VOV4.Êđê- Tlam mbrue (4/1), trông čhai hlăm êpul čih mkra Klei mtrŭn kơ hdră êlan ngăn prăk pioh kơrŭ wĭt bruă duh mkra, phung bi ala mâo klei bi tŭ ư, čiăng bi mâo hdră êlan klei kơ ngăn prăk, đru mđĭ kyar pral bruă duh mkra, rơ̆ng kơ klei hdĭp mda ala ƀuôn. Khă snăn, mâo đa đa phung bi ala dôk bi hyưt, bruă anei srăng dưi ngă, kyua dôk mâo klei amâo mâo hơĭt klei kơ sang lăn. Lehanăn akâo kơ dŭm hdră êlan klei kơ ngăn prăk mđing hĭn kơ dŭm bruă mtrŭt mđĭ, mâo klei tŭ dưn sĭt. Phung bi ala lač, năng bi kna hnŏng ênoh ngăn prăk hlăm klei čih mkra hdră êlan ngăn prăk pioh kơ bruă kơrŭ wĭt bruă duh mkra. Bi trông hlăm êpul, Khua lăn čar Nguyễn Xuân Phúc čang hmăng lŏ thiăm êpul mghaih msir kñăm mđĭ hĭn bruă ba yua ngăn prăk, anăp rơ̆ng dưi mâo ba wĭt ngăn prăk knŭk kna hŏng klei kjăp, mđĭ hnơ̆ng klă mngač klei mă bruă, lehanăn mâo bruă klam sĭt êmĭt hdră êlan jia. Pô bi ala Nguyễn Trường Giang, Êpul bi ala Bruă kƀĭn ala čar Daknông mâo leh klei bi tŭ ư hŏng klei amâo mâo rĭng jia, thâodah bi hrŏ ênoh jia, prăk tăk, hlăm anăn mđing bi hrŏ jia kơ klei ênoh ênil đĭ 2% ba yua hŏg djăp mta mnơ̆ng dôk tŭ ênoh rĭng jia 10%. Siămdah, pô bi ala akâo bi mâo klei ksiêm dlăng nik pô dưn yua, mđing hŏng dŭm êpul êya bruă, kñăm bi mâo hdră êlan mtrŭt bruă duh mkra, kñăm dưi đĭ lar prŏng. Phung bi ala lŏ mñă, tơdah hdră mtrŭn anei leh mâo klei bi klă, knŭk kna lehanăn dŭm phŭn dhar bruă ngă klei ƀuăn rơ̆ng, bi klă bruă klam kđĭ čar, bruă klam klei hlak mblang, jao bruă klam kơ mdê pô, boh nik bruă klam hŏng pô djă akŏ hlăm klei kiă kriê, gĭt gai lehanăn ksiêm dlăng jih jang bruă hlue ngă hdră êlan đru, rơ̆ng bi djŏ hŏng mta kñăm, đăm lĕ hlăm klei duah mčhua hŏng hdră êlan anei, rơ̆ng bi mâo klei tŭ dưn, lehanăn klei dưi ngă bruă.

   Leh hmư̆ Knŭk kna hưn mdah Hră m’ar mơ̆ng 3 Klei čih mkra hdră mtrŭn lehanăn 1 klei čih mkra hdră bhiăn ti Klei bi kƀĭn mdê mơ̆ng Anôk bruă kƀĭn ala gưl XV, Êpul bi ala anôk bruă kƀĭn ala čar Dak Lak bi tŭ ư lehanăn bi mni kơ dŭm klei čih mkra pral hưn mdah dŭm bruă yuôm bhăn, mjêč kơ hdră lŏ krŭ wĭt lehanăn mđĭ kyar bruă duh mkra – ala ƀuôn. Phung bi ala ăt brei klei blŭ kơ klei čih mkra Hdră mtrŭn bruă ngăn prăk, prăk kăk đru kơ hdră lŏ krŭ wĭt lehanăn mđĭ kyar bruă duh mkra – ala ƀuôn. Khă snăn, pô bi ala Lê Thị Thanh Xuân bi êdah klei mđing uêñ kơ mrô dưi hưn mdah. Kơ wưng hluê ngă dŭm hdră mtrŭn, pô bi ala Nguyễn Thị Thu Nguyệt, lač snei, ba mdah lu hdră mtrŭn msĕ snei ƀiădah wưng hluê ngă hlăm 2 thŭn jing bhiâo, snăn brei mâo hdră msir klă klơ̆ng:

“Bruă anei si srăng ngă čiăng rơ̆ng klei tŭ dưn dŭm mta kñăm mâo kčah mtrŭn; knŭk kna brei mâo ya hdră ksiêm dlăng, hdră pŏk hluê ngă kñăm dưi ngă hŏng klei mđrăm mbĭt lehanăn si hdră srăng hluê ngă bruă anei? Tal dua, brei ruah dŭm klei mđing dlăng tal êlâo čiăng pŏk hluê ngă dŭm hdră mtrŭn anei čiăng rơ̆ng kjăp dŭm mta kñăm. Snăn, brei hưn mdah klei mđing tal êlâo lehanăn klei kluôm hĭn čiăng kơ knŭk kna mđing dlăng lehanăn tă dŭm hdră êlan ngă bruă; msir mghaih dŭm klei dleh dlan, gun kpăk, si srăng ngă čiăng dưi pŏk hluê ngă bruă anei hlăm wang 2 thŭn”./.

Pô mblang: Y-Khem Niê