VOV4.Êđê - Leh 2 hruê mkŏ mjing, tlam mbruê 26/11, ti Hà Nội, klei kƀĭn klei knhâo knhăk hlăk thŭn mda Việt Nam tar rŏng lăn tal 4 bi ruê̆ leh. Hlăm klei kƀĭn anăn, phung nao hgŭm mâo leh klei bi trông, ba mdah dŭm klei đru kcĕ, hdră êlan bi lar klei knhâo knhăk hlăk thŭn mda Việt Nam, čong ngă mă pô, gĭr ktưn đru mguôp kơ klei mlih mrâo ala čar, mkŏ mjing mbah ksiêm êmuh čiăng kơ knŭk kna leh anăn dŭm anôk bruă djŏ tuôm mdưm klei knhâo knhăk hlăk thŭn mda jing klei năng kơ bruă mđĭ kyar ala čar. Hlăm klei kƀĭn anăn, phung hđeh knhâo knhăk Việt Nam mâo leh lu klei đru kčĕ hlăm bruă mđĭ kyar mnuih mă bruă hlăm bruă mlih mrô, kdrăp mrâo mrang leh anăn bruă duh mkra mrô hŏng 2 hdră mkăp bi klă nao hgŭm tui ngă mâo boh tŭ dưn hdră êlan mlih mrô ala čar mơ̆ng knŭk kna. Dŭm klei blŭ mơ̆ng phung hđeh knhâo knhăk srăng dưi bi mklin, hưn mdah hŏng Đảng, knŭk kna kơ dŭm boh klei djŏ guôp hŏng bruă kñăm mđĭ kyar ala čar hŏng klei kjăp.

Y - Ƀel pô mblang