Knơ̆ng bruă sang čư̆ êa čar Gia Lai mâo leh klei knŭk kna kiă kriê brei đru mdơ̆ng brei sang kơ mnuih ƀuôn sang dôk hlăm sang tĭ rưč, čiăng kơ digơ̆ mâo sang dôk hơĭt. Čar mâo mta kñăm đru ngă truh 3.000 boh sang, lăm lui jih sang tĭ rưč boh nik hŏng mnuih mâo bruă tŭ dưn hŏng cách mạng, gŏ sang ƀun, lehanăn giăm ƀun. Mta kñăm jing čiăng bi leh êlâo kơ mlan 9 thŭn 2025.

Tui si knơ̆ng bruă mnuih mă bruă phung knap mñai čar Gia Lai, mơ̆ng thŭn 2021 truh ară anei, čar mâo đru mdơ̆ng mrâo lehanăn mkra wĭt truh 4.365 boh sang hŏng ênoh bi liê jih jang êbeh 234 êklai prăk. Ƀiădah, leh ksiêm dlăng lŏ ƀuh adôk êbeh 3.000 gŏ sang ƀun, giăm ƀun hlăk dôk čiăng kơ klei đru mdơ̆ng brei sang. Čiăng dưi ngă bruă anei, knơ̆ng bruă sang čư̆ êa čar jao leh kơ knơ̆ng bruă mnuih mă bruă phung knap mñai bi mguôp hŏng dŭm knơ̆ng dhar bruă mâo hdră đru mdơ̆ng sang anei kơ mnuih ƀuôn sang. Mbĭt anăn knơ̆ng bruă rŭ mdơ̆ng mâo bruă klam čuăl mkă mkŏ mjing hdră êlan bi rŭ mdơ̆ng, bi djŏ hŏng klei bhiăn lehanăn kjăp, lehanăn guôp hŏng ênoh prăk bi liê, čiăng kơ mnuih ƀuôn sang bi hrŏng ruah./.