VOV4.Êđê - Hruê 22/11, ti Wăl knhuah gru Sang krư̆ kđăl Ƀuôn Ama Thuôt, bruă Đảng čar, Êpul gơ̆ng bruă mnuih ƀuôn sang, Anôk bruă sang čư̆ êa, Dhar bruă mặt trận čar Dak Lak mkŏ mjing leh Knăm čuh brui mngưi bi hdơr 81 thŭn Hruê mkŏ mjing bruă Đảng čar Dak Lak  (23-11-1940 – 23-11-2021). Ti knăm anei, phung bi ala lŏ bi hdơr leh kơ ktuê êlan hƀuê ênuk kdrưh k’ăm mơ̆ng bruă Đảng čar Dak Lak hlăm 81 thŭn mkŏ mjing lehanăn đĭ kyar.

Mơ̆ng knhal jih thŭn 1940, anôk bruă Đảng Cộng sản tal êlâo ti Dak Lak dưi mkŏ mjing ti Sang krư̆ kđăl Ƀuôn Ama Thuôt, truh kơ ară anei, bruă Đảng čar Dak Lak mâo 20 êpul bruă hgŭm, êbeh 700 êpul bruă Đảng, hŏng êbeh 83 êbâo čô Đảng viên. Ti knăm čuh brui mngưi bi hdơr 81 thŭn Hruê mkŏ mjing bruă Đảng tal êlâo ti čar Dak Lak, bi ala phung khua kiă kriê anôk bruă Đảng lehanăn mnuih ƀuôn sang dŭm djuê ana hlăm čar bi êdah klei gĭr srăng mđĭ lar knhuah gru hƀuê ênuk kdrưh k’ăm, lŏ dơ̆ng mlih mrâo hlăm klei thâo săng lehanăn bruă ngă, ba yua jih ai dưi, klei mâo, mtrŭt mđĭ kyar bruă duh mkra – ala ƀuôn, mkŏ mkra Dak Lak ƀrư̆ hruê ƀrư̆ mdrŏng sah, đĭ kyar, jiă knhuah djuê ana./.

H’Nêč pô mblang