VOV4.Êđê- Aguah hruê 1/12, ti ƀuôn prŏng Kon Tum, Anôk bruă sang čư̆ êa čar Kon Tum mkŏ mjing leh Knăm tŭ mă kdrăp mnơ̆ng yua hlăm bruă mdrao mgŭn kñăm gang mkhư̆ klei ruă Covid 19 mâo čar Bình Dương mđup brei. Hŏng klei dưi brei mơ̆ng Anôk bruă Đảng čar, Anôk bruă sang čư̆ êa čar Bình Dương, bi ala Anôk bruă mặt trận čar Bình Dương lehanăn Knơ̆ng bruă mdrao mgŭn čar Bình Dương mđup brei leh kơ čar Kon Tum dŭm kdrăp mnơ̆ng yua đru kơ čar gang mkhư̆ klei ruă COVID-19, mâo: 200 boh jhưng đih msei tĩnh điện, 100 kdrăp masin mjing êwa oxy, 200 kdrăp masin ksiêm dlăng SPO2 lehanăn 520 kdrăp ksiêm dlăng hnơ̆ng hlơr asei mlei.

Truh kơ ară anei, čar Kon Tum mâo êbeh 600 čô mnuih ruă Covid 19, hlăm anăn mâo 44 čô ruă hlăm êpul êya lehanăn ka mâo mnuih ruă dôk ti hnơ̆ng 2,3. Mrâo êgao, čar Kon Tum tiŏ nao leh 30 čô mă bruă mdrao mgŭn đru kơ Bình Dương mdrơ̆ng hŏng klei ruă tưp. Nao hgŭm hlăm bruă kriê dlăng, tui ksiêm hdră dŏng mdrao mnuih ruă F0 jing klei hriăm yuôm bhăn mâo anôk bruă mdrao mgŭn mơ̆ng čar pŏk hluê ngă ti dŭm anôk mdrao mgŭn./.

Pô mblang: H’Nêč Êñuôl