VOV4.Êđê - Aguah hruê 21/12, ti să knông lăn Ia Lôp, kdriêk Êa Sup, čar Dak Lak, bi ala Knơ̆ng gĭt gai lĭng kahan čar bi hgŭm hŏng Anôk bruă sang čư̆ êa alŭ wăl, phung đru brei mkŏ mjing knăm Ba yua Anôk bruă mdrao mgŭn lĭng kahan, đru kơ hdră duh ƀơ̆ng lehanăn mđup brei mnơ̆ng; ksiêm mkă dlăng klei ruă lehanăn mbha êa drao amâo mă prăk kơ mnuih ƀuôn sang krĭng knông lăn. Anei jing bruă dôk hlăm hdră bi hdơr 77 thŭn hruê mkŏ mjing Lĭng kahan yang ƀuôn Việt Nam lehanăn hruê m’ak jih jang mnuih ƀuôn sang răng mgang klei êđăp ênang 22/12.

Hluê si Thượng tá Phạm Minh Tuyên – K’iăng khua knơ̆ng gĭt gai lĭng kahan răng mgang knông lăn čar Dak Lak, ară anei, êpul êya dôk răng mgang êlan knông lăn êbeh 73 km, hŏng 4 să hlăm 2 kdriêk Êa Sup lehanăn Ƀuôn Đôn, giăm 42% ênoh mnuih jing mnuih ƀuôn sang djuê ana ƀiă. Hŏng klei đua klam đru kơ mnuih ƀuôn sang, mkŏ mkra kdrăp hdră bruă răng mgang klei êđăp ênang hlăm mnuih ƀuôn sang, lĭng kahan răng mgang knông lăn čar Dak Lak mkŏ mjing leh lu hdră bruă đru kơ yang ƀuôn, đru mđĭ kyar bruă duh mkra lehanăn kriê dlăng klei suaih pral./.

H’Nêč pô mblang