VOV4.Êđê- Ƀuôn prŏng Ƀuôn Ama Thuôt, čar Dak Lak jing sa hlăm dŭm ƀuôn prŏng mâo hnơ̆ng luôm ana kyâo mtah lu êdi hlăm kluôm ala, êbeh 8m2/čô. Hdră pla ana kyâo mtah mơ̆ng Ƀuôn Ama Thuôt mjing sa wăl anôk năng hdĭp êdi kơ mnuih ƀuôn sang lehanăn mjing gru kruăk jăk siam hŏng phung tuê hiu čhưn ênguê. Ana kyâo mtah mơ̆ng Ƀuôn Ama Thuôt hruê anei jing boh tŭ dưn mơ̆ng dŭm pluh thŭn mđing kơ bruă pla, dlăng kriê lehanăn bruă anei hlăk dưi bơ̆k bâo, mđĭ lar nanao hlăm dŭm bruă ngă, hdră mtrŭn mđĭ kyar ƀuôn prŏng truh ti thŭn 2030, hnơ̆ng trah dlăng truh ti thŭn 2045.

Dŭm hruê akŏ thŭn mrâo, amai Nguyễn Thị Loan mbĭt hŏng 5 čô mă bruă mkăn mơ̆ng êpul 2, knơ̆ng bruă wăl hdĭp mda Osaka lŏ nao bi mdoh, bi msiam wăl mnga ti anôk knưng rup Awa Hô hŏng phung hđeh êlăk, êlan Lê Duẫn, ƀuôn prŏng Ƀuôn Ama Thuôt. Hŏng lu mnuih ƀuôn sang, phung mă bruă msĕ si amai Loan klă klơ̆ng jing phung thâo mbruă, phung mă bruă hŏng jih ai tiê, diñu jing phung rơ̆ng klei siam. Răng kriê leh anăn rang mgang klei siam wăl ƀuôn prŏng. Kdlưn hĭn hŏng jih jang, amai Loan hơ̆k mơak sơnăk kyua dŭm klei đru mguôp mơ̆ng phung amai adei hlăm êpul mâo mnuih ƀuôn sang čih yap.

“Lač klă, ngă klei bi msiam brei pô mkăn dlăng, diñu hriê ti nei dưi ƀuh leh anăn mni siam hmei mâo leh klei mơak. Kâo ăt ƀuh klei mơak kyua klei doh siam, lu mnuih hriê ti nei. Thŭn mrâo, hmăng hmưi klei ruă tưp găn hĕ, jih jang hơ̆k mơak bi tuôm”

Hŏng hnŏng trah dlăng, hdră vvưal mkă klă klơ̆ng leh anăn klei mđing dlăng djŏ hnơ̆ng, Ƀuôn Ama Thuôt hlăk ƀrư̆ dưi mkŏ mjing čiăng năng jing ƀuôn prŏng phŭn krĭng Lăn Dap Kngư

Kčưm hlăm thŭn 2022, klei ruă tưp Covid-19 ti ƀuôn prŏng Ƀuôn Ama Thuôt mâo leh klei hrŏ, klei hdĭp ƀrư̆ ƀrư̆ nao hlăm wưng klei aguah tlam mrâo. Êđăp ênang êbat jơ̆ng mjuăt asei mlei hruê akŏ thŭn mrâo ti war mnga Sơn La anăp sang, Trần Đức Hoà dôk ti êlan Y-Ơn, ƀuôn hgŭm Tân Thành, ƀuôn prŏng Ƀuôn Ama Thuôt hơ̆k mơak sơnăk kyua mâo knŭk kna duh bi liê kơ bruă anei. Ñu brei thâo, mơ̆ng lăn huâng hŏng lu bruă amâo jăk, ară anei jing war mnga siam leh anăn mâo boh tŭ dưn yuôm bhăn hĭn leh jih klei ruă tưp:

 “Mnuih ƀuôn sang mâo klei mơak sơnăk, mâo anôk kơ mnuih ƀuôn sang, phung hđeh điêt hlăp lêñ, mdei msăn leh hruê mmông mă bruă. Anei jing ksŏ ƀuôn prŏng leh anăn alŭ wăl anei. Kâo ăt nao leh hlăm lu anôk, ƀiădah ƀuh ƀuôn prŏng Ƀuôn Ama Thuôt mâo ana kyâo mtâo siam hĭn hlăm ala čar. Knŭk kna ăt mâo klei uêñ mĭn, duh bi liê lu, ƀuôn prŏng ngă jăk bruă anei, mâo klei čuăl mkă jăk.”

