Hŏng êlan bê tông điêt găn alŭ wăl anôk dôk Đại Lộc, ƀuôn hgŭm Bình Thuận, čar Lâm Đồng (êlâo dih jing să Hàm Hiệp, kdriêk Hàm Thuận Bắc, čar Bình Thuận). Dua nah êlan mâo dŭm đang pla ana sungơr bi čuh blang mnga hlăm yan mnga truh. Tơh leh knuh mnga luh ti tur, ăt jing wưng lu gŏ sang atăt anak čô pô lŏ hiu nao mă bruă duah ƀơ̆ng kbưi, lehanăn ƀuăn srăng lŏ bi tuôm kơ sa thŭn êdei. Gŏ sang Trần Thị Nhẽ mâo 8 čô anak. Hŏng ñu grăp phŭn ana sungơr ti gah sang čuh blang jing sa blư̆ ai tiê lŏ ƀhŏk ƀhưn: “Yan mnga ƀuh yơh mnga sungơr blang mơak snăk. Ana mnga sungơr ñu pla msĕ snăn mâo čô anak nao mă bruă kbưi truh giăm Tết lŏ wĭt ênŭm sơăi, jing sa klei mơak snăk.”

Mnga sungơr čuh blang, Tết truh. Mnga sungơr ram, Tết leh ruĕ. Hŏng mnuih pla mnga sungơr ti Hàm Hiệp, ƀuôn hgŭm Bình Thuận, čar Lâm Đồng wưng mmông amâo mâo tĭng hŏng hrue mlan ôh, ƀiădah tĭng hŏng dŭm phŭn mnga sungơr čuh blang.

Gŏ sang Hồ Đắc Thuận, 3 ênuk leh siă suôr hŏng bruă pla ana sungơr, ară anei ñu dôk dlăng kriê truh giăm 1.000 phŭn ana sungơr điêt prŏng hlăm đang pla mjing prŏng giăm 1 ha. Hồ Đắc Thuận ăt dôk hdơr thŭn mlan mơ̆ng grăp phŭn ana sungơr ñu pla, hlăm anăn mâo phŭn êbeh leh  80 năm – jing gru knăl mơ̆ng ênuk ayang aê ñu mphŭn hrie rŭ mjing krĭng lăn anei: “Grăp thŭn msĕ sơăi ƀuh mnga sungơr čuh blang jing truh Tết jih jang mnuih bi mtluk mtlak mơak mñai hŏng thŭn bhang mrâo. Ênuk aê mphŭn dô mâo leh ana sungơr. Dhar kreh pla mjing ana sungơr ƀuôn pô jing sa klei myưng mơang mơh kơ djuê mjeh ana sungơr. Ana sungơr pô pla tinei mâo mơ̆ng 5 truh 18 knuh mnga, mâo mnâo ƀâo mngưi jăk. Grăp thŭn mâo mnuih mơ̆ng Bình Định, Huế, Đà Nẵng, mơ̆ng kwar yŭ hriê truh kơ anei čiăng blei ana sungơr lu snăk.”

Ƀuôn ana sungơr Hàm Hiệp, ƀuôn hgŭm Bình Thuận, čar Lâm Đồng mâo leh dŭm êtuh gŏ sang, mâo dŭm pluh thŭn leh êgâo ăt siă suôr hŏng bruă pla mjing ana sungơr. Tết Nguyên đán Bính Ngọ 2026 đuĕ nao leh, ƀiădah ƀuôn ana sungơr Hàm Hiệp, klei hdĭp mnuih ƀuôn sang kơ anei lŏ wĭt msĕ si aguah tlam, hŏng mnuih pla mjing lŏ dơ̆ng hlăm bruă dlăng kriê, khăt mkra, ksul mbŭ. Grăp blư̆ leh mnga sungơr luh knuh mnga, snăn mdei mơh klei jih jang mnuih hlăm gŏ sang bi kuh kŭm djăp ênŭm, ƀiădah pŏk kơ sa klei đăo knang kơ klei srăng lŏ wĭt hlăm yan mnga thŭn ti anăp./.