Ti krĭng ksĭ Vũng Rô, aguah ưm kŏ yan mnga kčưm hŏng mđiă nah jơ̆ng adiê. Ea poh yă, angĭn thut êđăp ba mbĭt hŏng mnâo msĭn. Kŭm păn suang dlăng mơ̆ng Kđông kahan ƀăng jang knông lăn kdrŭn ksĭ Vũng Rô nao ti êa ksĭ hŏng sa gưl gak răng mrâo. Hŏng phung knuă druh, lĭng kahan tinei, tết amâo mâo kluôm dhuôm dŭm hruê ênŭm ênap hŏng gŏ sang, ƀiădah jiing dŭm gưl gak răng sui, wăt mmăt mlam čiăng kơ ea ksĭ ênang, hang hơĭt. Thượng uý Đỗ Đức Kiên, Khua êpul hiu suang dlăng, kđông kahn ƀăng jang knông lăn Vũng Rô, êpul gĭt gai lĭng kahan knông lăn čar Dak Lak brei thâo:

“Knuă druh, lĭng kahan kđông kahan ƀăng jang knông lăn kdrŭn ksĭ Vũng Rô bi klă nanao ai tiê bruă klam, čŏng pô hur har ngă dŭm hdră êlan, boh nik jing thâo klă boh sĭt hlăm alŭ wăl, hmao bi kdơ̆ng, gang mkhư̆ ƀuah mkra dŭm klei ngă soh hŏng klei êđăp ênang kđi čar, klei êđăp ênang yang ƀuôn. Hŏng kâo jing thŭn tal 4 nao găk răng tết mâo nanao klei hur har, hơ̆k mơak, lui hĕ klei ênguôt kơ gŏ sang, gĭr răng mgang klei êđăp ênang ti alŭ wăl, kyua sa wưng tết hơuh mđao, êđăp ênang kơ mnuih ƀuôn sang.”

Ti krah êa ksĭ, phung lĭng khan grat mtah ăt gĭr hŏng grăp boh kŭm păn, mơ̆ng grăp klei bi knăl điêt, amâo lui kơ sa mta klei arưp aram. Hŏng diñu, răng mgang klei êđăp ênang krĭng  êa ksĭ amâo djŏ knŏng jing bruă klam ƀiădah lŏ jing asăp mtrŭn mơ̆ng ai tiê. Lĭng kahan Trương Huy Hoàng, Kđông kahan ƀăng jang knông lăn kdrŭn ksĭ Vũng Rô lač:

“Hmei ăt ênguôt kơ sang, ƀiădah hmei mưng leh, knŏng krơ̆ng kjă klei êđăp ênang, kŭm păn nao ti êa ksĭ mâo klei găl anăn jing klei hơ̆k mơak akŏ thŭn mơ̆ng hmei. Kâo hơêč hmưi kơ gŏ sang leh anăn jing jang mnuih ƀuôn sang sa wưng tết yâo mơak, mâo klei suaih pral, êđăp ênang, mdrŏng sah”.

Nao mbĭt hŏng bruă klam răng mgang klei dưi kiă kriê, phung lĭng kahan knông lăn lŏ jing anôk knang mơ̆ng phung mă kan hdang grăp blư̆ nao ti êa ksĭ. Mơ̆ng mtô ngă hră mơar, hâo hưn gang mkhư̆ klei mă kan hang IUU, truh kơ klei đru dŏng phung mâo klei truh ti êa ksĭ, rup lĭng kahan knông lăn jing leh jĕ giăm. Hà Thanh Hùng, ti  ƀuôn hgŭm Phú Yên, čar Dak Lak hưn kơ klei khăp plah wah phuñg mă kan hdang leh anăn phung lĭng khan grat mtah:

“Hŏng phung lĭng kahan knông lăn hmei drông diñu mơ̆ng lăn hang truh kơ plao ksĭ, êjai kŭm păn hmei jhat amâodah kƀah mao diñu đru kơ hmei. Bi hŏng dŭm hruê yan mnga ayŏng adei lĭng kahan knông lăn mkŏ mjing djăp klei găl đru kơ phung mă kan hdang, phung dôk ti êa ksĭ msĕ hmei ăt bi đru leh anăn bi mtă mtăn dŭm klei knŭk kna kăm aghă”.

