Ti kdrŭn ksĭ Đông Tác hlăm ƀuôn hgŭm Phú Yên, čar Dak Lak, 22 boh kŭm păn trah mă kan hdang mŏng êa ksĭ truh ti kdrŭn, ba wăt dŭm pluh ton kan ngư êa ksĭ čiăng čhĭ kơ dŭm anôk bruă duh mkra kan hdang. Kah knar grăp boh kŭm păn mâo mă mơ̆ng 50 -70 drei kan ngư êa ksĭ, bi knar mơ̆ng 2,5 - 3 ton kan. Msĕ si kŭm păn Phùng Hồng Ánh ba wĭt 90 drei kan ngư. Kŭm păn Bùi Văn Xông mâo mă êbeh 70 drei. Ênoh kan ngư kñĭ akŏ thŭn mâo dŭm anôk bruă duh mkra mnia blei hrui blei êbeh 100 êbâo prăk/kg, bi knar hŏng dŭm thŭn êlâo.

 Hnơ̆ng lu, ênoh kan hơĭt, phung trah mă kan mâo prăk hrui wĭt lu. Bùi Văn Xông, ƀuôn hgŭm Phú Yên, čar Dak Lak mơak brei thâo:

“Thŭn anei boh klei trah mă kan găl ênưih kơ mnuih ƀuôn sang, ƀuh ăt mơak mơh, mrâo mŭt snăn sa boh kŭm păn mâo kjuh, sa păn pluh drei kan snăn mni kơ yang adiê leh. Hnơ̆ng snăn jăk leh. Ênoh ăt hơĭt mơh”.

Pô mgăt kŭm păn mâo prăk mnga, phung hlăm kŭm păn ăt mâo prăk hrui wĭt lu mơh, mâo prăk bi liê hlăm gưl tết Bính Ngọ. Pô trah mă kan Phạm Đắc Dũng,  wăl 4, ƀuôn hgŭm  Phú Yên mơak :

"Thŭn anei găl jăk, angĭn êđăp, kan kbiă. Pô nao dua hruê snăn mâo 2 ton kan êbeh mơh, mbha hlăm brô 15-16 êklăk prăk. Ayŏng adei mă bruă tŭ jing, mâo prăk hrui wĭt jăk”.

Msĕ si yang đar, mơ̆ng akŏ mlan 12 hlue mlan ƀlĕ truh mlan sa jing wưng kan ngư êa ksĭ mâo lu. Leh gưl angĭn êbŭ, êa ksĭ ñăt, kan ngư mâo lu đru kơ mnuih ƀuôn sang trah mă kan mâo hnơ̆ng lu, kyua anăn mnuih ƀuôn sang mâo kklei mđĭ ai  nao trah mă kan hdang hlăm dŭm hruê Tết leh anăn drông mlam yan mnga mrâo hlăm êa ksĭ. Sa čô trah mă kan hdang brei thâo:

“Leh mkă leh kan, phung trah mă kan hdang khăng mdei hlăm brô 1 hruê kăm leh anăn mnuih ƀuôn sang lŏ dơ̆ng nao trah mă kan, ƀơ̆ng tết hlăm êa ksĭ, kyua hlăm sa thŭn knŏng dŭm mlan anei jing mâo yan  kan  lu”.

Mnuih ƀuôn sang ăt čang hmăng hlăm thŭn mrâo 2026 bruă lŏ hma čar Dak Lak mjing klei găl lui hdră kčah tin nhắn leh anăn hrô hŏng klei ksiêm dlăng čiăng găl ênưih kơ mnuih ƀuôn sang hlăm hră mơar đru êa xăng êa pui mơ̆ng Knŭk kna. Đặng Cu Em, Khua mgăt kŭm păn mrô PY91008TS brei thâo:

"Hŏng kdrăp nhắn tin êbeh pluh thŭn ară anei sô jih leh, čih amâo lŏ djăp ôh.  Kyua anăn čiăng kơ bruă djŏ tuôm brei lui hĕ bruă nhắn tin, yua hŏng kdrăp ktuê dlăng hdră êlan mnuih ƀuôn sang”.

Dŭm hruê tết Bính Ngọ giăm truh ăt jing hlăk dŭm kdrŭn ksĭ trah mă kan mtluk mtlak mơak mñai kŭm păn êrô nao. Mnuih ƀuôn sang čang hmăng sa thŭn mrâo yan adiê găl jăk, kan ktrŏ ñuăl bŏ kŭm păn, hră kñĭ Ơ Rôp dưi lăm lui čiăng kơ ênoh kan ngư ba čhĭ kơ ala tač êngao dưi đĭ, đru kơ mnuih ƀuôn sang trah mă kan hlăm êa ksĭ kbưi dưi ƀiă klei dleh dlan leh sa thŭn găn lu klei yan adiê ngă, êa lip lêč. Thŭn mrâo jih jang hrăm mbĭt ba bruă trah mă kan mơ̆ng čar Dak Lak đĭ kyar kjăp./.