Êbeh 100 čô mơ̆ng Êpul hgŭm bruiă lŏ hma Nam Yang (kdriêk Đăk Đoa) dôk hmăng hmưi wưng hrui pĕ tiu thŭn anei srăng mâo ba wĭt dŭm pluh êklai prăk hŏng 50ha tiu dôk mâo boh. Nguyễn Tấn Công – khua êpul hgŭm bruă brei thâo, mơ̆ng thŭn 2018 truh kơ ară anei, anôk bruă pla pluă tiu hŏng kphê čiăng bi hrŏ ênoh bi liê, mđĭ hĭn klei hơĭt ti anăp klei mlih mơ̆ng anôk mnia mblei.

Nao mbĭt hŏng anăn, Êpul hgŭm bruă mtrŭt mjhar ƀĭng ngă lŏ hma dưn yua klei pla mjing doh, rơ̆ng kơ hnơ̆ng jăk ba čhĭ. Êpul hgŭm bruă mtă kơ ƀĭng ngă lŏ hma amâo mâo yua dŭm êa drao kăm hlăm klei ngă bruă. Ngă klei bi hmô lu mta lu ana, amâo mâo mđĭ ênoh duh bi liê ƀiădah đru mđĭ ênoh ba wĭt. Kyua bi mlih hdră pla mjing găl guôp, ênhă tiu amâo pŏk phai msĕ hŏng êlâo, phung pla tiu ăt mâo hnư hrui wĭt lu kyua mâo ênoh leh anăn mâo boh.