Mbĭt hŏng mđiă mtrang ti anôk êa poh yă, yan mnga mngač hlăm dŭm boh sang mrâo ti krĭng êa lêč Dak Lak mâo lĭng kahan knông lăn đru rŭ mdơ̆ng. Dŭm hruê tết, ai êwa hlăm dŭm boh sang mrâo leh jing mơak êdi. Leh dŭm mlan hruê dleh dlan kyua êa lip lêč, sang mrâo amâo djŏ knŏng jing anôk kơup hjan mgang mđiă, ƀiădah lŏ jing anôk knang kơ mnuih ƀuôn sang lŏ kčưm kơ klei hdĭp. Trần Thế Lâm, alŭ Hiệp Đồng, să Hoà Xuân, čar Dak Lak bi êdah:

“ Hơ̆k mơak êdi,lač jăk kơ Đảng, knŭk kna leh anăn phung lĭng kahan knông lăn đru kơ gŏ sang rŭ mdơ̆ng sang dôk. Amâo mĭn ôh dưi mâo sang msĕ tết thŭn anei, sơnei jing mơak êdi leh.”

Hlăm dŭm hruê yan mnga dôk khŏk ƀăng grăp alŭ ƀuôn krĭng êa lêč Dak Lak, klei hơ̆k mơak lŏ kluôm dhuôm êjai dŭm êtuh boh sang mrâo dưi rŭ mdơ̆ng, hrô kơ dŭm boh sang dlưh rai leh klei yan adiê ngă. Hdră bruă Quang Trung đru kơ kluôm car mkra mđĭ 892 boh sang leh anăn rŭ mdơ̆ng mrâo 606 boh sang, lŏ thiăm anôk knang čiăng kơ mnuih ƀuôn sang bi hơĭt klei hdĭp, drông sâ yan mnga mđao hĭn. Hrăm mbĭt hŏng mnuih ƀuôn sang hlăm hdră bruă anăn, lĭng kahan knông lăn čar Dak Lak jing êpul mâo ƀô̆ mta mơ̆ng hnưm, đru hong ai tiê bruă  klam leh anăn klei khăp. Hưn kơ klei anei, Đại tá Đỗ Quang Thấm, khua bruă kđi čar, lĭng kahan knông lăn čar Dak Lak brei thâo:

“Hmei bi klă anei amâo djŏ knŏng jing bruă klam ti anăp, ƀiădah jing bruă klam sui, bi mguôp hŏng mnuih ƀuôn sang. Hmei srăng lŏ di mguôp hŏng Bruă sang čư̆ êa alŭ wăl čiăng kơ mnuih ƀuôn sang hnưm krŭ wĭt klei mă bruă, bi hơĭt klei hdĭp, bi mguôp hŏng ƀuôn sang, hŏng krĭng knông lăn, mbĭt hŏng lĭng kahan knông lăn răng mgang kjăp klei dưi kiă kriê lăn car, klei êđăp ênang lăn čar.”

Yan mnga mrâo dôk wĭt ti dŭm kŭm păn hlăm êa ksĭ akŏ thŭn, dlông dŭm čuôr sang mrâo rŭ mdơ̆ng, leh anăn dŭm bĭt êlan suang dlăng êpul ba anăn lăn čar. Ti krĭg knông lăn anăn, yan mnga amâo djŏ knŏng hŏng mnga sŭng gơr, mnga đào, ƀiădah hlăm klei đăo knang dưi bi mbŏ, hlăm dŭm klei blŭ tlao hơĭt ai tiê mơ̆ng mnuih ƀuôn sang êjai tết truh, yan mnga wĭt. Leh anăn kyua dŭm klei anăn, yan mnga ti akŏ anôk êa poh yă Dak Lak jing kluôm dhuôm hĭn – yan mnga mơ̆ng bruă klam, mơ̆ng klei khăp lĭng kahan – mnuih ƀuôn sang hơĭt kjăp anôk ba anăp mơ̆ng lăn čar./.