VOV4.Êđê- Hluê ngă klei gĭt gai mơ̆ng Knŭk kna ăt msĕ mơh Knơ̆ng bruă sang čư̆ êa čar Dak Lak “kñăm mdrơ̆ng êđăp ênang, mbruă, ktuê dlăng tŭ dưn klei ruă Covid-19”, Knơ̆ng bruă sang čư̆ êa ƀuôn prŏng Ƀuôn Ama Thuôt mtrŭn hră mơar mjêč ba yua dŭm hdră msir mdrơ̆ng hŏng klei ruă tưp mrâo, mphŭn mơ̆ng 6h aguah hruê 30-4 êla truh mâo klei hưn mthâo mrâo. Hluê anăn, dưi lŏ ngă bruă hlăm sang, hlăm wăl tač amâo êbeh 30 čô mnuih hlăm sa wưng, kƀĭn ti gŭ 50 čô hŏng klei găl mâo 90% ênoh mnuih dưi nao brei tlŏ ênŭm vaccin amâodah hlao leh klei ruă Covid-19 amâo êbeh 6 mlan; phung hgŭm brei hluê ngă 5 Mta klei mtă mơ̆ng Phŭn bruă mdrao mgŭn leh anăn dôk bi kbưi 2 met.

Hŏng hdră bruă amâo čiăng êdi ka dưi lŏ brei ngă bruă ôh; hjăn dŭm anôk khăt ƀuk, anôk mdah phin dưi lŏ wĭt ngă bruă ƀiădah brei hluê ngă dŭm hdră gang mkhư̆ klei ruă tưp. Phung khăt ƀuk brei tlŏ ƀiă êdi sa aruăt vaccin, hlao klei ruă Covid-19 amâo êbeh 6 mlan, dưi khăt ƀuk amâo êbeh kơ 3 čô hlăm sa wưng. Rơ̆ng dôk bi kbưi 2 met, amâo pŏk ôh masin bi êđăp.

Pô mblang: H’Zawut Ƀuôn Yă