Kbiă hriê mơ̆ng klei bi blah leh anăn asăp ƀruih lăn hrah, hlăm anăn mâo wưng Ƀuôn Ama Thuôt dưi truh kơ klei đĭ kyar hĭn. Sa kjhiêt ƀuôn prŏng, sa tŏ mnga, wăl mnga čiăng bi êdah klei mĭn đĭ kyar mtah, mđĭng truh klei jăk kơ yang ƀuôn. Ba anak mniê êbat hiu hlăm akŏ thŭn mrâo, amai Trần Thị Yến, ƀuôn hgŭm Tự An, ƀuôn prŏng Ƀuôn Ama Thuôt ƀuh klei mơak kyua dŭm mta ana kyâo mtah leh anăn war mnga, wăl mnga msĕ hŏng dliê ti krah ƀuôn prŏng:

 “Ti ƀuôn prŏng Ƀuôn Ama Thuôt kâo ƀuh lu war mnga, ana kyâo mtah. Boh nik jing dŭm bĭt êlan ana kyâo mtah jing lu êdi, ñu bi doh asăp êwa ti nei, kâo ƀuh mâo klei hdĭp êđăp ênang, hdĭp ti nei kâo ƀuh klei jăk êdi.”

Mkŏ mjing “ƀuôn prŏng mtah” wăt kơ êlan klông hlăm ƀuôn prŏng, wăl mnga leh anăn hlăm grăp anôk bruă, dhar bruă, grăp gŏ sang, ƀuôn êlan. Dŭm anôk bruă knŭk kna êjai mrâo mkra mjing, mkra wĭt mâo klei mđing kơ ana kyâo mtah êlâo leh anăn lŏ pla thiăm ana kyâo mrâo. Bi kơ dŭm ƀuôn hlăm ƀuôn prŏng, ana kyâo mtah jing mta phŭn čiăng mâo klei kruăk knăl dhar kreh djuê ana krĭng Lăn Dăp Kngư.

Grăp anôk ƀuôn prŏng, đang mnga, wăl tač bi êdah klei mĭn mđĭ kyar mtah, mđing truh kơ klei tŭ dưn êpul êya

 Võ Kỳ, K’iăng khua adŭ bruă ksiêm dlăng wăl ƀuôn prŏng Ƀuôn Ama Thuôt brei thâo, hluê si hdră mtrŭn mơ̆ng bruă kƀĭn ala kơ bruă mbha gưl ƀuôn prŏng, bi hŏng wăl ƀuôn prŏng mta I hlăm čar, ênhă lăn pla mjing ana kyâo mtah hlăm alŭ wăl ƀuôn prŏng mâo mơ̆ng 5 – 6m²/ čô. Êjai anăn, hnơ̆ng ana kyâo mtah hlăm alŭ wăl ƀuôn prŏng Ƀuôn Ama Thuôt truh kơ jih thŭn 2021 mâo leh 8,11m²/ čô leh anăn kluôm ƀuôn prŏng jing 17,4m²/ čô. Hŏng boh tŭ dưn msĕ sơnei, ƀuôn prŏng Ƀuôn Ama Thuôt ară anei jing sa hlăm dŭm ƀuôn prŏng mâo ana kyâo mtah lu hĭn hlăm ala čar. Sa ai hŏng hdră 1 êklăk ana kyâo mtah mơ̆ng knŭk kna, thŭn leh êgao, ƀuôn prŏng ăt hur har mkŏ mjing leh anăn boh tŭ dưn dưi pla êbeh 6.000 phŭn ana kyâo mtah. Mta kñăm hlăm thŭn 2022 srăng lŏ pla thiăm hŏng dŭm mta ana kyâo mâo mơ̆ng đưm hlăm alŭ wăl krĭng Lăn Dăp Kngư:

 “Ară anei bruă pla mjing ana kyâo mtah hlăm wăl mnga, war mnga hlăm alŭ wăl ƀuôn prŏng Ƀuôn Ama Thuôt lu jing dŭm mta ana kyâo mâo mơ̆ng đưm ti alŭ wăl, mâo mă ti ƀuôn prŏng Ƀuôn Ama Thuôt leh anăn wăt kơ krĭng Lăn Dăp Kngư anei mơh. Yua dŭm mta ana kyâo msĕ si ana kčĭk, ana ktê, ana asăn amâodah ana knia, anei jing dŭm mta ana kyâo hmei đru kcĕ leh hŏng bruă Đảng ƀuôn prŏng, bruă sang čư êa pla mjing hlăm ƀuôn prŏng.”

