Hluê si knơ̆ng bruă klei mrâo leh anăn hâo hưn čar Kon Tum, truh kơ ară anei mâo leh êbeh 58% gŏ sang hlăm čar yua cáp quang Internet, mạng 4G truh kơ alŭ ƀuôn hluê si hnơ̆ng čuăn lăn čar… Hŏng bruă mkŏ mkra mrô ƀrư̆ hruê ƀrư̆ kluôm dhuôm, mnuih ƀuôn sang Kon Tum mâo dŭm klei mlih hlăm klei mă bruă knuă. Ayŏng Lương Văn Thắng, ti alŭ 2, să Ia Dom, kdriêk knông lăn Ia H’Drai brei thâo, bruă yua đĭng blŭ thâo mĭn dưi đru kơ ñu hlăm klei mkra mjing, rông mnơ̆ng:

 “Kâo kreh dlăng klei hưn hlăm mạng yang ƀuôn, leh anăn lŏ ksiêm duah boh dŭm boh klei hŏng klei ênưih hlăm bruă pô. Kâo kreh pŏk mạng yang ƀuôn, dlăng kơ dŭm klei bi hmô, sitôhmô rông anur, rông mja, rông kpa. Kâo ksiêm dlăng lu klei hưn hlăm mạng yang ƀuôn”.

Leh êbeh 2 thŭn hluê ngă klei bi klă mrô 749 mơ̆ng Khua knŭk kna, truh kơ ară anei, čar Kon Tum mâo leh êbeh 16.800ha ana pla mjing, 142 đang war dưn yua kdrăp mrâo mrang, êbeh 116.600 gŏ sang ngă lŏ hma ba leh boh mnga hlăm anôk mnia mblei điện tử, 1 klei bi hmô alŭ 3, să Tân Lập, kdriêk Kon Braih rơ̆ng djăp klei găl alŭ thâo mĭn… Mlih mrô dôk mkŏ mjing dŭm klei mlih jăk hlăm bruă lŏ hma, hlăm anăn ƀĭng ngă lŏ hma jing pô ngă, jing mta kñăm kơ dŭm klei mlih mrô. Ayŏng A Tạo, mnuih Sêdang, sa čô hgŭm hlăm êpul hgŭm bruă pla êa drao Tu Mơ Rông, brei thâo:

 “Êpul hgŭm bruă sa čô sa anôk. Grăp hruê jak jih jang bi kƀĭn hŏng êlan online. Kƀĭn sơnăn ñu ênưih, găl hĭn. Khua êpul ba mdah bruă pô srăng mă hlăm hruê kăm anei. Kƀĭn online rơ̆ng kơ klei blŭ hrăm plah wah phung hlăm êpul čiăng ngă bruă hrăm mbĭt”.

Hŏng 68% mnuih ƀuôn sang ti krĭng ƀuôn sang leh anăn 73% phung mă bruă hlăm bruă lŏ hma, dliê kmrơ̆ng, čar Kon Tum bi klă mlih mrô jing hdră êlan yuôm bhăn čiăng mđĭ kyar bruă lŏ hma, krĭng ƀuôn sang hluê êlan mrâo mrang čiăng đru kơ ƀĭng ngă lŏ hma ngă bruă hŏng ênoh bi liê ƀiă hĭn ƀiădah ba wĭt boh tŭ dưn hĭn. Hluê si Đặng Trần Huân, k’iăng khua knơ̆ng bruă lŏ hma leh anăn mđĭ kyar krĭng ƀuôn sang čar Kon Tum, čar ăt dôk tuôm hŏng lu klei lông dlăng êjai ngă klei mlih mrô hlăm bruă mkŏ mkra krĭng ƀuôn sang mrâo.

 “Bruă thâo săng kơ klei mlih mrô hlăm mkŏ mkra krĭng ƀuôn sang mrâo amâo mâo hrăm mbĭt. Klei thâo mơ̆ng phung mă bruă knŭk kna hluê ngă klei mlih mrô adôk êdu kƀah. Bruă mkŏ mkra, klei hưn mthâo mơ̆ng đa đa să ka djăp ênŭm hnơ̆ng čuăn leh anăn bruă klam mlih mrô”.

Hluê si Đặng Thanh Long, khua kiă kriê Dŭm êpul kreh knhâo leh anăn mrâo mrang čar Kon Tum, kyua bruă duh mkra ala ƀuôn adôk dleh dlan, bruă mlih mrô hlăm bruă lŏ hma leh anăn krĭng ƀuôn sang mơ̆ng čar čiăng găn jih djăp klei kpăk gun, anăn jing bruă ba yua masin ƀiă, ƀiă kdrăp mrâo mrang, klei ngă bruă knŏng knang kơ klei thâo ƀĭng ngă lŏ hma…Bơ̆k bâo kơ dŭm hdră êlan mtrŭt mđĭ klei mlih mrô hlăm bruă lŏ hma mđing truh kơ bruă lŏ hma thâo mĭn, Đặng Thanh Long lač:

 “Êlâo hĭn jing klei hâo hưn čiăng ƀuh klă kơhưm, bruă klam, klei yuôm mơ̆ng klei mlih mrô hlăm bruă mđĭ kyar bruă lŏ hma jing klei êlâo êdei. Mđĭ hnơ̆ng tŭ jăk mnuih mă bruă mâo dŭm gŏ sang ƀĭng ngă lŏ hma, êpul hgŭm bruă, knơ̆ng bruă leh anăn phung knuă druh hgŭm hlăm klei mlih mrô bruă lŏ hma. Mkŏ mjing tur knơ̆ng, yang ƀuôn mrô, klei čih mrô. Klei hrăm mbĭt mơ̆ng bruă kđi čar, dŭm gưl bruă Đảng, knŭk kna, mơ̆ng dŭm knơ̆ng bruă hlăm bruă mkra mjing.”

Truh kơ ară anei, čar Kon Tum mâo 48/86 să jing krĭng ƀuôn sang mrâo, hlăm anăn mâo 7 să krĭng ƀuôn sang mrâo mđĭ hnơ̆ng, 2 să bi hmô. Mbĭt hŏng anăn, čar ăt mâo 21 alŭ ƀuôn krĭng ƀuôn sang mrâo bi hmô, 65/498 ƀuôn mnuih djuê ƀiă ênŭm hnơ̆ng čuăn krĭng ƀuôn sang mrâo. Anei jing tur knơ̆ng yuôm bhăn čiăng kơ čar ngă dŭm hdră êlan mrâo, mbruă, găl guôp mtrŭt mđĭ klei mlih mrô, mđĭ kyar bruă lŏ hma leh anăn mkŏ mkra krĭng ƀuôn sang mrâo.