Hlăm dŭm hrue giăm Tết Bính Ngọ 2026, ktuiê dua nah hang krông Đa Nhim, mnuih ƀuôn sang bi pla djam ti dŭm ƀuôn hgŭm D’ran, Ka Đô, Đơn Dương…čar Lâm Đồng dôk mjhĭt m’uăt. Ƀiădah, hrô kơ klei mtluk mtlak hlăm bruă hrui êmiêt djam pioh čhĭ kơ Tết msĕ hŏng dŭm thŭn êlâo, wưng anei mnuih ƀuôn sang lŏ dơ̆ng mkra wĭt lăn, mkŏ êlan đĭgn mđoh êa krih, lehanăn pla mjing djam mtam mrâo.

 Phạm Bích, ti alŭ Đường Mới, ƀuôn hgŭm D’ran brei thâo, hjan êa lip hlăk knhal jih thŭn 2025 ngă leh kơ lu ênhă lăn anôk pla djam ktue dua nah hang krông Đa Nhim tuôm hŏng lŭ lăn kdơr, mâo anôk êa kur jhat jih. Klei lŏ kơrŭ anôk pla mjing djam mtam luič lu hrue ai, lehanăn liê lu ngăn prăk. Êlâo hĭn, lu gŏ sang ruah klei lŏ kơrŭ mjing lăn ala tăp mâo snăn tinăn hlŏng pla mjing djam mtam mtam:

  “Mâo mnuih đa pla su hào, djam bẻi msăm, trŏng msăm, amrêč kkâo tlang. Lehanăn ară anei dôk pla mjing djam salat. Tĭng hlăm brô mlan pŭr mlan sa kơh mâo buč. Snăn ară anei amâo mâo djam čhĭ ôh hlăm wưng Tết kyua djam ka lŏ hmao prŏng ôh”.

Hlăm gưl êa lip hlăk knhal jih thŭn 2025, ƀuôn hgŭm D’ran jing sa hlăm dŭm alŭ wăl tuôm hŏng klei luič rai prŏng mơ̆ng krĭng pla mjing djam mtam Đơn Dương hŏng giăm 300ha djam mtam tuôm hŏng klei êa ngă. Trương Quang Kiên, K’iăng khua knơ̆ng bruă sang čư̆ êa ƀuôn hgŭm D’ran brei thâo; hlăm klei lŏ kơrŭ wĭt anôk pla mjing djam mtam, bruă sang čư̆ êa alŭ wăl mđrăm mbĭt hŏng mnuih ƀuôn sang, lŏ mbŏ lăn hlăm dŭm anôk êa kur, lŏ mjut mjing lăn. Mbĭt anăn, ƀuôn hgŭm akâo mơh kơ hdră êlan đru čiăng kơ mnuih ƀuôn sang pral lŏ kơrŭ wĭt bruă pla mjing:

 “Gưl bruă Đảng, bruă sang čư̆ êa mâo leh klei iêo mthưr lehanăn mă bruă hŏng dŭm boh knơ̆ng prăk mjing klei găl kơ mnuih ƀuôn sang mâo čan prăk kñăm lŏ kơrŭ wĭt bruă pla mjing leh klei êa lip lêč. Gưl bruă Đảng, bruă sang čư̆ êa alŭ wăl mđĭ ai leh mnuih ƀuôn sang lŏ mkra wĭt anôk ala, pioh mâo anôk pla mjing bi djŏ hŏng yan, dŭm mta djam mtam pioh čhĭ mnia. Truh kơ ară anei, bruă lŏ kơrŭ wĭt leh gưl yan adiê ngă mâo mjut mjing leh truh êbeh 70%”.

Khădah yan Tết anei, lu gŏ sang hlăm krĭng phŭn anôk pla mjing djam mtam ti   Đơn Dương amâo mâo djam ba čhĭ ôh, ƀiădah hlăm kdrăn anôk pla mjing jing anôk tuôm găn leh klei êa kur, lăn kdơr, hlăk hlê dơ̆ng êdah dŭm klei mtah mda mơ̆ng djam mrâo lŏ pla. Anăn yơh jing klei bi knăl kơ klei lŏ kơrŭ wĭt, pŏk sa klei čang hmăng mrâo kơ dŭm yan pla mjing tinăp hlăm klei mơak mñai prăl lŏ kơrŭ wĭt hŏng mnuih pla mjing djam mtam hlăm anôk phŭn ti čar Lâm Đồng.