VOV4.Êđê- Mmăt hruê 19/11, knăm bi hdơr kơ mnuih ƀuôn sang djiê hlăm wưng bluh mâo klei ruă Covid 19 dưi mkŏ mjing ti anôk mkŏ phŭn jing Sang bi kƀĭn prŏng Thống Nhất, ƀuôn prŏng Hồ Chí Minh lehanăn Wăl tač mnga Thống Nhất, ƀuôn prŏng Hà Nội. Ti Sang bi kƀĭn prŏng Thống Nhất, ƀuôn prŏng Hồ Chí Minh, phung khua kiă kriê Đảng, Knŭk kna nao leh ti knăm anei hluê ngă klei bhiăn čuh brui mngưi, dưm kwang mnga bi hdơr kơ mnuih ƀuôn sang, mnuih Việt Nam dôk hdĭp ti ala tač êngao, phung lĭng kahan djiê kyua klei ruă Covid 19.

Bi ala Đảng lehanăn Knŭk kna, Đỗ Văn Chiến, Khua hlăm Anôk bruă Đảng gưl dlông, Khua Dhar bruă mặt trận čar kwar gưl dlông Việt Nam bi êdah klei hnĭng ênguôt lehanăn m’ĭt asăp bi juh hŏng gŏ sang, găp djuê mâo mnuih djiê hlăm wưng bluh mâo klei ruă Covid 19. Ñu mñă klă, kyua klei ruă bluh mâo ktang phĭt, dleh dưi ksiêm dlăng, huĭ hyưt kyua anăn khădah gĭr leh hŏng jih ai tiê ƀiădah ăt mâo mnuih djiê ka dưi mkŏ mjing knăm dơr djŏ si klei bhiăn mdê mdê.

Truh kơ hruê 19/11, kluôm ala mâo êbeh 23 êbâo čô mnuih djiê kyua Covid 19, hlăm anăn ƀuôn prŏng Hồ Chí Minh truh 74% hŏng êbeh 17 êbâo čô djiê. Klei ruă Covid 19 mă mđuĕ leh lu mta mnơ̆ng, ba lu klei luič liê, klei ênguôt ruă êka. Bi hdơr kơ mnuih djiê ăt jing klei čiăng mtă mtăn kơ grăp čô drei kơ klei truh jŭ jhat mơ̆ng klei ruă anei ngă. Ară anei, hdră mdrơ̆ng hŏng klei ruă Covid 19 ăt dôk mâo, brei drei mprăp ai ktang hĭn êlâo, amâo dưi ngă ngơi./.

Pô mblang: H’Nêč Êñuôl