap kngư. Mâo wưng, sang mnă Kon Tum krư̆ êbeh 500 čô mnă mă bruă kđi čar. Klei lar bra mơ̆ng hdră kdơ̆ng mblah tuh êrah mčah klang lehanăn kăm amâo ƀơ̆ng huă ti sang mnă Kon Tum hlăm mlan 12 thŭn 1931 ngă leh kơ Prăng bi mlih hdră kiă kriê kjăp phĭt, tŭ ư bi lui jang hluê si klei ba mdah mơ̆ng phung mnă, lăm lui bruă mkra êlan dơ̆ng prŏng 14, boh nik truh ti thŭn 1934 Prăng bi kruh leh sang mnă Kon Tum anei./.

Pô mblang: H’Nêč Êñuôl