VOV4.Êđê - Ti sang adôk hơĭt ênang mơ̆ng Đại tướng Võ Nguyên Giáp ti alŭ An Xá, să Lộc Thủy, kdriêk Lệ Thuỷ mơ̆ng lu thŭn hŏng anei jing anôk jĕ giăm hŏng mnuih ƀuôn sang, lĭng kahan hlăm kluôm ala. Anôk anei mâo nanao klei khăp mơ̆ng mnuih ƀuôn sang hlăm djăp krĭng kwar ala čar hriê čuă, bi hdơr kơ sa čô Đại Tướng kdlưn êdi kơ djuê ana.

Nao găn ƀăng jang kyâo mkra mơ̆ng đưm êlâo, hluê êlan nao mŭt hlăm sang Đại tướng Võ Nguyên Giáp, tlă anăp hmei srăng pruê̆ ana čê tâu mtah mda, dưi khăt bi msiam kpă blăk nanao. Sang hđăp giăm êa krông Kiến Giang hlăm alŭ An Xá, să Lộc Thủy, kdriêk Lệ Thủy, siă suôr hŏng lu klei bi hdơr dơ̆ng mơ̆ng ênuk điêt kơ Đại tướng. Êlâo adih, hlăm ênuk bi blah, sang anei arăng čuh rai jih. Thŭn 1977, hluê hŏng klei čang hmăng mơ̆ng gŏ sang Đại tướng, sang anei dưi rŭ mdơ̆ng mơ̆ng tur sang hđăp. Sang anei tăm hŏng hlang gang hjan, gang mđiă. Hlăm lam sang dăp dưm lu mnơ̆ng, ti adŭ krah êlan nao mŭt jing anôk ngă yang kơ aê aduôn atâo atiêt mbĭt hŏng rup Đại tướng Võ Nguyên Giáp. Ti djiêu mâo sa huôm prŏng dưm mnơ̆ng dhơ̆ng mơ̆ng gŏ sang. Nah êngao mâo jhưng mdhô̆ kăp drông tuê. Djiêu gah pưk sang lŏ dưm lu pŏk rup bi hdơr. Võ Đại Hàm, jing pô iêu kơ Đại tướng aê, hluê hŏng dŭm ênuk gưl čô anak hlăm djuê ana thŭn anei giăm 80 thŭn jing pô kăp dlăng Sang bi hdơr anei, mđing dlăng kriê kơ anôk anei, kreh čuh brui mngưi ti knưng bi hdơr kơ Đại tướng brei thâo:“Sang anei dưi mdơ̆ng ti krĭng lăn mơ̆ng aê aduôn hđăp đưm, ăt mkra hŏng kyâo snei mơh. Hlăk Prăng nao mblah plah mmiă Quảng Bình, kreh đĭ canô mơ̆ng Đồng Hới hluê êlan êa krông Kiến Giang hriê tui duah lehanăn čuh leh sang anei. Leh hruê mâo klei êngiê, kdriêk lŏ rŭ mdơ̆ng sang, grăp čô mnuih čang hmăng Đại tướng tơdah wĭt kơ ƀuôn sang dưi dôk ti anôk anei”.

Bruă dlăng kriê Sang bi hdơr anei mâo gŏ sang Võ Đại Hàm lehanăn Trần Thị Vân, jing čô anak djuê ana Võ hluê ngă. Mnuih ƀuôn sang lehanăn lĭng kahan kluôm ala tơdah nao čuă dưi tŭ drông jăk êdi lehanăn dưi hmư̆ lu klei yăl dliê kơ ênuk hđeh mơ̆ng Đại tướng. Khădah mâo lu blư̆ hriê ti sang anei, ƀiădah grăp blư̆ mŭt, kahan hđăp Phan Thế Vinh mgei nanao ai tiê. Kyua dŭm blư̆ Đại tướng wĭt čhưn, ñu jing sa hlăm dŭm čô mâo k’hưm dưi bi tuôm, bi blŭ hrăm hŏng Đại tướng, kahan hđăp Phan Thế Vinh, ti să Lộc Thủy, kdriêk Lệ Thủy yăl dliê snei:"Mâo ya wĕ mnơ̆ng mtrŭt nanao pô grăp thŭn truh hruê Awa Giáp djiê amâo dah hruê kkiêng kơ Awa Giáp amâo dah ya hruê m’ak mkăn, kâo čiăng hriê tinei lehanăn dôk bi hdơr kơ Awa. Msĕ si Awa Giáp ăt dôk hdĭp lehanăn wĭt dôk ti sang anei”.

Ênuk hđeh mơ̆ng Đại tướng siă suôr hŏng hnoh êa krông Kiến Giang jăk ênang. Aduôn Ngô Thị Bảy, ti alŭ An Xá, să Lộc Thủy, kdriêk Lệ Thuỷ lač snei, dŭm blư̆ Đại tướng wĭt čhưn kơ ƀuôn sang, mâo lu snăk mnuih nao drông. Adiê mlam, alŭ wăl, mnuih ƀuôn sang mkŏ mjing klei kdŏ mmuñ hò khoan ti anăp Sang bi hdơr anei. Aduôn Bảy mbĭt hŏng êpul kdŏ mmuñ hlăm să Lộc Thuỷ mdah leh ênhiang mmuñ hò khoan jăk jĭn. Aduôn Bảy lŏ hdơr, hlăk anăn, Đại tướng dôk ti anăp adring sang, djiêu gah găn jing mnuih hlăm gŏ sang lehanăn lu mnuih ƀuôn sang, pah kngan mbĭt hŏng ênhiang mmuñ hò khoan, ai êwa gŏ sang, klei khăp hlăm ƀuôn sang h’uh mđao êdi.“Tal êlâo dưi bi tuôm hŏng Đại tướng, mmông anăn m’ak yơh, yơ̆ng asei mlei tơdah Awa nao mă kngan. Kâo hlăk anăn dôk mda asei, lač jăk kơ Awa, djă kngan Awa kâo mgei ai tiê lač: Kngan awa ê’un êdi, bi kngan kâo gơ̆ khăng, lač snăn awa tlao. Ƀô̆ mta awa amâo lŏ msĕ hŏng sa čô khua tướng ôh ƀiădah msĕ si sa čô ama, sa čô aê ti krĭng ƀuôn sang pô, gơ̆ jĕ giăm lehanăn khăp êdi kơ mnuih ƀuôn sang”.

Boh sang jăk ênang ti djiêu êa krông Kiến Giang siă suôr hŏng lu klei bi hdơr mơ̆ng ênuk điêt truh kơ mmông Đại tướng awăt asei. Ară anei, sang bi hdơr kơ Đại tướng Võ Nguyên Giáp jing leh anôk jĕ giăm hŏng grăp čô mnuih ti djăp krĭng kwar hlăm ala čar. Hdruôm hră čih bi hdơr ti krah sang anei ăt dôk djă pioh dŭm pruê̆ čih bŏ hŏng klei khăp čiăng, mpŭ mni mơ̆ng mnuih ƀuôn sang, lĭng kahan kluôm ala lehanăn ƀĭng găp mơ̆ng ala tač êngao sĭt hruê čhư ti sang bi hdơr kơ Đại tướng Võ Nguyên Giáp./.