Ti đang kbâo prŏng 17ha ti să Êa Sô, kdriêk Êa Kar, čar Dak Lak, Võ Quốc Dị mbĭt hŏng dŭm pluh čô mnuih mă bruă dôk mjêč hrui koh kbâo. Hlăm 4 thŭn hŏng anei, grăp thŭn gŏ sang ñu hrui wĭt êbeh 1 êklai prăk. Hnư hrui wĭt anei sa kdrêč kbiă hriê mơ̆ng hdră mtrŭn hrui blei hŏng ênoh hơĭt mơ̆ng sang maĭ kbâo ƀêñ hra mbĭt hŏng bruă ba yua dŭm hdră msir mrâo hlăm hdră pla kbâo. Võ Quốc Dị brei thâo:

 “Sang kâo ară anei lu jing pla mjeh kbâo mrâo K3 jing lu. Kdrăp krih êa kâo ba yua béc sơaĭ, gơ̆ êran hjăn hŏng pui kmlă mbĭt hŏng kdrăp bi êran pui kmlă tơdah pui kmlă tăm djiê. Grăp blư̆ koh kbâo hrui êmiêt amâo dah lŏ pla mrâo, hmei mkŏ dưm béc dơ̆ng mơ̆ng akŏ yan mtam, sui hlăm brô 3 – 4 mlan akŏ thŭn. Leh krih, srăng pruê hbâo, lu jing pruê NPK lehanăn lŭk thiăm urê, đru kơ ana đĭ jing, hbâo đĭ pral mơh êgao kơ rơ̆k.

Siă suôr hŏng bruă pla kbâo êbeh leh 20 thŭn, Tô Bá Hồng, ti să Êa Sô, kdriêk Êa Kar brei thâo:

“Kâo mâo 5 ha kbâo, sang maĭ đru lu mơh ênoh prăk duh bi liê msĕ si prăk krih êa hlăm sa yan mâo 3 êklăk prăk/ha,koh kbâo 2 êklăk prăk/ha; hbâo pruê tui hluê hŏng đang kbâo pô lu amâo dah ƀiă srăng mâo sang maĭ đru mơh. Si tô hmô, 1 ha đru 1 ton hbâo pruê, tui hluê dŭm hnơ̆ng drei čiăng mă mơh. Kbâo dŭm thŭn hŏng anei ênoh čhĭ hơĭt, mâo hnư hrui wĭt kjăp. Msĕ thŭn anei, sang kâo sa hamâo 70 -80 ton kbâo, ênoh 1,1 – 1,3 êklăk prăk/ton, tĭng jih prăk bi liê ăt dôk 70 êklăk prăk/ha.

Să Ea Sô mâo êbeh 1.000 ha kbâo. Nguyễn Xuân Hữu, Khua Anôk bruă sang čư̆ êa să lač snei, khădah boh tŭ bruă duh mkra mơ̆ng kbâo ka dưi tĭng mkă ôh hŏng dŭm mta ana mkăn msĕ si boh durian, boh êrang, vải amâo dah mnơ̆ng pla sui thŭn mkăn mnsĕ si kphê, tiu, ƀiădah anei jing mnơ̆ng pla phŭn ti krĭng lăn čuah boh tâo anei, đru kơ lu gŏ sang tlaih ƀun knap lehanăn mâo klei hdĭp đĭ kyar hĭn.

“Alŭ wăl kreh bi trông hŏng sang maĭ, tĭng dlăng leh sa yan ngă bruă mơ̆ng dŭm mta mjeh mnơ̆ng pla lehanăn sang maĭ hlăk, dôk ba yua lu mjeh mnơ̆ng pla tŭ dưn đru kơ ƀĭng ngă lŏ hma. Leh kơnăn jing klei kơ hbâo pruê, êa drao răng mgang mnơ̆ng pla mjing djŏ guôp, snăn hmei ăt ƀuh sang maĭ ƀêñ hra kreh nao ksiêmdlăng, mă mta čiăng ba ksiêm dlăng đru kơ ana kbâo đĭ jing, ba yua kdrăp kreh knhâo mrâo mrang hlăm hdră dlăng kriê čiăng ba wĭt boh mnga lu”.

Čar Dak Lak ară anei mâo 15.000 ha kbâo, pla lu ti dŭm kdriêk Ƀuôn Đon, Êa Sup, Êa Kar lehanăn Mdrak. Hnơ̆ng mâo kbâo hlăm grăp thŭn truh 1 êklăk ton.

Lê Tuân – Kơiăng khua knơ̆ng bruă mguôp hnư kbâo ƀêñ hra 333 Dak Lak brei thâo, anôk bruă duh mkra bi hgŭm hŏng êbeh 2.100 gŏ sang ti dŭm kdriêk Ea Kar lehanăn Mdrak, pla 8.200 ha kbâo, hŏng hnơ̆ng mâo hlăm brô 750.000 ton kbâo hlăm grăp thŭn. Anôk bruă lŏ bi hgŭm hŏng ƀĭng ngă lŏ hma lehanăn bruă sang čư̆ êa alŭ wăl pŏk ngă hdră msiê pla mjing hơĭt kjăp.

 “Sang maĭ dôk mkra mđĭ hdră mkra mjing êlam kñăm mđĭ boh tŭ hlăm bruă anei, kriê dlăng jăk hdră koh kbâo čiăng rơ̆ng hnơ̆ng tŭ jăk ba wĭt kbâo truh ti sang maĭ. Mbĭt anăn, ba yua tuič hnơ̆ng dŭm mta mnơ̆ng leh mă jih mta ƀêñ hra čiăng dưi bi hrŏ ênoh čhĭ dŭm mta mnơ̆ng mkra mjing êdei kơnăn msĕ si hbâo vi sinh, amâo dah hlăm ênuk ară anei jing mkra pui kmlă mơ̆ng klei čuh hmôk kbâo mâo leh lu sang maĭ dôk ngă. Hmei ăt dôk ksiêm dlăng bruă ba pla dŭm mta mjeh kbâo jăk hĭn, kñăm mđĭ hnơ̆ng mâo lehanăn mđĭ hnơ̆ng ƀêñ hra hlăm kbâo hlăm sa ênhă pla.

Hŏng klei bi hgŭm kjăp plah wah ƀĭng ngă lŏ hma hŏng anôk bruă duh mkra lehanăn bruă sang čư̆ êa alŭ wăl, anôk bruă kbâo ƀêñ hra Dak Lak lŏ dơ̆ng đĭ kyar hơĭtn kjăp, ba hnư hrui wĭt hơĭt kơ dŭm tĭng lehanăn đru mguôp hlăm hdră duh mkra ti alŭ wăl./.