Msĕ si yăng đar, leh adiê wai băk tlam, čư̆ dliê đuĕ nao kơ ê’iŏ ñăt kriêp, Khua ƀuôn Pùng, să Quang Chiểu, kdriêk Mường lát, čar Thanh Hóa  - jing Lò Văn Hợp pŏk yơh loa bi kčăi asăp iêo jak jih jang mnuih nao hriăm hră.

“Mơ̆ng adŭ hriăm hră mơar anei, lŏ dơ̆ng hâo hưn hŏng mnuih ƀuôn sang: Tal êlâo jing thŭn leh khua, tal dua hlăm ênuk ară anei jing ênuk 4.0 leh, msĕ si klei bi djă yua đĭng blŭ, ti anôk čiăng nao brei thâo čih hră, thâo dlăng hră, wăt hiu hlăm êlan klông, hlăm ƀuôn sang bi thâo hră snăn mnuih ƀuôn sang mơak”.

Êgao kơ 7h tlam, hlăm adŭ hriăm bŏ mnuih leh. Amai Ngân Thị Hướng, sa čô mnuih hlăm adŭ hriăm brei thâo, bruă ñu ară anei jing čhĭ mnia, kyua amâo mâo thâo hră snăn tuôm hŏng lu klei dleh dlan mơh. Tui tiŏ hŏng adŭ hriăm anei kâo kñăm čiăng bi thâo dlăng hră, thâo čih hră:

Phŭn dô dôk kơ sang rông adei, amĭ ama nao pưk hma, knŏng mâo hriăm mă mil adŭ 1 đuič. Knŏng čang hmăng thâo kral boh hră, thâo čih, sitôhmô nao ti anôk bi kuôl ung mô̆ bi thâo čih mơh hlăm angwlop. Hriăm dlăng hră čiăng bi djŏ, nai hmư̆ nai tlao pô hlŏng tlao hĕ mbĭt mơh”.

       Thŭn anei 56 thŭn leh, jing sa hlăm dŭm čô mnuih khua thŭn hĭn hlăm adŭ, Vi Văn Nấm ăt hur har truh hŏng sang hră, gĭt ktĭr hriăm hră mơar, hriăm dlăng hră. Tui si Nấm, hlăk dôk điêt kyua găp djuê dleh dlan, snăn dôk kơ sang rông adei, čiăng kơ amĭ ama nao kơ hma, amâo mâo lŏ truh nao sang hră mơar ôh. Truh ară anei asei leh prŏng leh, knŏng hiu duah ƀơ̆ng, knŏng kƀah jing klei amâo mâo thâo hră mơar, snăn gĭr lŏ tui nao hriăm mâo lĭng kahan mtô:

 “Ƀuh ară anei ăt jing ka hơĭt mơh, khădah mâo leh djăp êsei huă mnơ̆ng čŭt hơô dưn mơh. Phung anak msĕ mơh mđĭ ai kâo brei lŏ nao hriăm čiăng thâo kral boh hră, jĕ hŏng sang mơh mô̆ anak lač msĕ snăn, mtrŭt kâo čiăng bi thâo dlăng hră, thâo čih hră, đăm hêñ ôh nao hriăm mbĭt hŏng lu phung mduôn khua leh sơăi, čiăng bi thâo hră”.

Boh nik, tinei phung hriăm jing phung khua thŭn leh sơăi, êmưt, amâo mâo lŏ êmăt ôh hlăm klei hriăm. Ƀiădah jih jang mnuih ăt mơak tơdah ƀuh phung nai mtô jih ai tiê, čung wĭt čung nao, lu blư̆ tơl hdơr lehanăn tuič. Leh ruĕ mmông hriăm, thâodah mmông mdei bhiâo, phung hriăm lŏ mâo klei bi yăl dliê, snăn asăp blŭ tlao mâo nanao klei mơak mñai, msưh kdŭn jih klei suăi êmăn  leh sa hrue nao pưk hma. Nai mtô Hà Công Thuyên, jing mnuih hlăm êpul ba anăp mơ̆ng êpul lĭng kahan mrô 5 brei thâo, thâo săng kơ klei dleh dlan, klei luič liê mơ̆ng mnuih leh khua thŭn, ƀiădah mâo klei čiăng nao hriăm hră čiăng bi thâo dlăng, thâo čih, snăn ñu amâo mâo uêñ ôh klei suăi êmăn, gĭr truh hŏng adŭ mtô bi hriăm hrue amâodah mlam, hjan amâodah mđiă:        

 “Ƀuh phung khua asei leh gĭr tui hriăm, dôk răk ƀrư̆ ƀrư̆ sa boh hră, snăn phŭn tal êlâo mâo klei kčŭt hlăm ai tiê kâo, lehanăn ênguôt mơh, kyua digơ̆ ka thâo dlăng hră mơar ôh. Ƀuôn sang ară anei hlăk hlê bi mđĭ kyar, snăn hŏng ai tiê bruă klam prŏng, kâo gĭr čiăng kơ phung mduôn khua truh kơ klei thâo dlăng hră, thâo čih hră, ƀiădah khă bi thâo msĕ snăn pliê leh”.

Adŭ lăm lui klei amâo mâo thâo dlăng hră, amâo mâo thâo čih hră kreh mkŏ mjing hlăm dŭm boh ƀuôn jing hlăm krĭng taih kbưi, lehanăn mtô êjai mlam mơh, snăn klei êrô êbat jing dleh dlan, boh nik hŏng dŭm hrue tuôm hŏng klei adiê hlĭm hjan, angĭn êăt, êlan êbhơr, mâo anôk lăn kluh mơ̆ng dlông čư̆. Trung tá Vũ Văn Quang – Khua êpul kiă kriê phung duh mkra mrô 2, mơ̆ng êpul kahan mrô 5 brei thâo, mâo wưng lĭng kahan hlŏng dôk mbĭt hlăm ƀuôn sang lu mlan mtam čiăng đru mtô bi hriăm klei amâo mâo thâo hră mơar, kyua êlan klông dleh dlan. Boh nik, msĕ si thŭn 2023, êjai nao mtô adŭ amâo mâo thâo hră ti ƀuôn Ón, să Tam Chung, knuă druh lĭng kahan hlŏng dôk hlăm ƀuôn, dôk hlăm sang mnuih ƀuôn sang, mtô bi hriăm kơ mnuih ƀuôn sang truh kơ 3 mlan mtam.

Mường Lát jing sa boh kdriêk knông lăn kbưi hĭn hlăm čar Thanh Hóa. Klei hdĭp mda mnuih ƀuôn sang djăp djuê ana tinei dôk tuôm hŏng lu klei dleh dlan, hnơ̆ng ênoh mnuih amâo mâo thâo hră jing lu, boh nik hŏng mnuih khua thŭn. Mơ̆ng klei anăn, hlăm dŭm thŭn giăm anei, kahan răng mgang knông lăn Thanh Hóa lehanăn êpul kahan mrô 5 mâo leh klei bi mguôp hŏng lu să anôk lĭng kahan dôk čiăng mkŏ mjing dŭm boh adŭ lăm klei amâo mâo thâo hră, đru mnuih ƀuôn sang mâo klei thâo săng pioh kơ klei hdĭp mda grăp hrue./.