VOV4.Êđê - Dŭm anôk bruă klei mrâo prŏng mơ̆ng Japon hâo hưn hruê 22/11 msĕ si Mainichi, Nikkei, Jiji… mđrăm mbĭt hâo hưn kơ gưl hiu čhưn klă klơ̆ng ti Japon mơ̆ng Khua knŭk kna ala čar Việt Nam yang ƀuôn ngă phŭn êngiê Phạm Minh Chính mơ̆ng hruê 22-25/11. Hră klei mrâo Mainichi mñă klă, Khua knŭk kna  Phạm Minh Chính jing Khua prŏng tal êlâo nao čhưn klă klơ̆ng ti Japon mơ̆ng leh bruă knŭk kna mơ̆ng Khua knŭk kna Kishida Fumio hưn mdah. Gưl nao čhưn kñăm bi mklă hĭn klei bi hgŭm dua nah hlăm lu mta bruă mâo bruă răng mgang klei êđăp ênang, bruă duh mkra... mđing truh kơ bruă mkŏ mkra krĭng India – Pacifik êngiê lehanăn pŏk mlar. Hlăm gưl nao čhưn tal anei, hlăm hruê 24/11, Khua knŭk kna Phạm Minh Chính srăng mâo klei bi trông hŏng Khua knŭk kna Kishida Fumio, bi trông kơ hdră mkăp mnơ̆ng dhơ̆ng hlăm tar rŏng lăn, pŏk mlar bruă tiŏ nao phung nao hriăm bruă mơ̆ng Việt Nam truh kơ Japon, bruă hlăm tar rŏng lăn mâo boh klei krĭng êa ksĭ Ngŏ lehanăn êa ksĭ Hoa Đông./.

H’Nêč pô mblang