Mnuih ƀuôn sang lŏ mkra đang mnga ti Knưl Awa Hồ hŏng phung hđeh ti êlan Lê Duẩn

Vũ Văn Hưng, khua bruă sang čư êa ƀuôn prŏng Ƀuôn Ama Thuôt brei thâo, čiăng mkŏ mjing ƀuôn prŏng mtah msĕ si ară anei, mơ̆ng lu thŭn êgao, dŭm gưl khua gĭt gai čar, ƀuôn prŏng mâo klei kñăm leh anăn klei thâo ƀuh, mâo hdră čuăl mkă mđĭ kyar mtah. Truh kơ ară anei, hdră tă anăn ăt dôk dưi bi lar čiăng mkŏ mjing ƀuôn prŏng Ƀuôn Ama Thuôt jing wăl ƀuôn prŏng hdĭp mda, mâo knhuah gru leh anăn mâo mrang hluê si klei bi klă mrô 67 mơ̆ng phŭn bruă kđi čar kơ bruă mkŏ mjing leh anăn mđĭ kyar ƀuôn prŏng Ƀuôn Ama Thuôt truh thŭn 2030, hdră tă truh thŭn 2045. Hluê si hdră ngă bruă tui ngă hdră mtrŭn mơ̆ng klei kƀĭn kluôm bruă Đảng ƀuôn prŏng tal 15, wưng păn bruă 2020 -2025, ênhă lăn pla mjing ana kyâo mtah hlăm wăl ƀuôn prŏng truh kơ knhal jih wưng păn bruă srăng đi truh 9m²/čô. Anei jing bruă klam dleh dlan êjai ênoh mnuih ƀuôn sang đĭ leh anăn lăn huâng, ngăn prăk mâo ƀiă, ƀiădah ƀuôn prŏng mâo klei đăo knang srăng mâo dŭm hdră êlan, hdră tă klă klơ̆ng.

 “Mta kñăm mơ̆ng ƀuôn prŏng jing lŏ mđĭ hĭn, êbeh 9m²/čô hlăm wăl ƀuôn prŏng leh anăn 18m²/čô hlăm kluôm ƀuôn prŏng. Ƀiădah klei mđĭ jing dleh êdi kyua ênoh mnuih ƀuôn sang đĭ leh anăn ênhă lăn pla mjing ana kyâo mtah ƀrư̆ hruê ƀrư̆ hrŏ. Kyuanăn čiăng iêo mthưr phung knuă druh, mnuih mă bruă knŭk kna grăp thŭn srăng ngă bruă pla mjing ƀiă êdi sa phŭn ana kyâo hlăm sa čô. Leh anăn dŭm wăl ƀuôn prŏng mrâo srăng brei phung duh bi liê dŭm wăl mnga, jih jang wăl mnga srăng mâo klei duh bi liê hrăm mbĭt.”

Hŏng hdră tă, hdră čuăl mkă klă klơ̆ng leh anăn klei uêñ mĭn duh bi liê djŏ hnơ̆ng, ƀuôn prŏng Ƀuôn Ama Thuôt ƀrư̆ ƀrư̆ dưi mkŏ mjing wăl ƀuôn prŏng krah krĭng Lăn Dăp Kngư. Hlăm dŭm klei tŭ jing mơ̆ng ƀuôn prŏng, klei êdah hĭn dưi bi klă jing ana kyâo mtah dưi bi hmô msĕ hŏng dliê hlăm ƀuôn prŏng, mkŏ mjing anôk hdĭp mda kơ mnuih ƀuôn sang leh anăn iêo mthưr lu phung tuê hiu čhưn ênguê.

Pô mblang: Y-Ƀel Êban