Phung bi ala lehanăn mnuih ƀuôn sang kdriêk Thường Xuân akâo bi mâo klei bhiăn hjăn kơ kdriêk čư̆ čhiăng pioh duh kơ bruă tlaih mơ̆ng ƀun, leh anôk kčah kơ bruă mkŏ mkra krĭng ƀuôn sang mrâo lŏ thiăm mơ̆ng 5 - 10 thŭn. Mnuih ƀuôn sang čang hmăng kơ bruă kƀĭn ala bi mlih, thiăm mbŏ kơ hdră êlan đru kơ phung hđeh, kơ kahan jing mnuih djuê ƀiă.

Mñă klă êpul bi ala bruă kƀĭn ala čar Thanh Hoá mă tŭ jih klei bi êdah anei ba mdah ti anôk bi kƀĭn bruă kƀĭn ala, bruă knŭk kna, lehanăn dŭm phŭn dhar bruă gưl dlông djŏ tuôm mâo klei lŏ ksiêm duah, tui duah hră êlan mghaih msir. Jih jang klei akâo dah dôk hlăm klei dưi alŭ wăl mghaih msir, snăn čar srăng mghaih msir, Khua lăn čar mtă kơ phung khua kiă kriê čar, kdriêk ksiêm dlăng lehanăn mghaih msir jih jang bruă dôk hlăm klei dưi pô knư̆ pral knư̆ jing jăk hĭn, djŏ hŏng klei mnuih ƀuôn sang dôk hmăng hmưi. ƀri wưng anei, êpul grŭp dang kông êlan kbưi Viettel lehanăn knơ̆ng prăk duh mkra mnia mblei mâo mđup brei leh 6 êklai prăk pioh rŭ mdơ̆ng 100 boh sang kơ dŭm gŏ sang dôk hlăm klei dleh dlan klei kơ sang dôk hlăm kdriêk Thường Xuân.