VOV4.Êđê- Hlăm tlam mbrue (13/12), ti sang bruă kƀĭn ala Dhŭng Korea, ƀuôn prŏng phŭn Seoul, knăm drông Khua bruă kƀĭn ala Vương Đình huệ, lehanăn Êpul bi ala gưl dlông bruă kƀĭn ala Việt Nam mkŏ mjing leh kdrăm k’ah mâo khua bruă kƀĭn ala Dhŭng Korea Park Byeong Seug. Leh klei drông, Khua bruă kƀĭn ala Vương Đình Huệ mâo leh klei bi trông. lehanăn Khua bruă kƀĭn ala Dhŭng Korea Park Byeong Seug mbĭt hŏng êpul gưl dlông bruă kƀĭn ala dua ala čar mâo leh klei bi trông. Dua Khua kiă kriê lač, khădah dôk găn klei ruă tưp Covid 19 dleh dưi ksiêm dlăng, ƀiădah klei bi mguôp dua ala čar mâo nanao klei đĭ kyar hlăm lu mta, boh nik klei hgŭm hlăm bruă kđi čar, bruă duh mkra, bruă răng mgang klei êđăp ênang, lehanăn klei bi mjĕ êrô phung ƀuôn sang dua ala čar. Dua nah sa ai hŏng hdră êlan bi mguôp kluôm ênŭm Việt Nam – Dhŭng Korea, ƀri bi hdơr 30 thŭn hrue mkŏ mjing klei mjĕ mgiăm dua ala čar. Khua bruă kƀĭn ala Vương Đình Huệ čang hmăng kơ Dhŭng Korea đru hdră êlan mđĭ kyar bruă duh mkra, hlăm anăn mâo klei mđĭ kyar mtah, mlih mrâo hŏng klei knhăk. Dua nah bi tŭ ư mđĭ ênoh bi mnia mblei truh 100 êklai dolar hlăm thŭn 2023, lehanăn 150 êklai dolar hlăm thŭn 2030./.

Pô mblang: Y-Khem Niê