Ktuê êlan lăn đĭ di kbuôn čư̆ jŭm dar alŭ Bar Gŏk, să Sa Thầy, čar Quảng Ngãi, dŭm čuê dluê jŭm dar lŏ hma ăt adôk mtah mda. Alŭ bar Gok ară anei mâo hlăm brô 30 gŏ sang nao hgŭm răng mgang dliê êpul êya. Êngao kơ bruă gak răng, phung hgŭm kreh mtă kơ mnuih ƀuôn sang hlăm ƀuôn amâo dưi koh druôm kyâo dliê, boh nik jing dŭm wăl kriê mrâo đĭ giăm hma pô.

Êngao kiơ mmông nao răng mgang dliê, gŏ sang ayŏng A Phú ti ƀuôn Bar Gok knŏng ngă bruă hma, pla hbei ƀlang leh anăn mdiê. Ayŏng A Phú mĭn, khădah klei hdĭp dleh dlan, ƀiădah ñu leh anăn mnuih ƀuôn sang hlăm ƀuôn čiăng čiăng răng mgang dliê:

 “Grăp hruê kăm êpul pô nao kơ dliê sa blư̆. Lu jing nao tuê djiêo dliê, djiêo hma čiăng dlăng mâo pô bi rai ksĭng mmiă lăn dliê mơ̆. Pô mtă kơ mnuih ƀuôn sang hlăm ƀuôn amâodưi bi rai dliê čiăng djă pioh dliê kơ êdei anăp”.

Ngă bruă răng mgang dliê dăl 14 thŭn, ayŏng Phạm Văn Thắng, Êpul răng mgang dliê Mo Ray, hlăm êpul kriê dlăng dliê Knŭk kna mkuôm Čư̆ Mom Ray dôk nanao hŏng dliê, mưng hŏng dŭm gưl găk rang sui hriê ti krah dliê mkrơ̆ng. Hŏng ñu, bruă ktuê dlăng grăp gru hlăm dliê, ruh mgaih bêč bưi amâodah mă rup hlô mnơ̆ng jing leh bruă aguah tlam.

 “Hmei êbat jơ̆ng hlăm dliê tuôm hŏng djăp mta, sitôhmô čĭm čap, hlô mnơ̆ng amâodah mnuih srăng mă rup. Ară anei hmei dôk yua Smart hŏng dŭm măi mă rup čiăng mdar, mă rup dŭm klei hmăi mơ̆ng anak mnuih amâodah klei êrô êbat kơ hlô mnơ̆ng hlăm dliê. Aguah, tơdah bi klă êlan nao kbưi hmei ba êsei huă, kyuadah đa đa truh kơ mmăt mlam kơ wĭt truh..mâo hruê hmei pĭt hlăm dliê. Sa mlan hmei nao mơ̆ng 15 - 17 hruê”.

Ti krah kdriêl dliê ti dliê Knŭk kna mkuôm Čư̆ Mom Ray, anôk gak răng dliê Mp Ray dôk ti êlan lăn nao mŭt hlăm dliê. yang hruê, đa đa mâo mnuih găn nao pưk hma, ƀiădah truh kơ mmăt mlam jing kriêp mliêp, knŏng anôk mă pui mngač ti pưk điêt mơ̆ng êpul răng mgang dliê. Ayŏng Thao Chương, pô mă bruă răng mgang dliê anôk găk răng Mo Ray brei thâo, kyua anôk gak răng jĕ hŏng anôk pla mjing kyuanăn lu mnuih ƀuôn sang knŏng găn nao pưk hma.

 “Pô dôk siă hŏng anôk ngă hma mơ̆ng mnuih ƀuôn sang kyuanăn thâo klă klei mŭt kbiă hlăm dliê. Lu jing diñu găn nao hma đuč. Mnuih ƀuôn sang tinei mmăt kreh nao mtrang jĭk, ƀêč kkuih, dŭm bruă anei pô mkŏ mjing klei găl kơ diñu. Ƀiădah, čiăng nĕ kơ klei pui ƀơ̆ng dliê hlăm yang bhang, hmei jêñ jêñ hâo hưn kyua mnuih ƀuôn sang găn êrô lu. Hmei găk răng wăt hruê leh anăn mlan, hlei mŭt kbiă ăt čih anăn, aguah mŭt tlam kbiă ăt srăng hưn”.

Dliê Knŭk kna mkuôm Čư̆ Mom Ray ti alŭ wăl knông lăn Yŭ čar Quảng Ngãi, dưi bi hmô msĕ si ksŏ mtah mơ̆ng Lăn Dap Kngư, anôk dôk djă pioh wăl dliê hrông leh anăn lu jơr mnơ̆ng hdĭp yuôm bhăn. Ară anei anôk bruă kiă kriê êbeh 60.636 ha dliê, hlăm anăn mâo 56.249 ha dliê hrông leh anăn 4.400 ha dliê pla.

Êpul kriê dlăng dăp 10 êpul răng mgang dliê ti dŭm să Sa Thầy, Rờ Kơi, Mô Rai, Ya Ly, Sa Loong leh anăn Bờ Y hŏng hlăm brô 70 čô knuă druh, phung mă bruă răng mgang dliê. Kah knar grăp čô klam giăm 1.000ha dliê, jing êbeh 2 blư̆ hŏng klei kčah. Hlăm dŭm gưl ksiêm dlăng, phung kreh knhâo čih yap tinei mâo 1.895 mta kyâo mtâo, hlăm anăn mâo 182 mta mnơ̆ng yuôm hin, dôk hlăm  hră hrah Việt Nam leh anăn tar rŏng lăn. Mnơ̆ng hdĭp ăt lu jơr hŏng 1.005 mta, mâo lu mta hlô mnơ̆ng yuôm hin čiăng dưi kriê pioh.

Dŭm thŭn giăm anei, bruă răng mgang dliê dưi mđĭ hŏng dưn yua kdrăp mă rup leh anăn kdrăp thâo mĭn čiăng ktuê dlăng klei lu jơr mnơ̆ng hdĭp. Lu rup yuôm kơ dŭm mta hlô mnơ̆ng, kra, kgâo, krŭ leh anăn čĭm čap yuôm dưi mâo mă, đru mguôp kơ klei ksiêm duah leh anăn mkŏ mjing hdră kriê pioh. Đào Xuân Thủy, Khua êpul bruă kriê dlăng dliê Knŭk kna mkuôm Čư̆ Mom Ray brei thâo, anôk bruă kiă kriê êbeh 60.000 ha dliê hŏng wăl mnơ̆ng hdĭp lu jơr.

 “Hlăm wưng kơ anăp, hmei lŏ găk răng, ksiêm dlăng dliê, mtrŭt mđĭ bruă hâo hưn mđĭ klei thâo săng êpul êya, ksiêm duah leh anăn ktuê dlăng bi lu jơr mnơ̆ng hdĭp čiăng mâo hdră êlan răng mgang jăk hĭn. Mbĭt anăn, anôk bruă ăt kñăm bi hơĭt klei hdĭp êpul êya, si srăng ngă čiăng kơ mnuih ƀuôn sang mđĭ kyar klei hdĭp mda, srăng hrăm mbĭt răng mgang dliê. Êngao kơnăn, hluê ngă hdră êlan mđĭ kyar bruă hiu čhưn ênguê wăl mnơ̆ng hdĭp čiăng mkŏ mjing bruă mă kơ êpul êya, ăt msĕ mơh hnư hrui wĭt kơ anôk bruă”.