VOV4.Êđê - Hlăm wưng êgao, mặt trận čar kwar dŭm gưl čar Dak Lak pŏk ngă leh lu bruă ngă klă sĭt kñăm iêô jak dŭm gưl mnuih ƀuôn sang hrăm mbĭt đru gang mkhư̆ klei ruă tưp. Mơ̆ng anăn, đru mguôp mbĭt hŏng gưl bruă Đảng, bruă sang čư̆ êa alŭ wăl leh anăn jih jang mnuih ƀuôn sang msưh kdŭn klei ruă tưp, rơ̆ng klei suaih pral êpul êya

Leh hruê mmông kwang dar čiăng đru kơ bruă gang mkhư̆ klei ruă tưp Covid-19, klei hdĭp mnuih ƀuôn sang ti Ƀuôn Tơ̆ng Jŭ, să Ea Kao, ƀuôn prŏng Ƀuôn Ama Thuôt lŏ wĭt leh hlăm wưng klei aguah tlam mrâo, ƀri hlăm hruê mmông hrui pĕ kphê.  H’Yam Ƀuôn Krông, khua ƀuôn Tơ̆ng jŭ yăl dliê: Hlăk anăn jing akŏ mlan 10, hlăm ƀuôn mâo êpul mnuih ruă hŏng dŭm êtuh čô, Ƀuôn Tơ̆ng Jŭ mâo êbeh 440 gŏ êsei, hŏng 2.200 čô ngă klei bi ktlah, kwang dar. Kyua klei ngă bruă hrăm mbĭt, sa ai mơ̆ng dŭm gưl bruă, dhar bruă leh anăn klei hur har ngă bruă mơ̆ng êpul Covid yang ƀuôn, mnuih ƀuôn sang mâo klei hơĭt ngă klei bi ktlah, ngă djŏ dŭm hdră bhiăn hlăm bruă gang mkhư̆ klei ruă tưp Covid-19. Kyua klei bi mguôp, klei sa ai mơ̆ng mnuih ƀuôn sang dưi đru kơ ƀuôn sang dưi mkhư̆ leh klei ruă tưp, ba wĭt klei hdĭp msĕ yăng đar. Mơ̆ng gưl čar truh kơ gưl nah gŭ, lu phung mâo ai tiê kmah, phung đru kơ mnuih ƀuôn sang hlăm hruê mmông dôk bi ktlah. Êpul covid yang ƀuôn hlăm ƀuôn mâo 17 čô ngă bruă hŏng klei hur har, đru kơ mnuih ƀuôn sang mơ̆ng klei huă ƀơ̆ng truh kơ bruă duh mkra msĕ si: čiêm brei ŭn, êmô, mnŭ ada. Kyuanăn mnuih ƀuôn sang mâo klei hơĭt dôk bi ktlah ti sang. Ară anei  dưi lŏ wĭt msĕ si aguah tlam leh, ƀiădah ăt ngă nanao bruă hâo hưn, mtă kơ mnuih ƀuôn sang ngă jăk bruă gang mkhư̆ klei ruă tưp.

Hlăm kluôm čar Dak Lak, dŭm êpul hlăm alŭ, ƀuôn dưi hrăm mbĭt leh hŏng dŭm êpul čŏng ngă bruă, nao hgŭm hlăm bruă gang mkhư̆ klei ruă tưp. Truh kơ ară anei ăt dôk dưi rơ̆ng 4.128 êpul covid yang ƀuôn hlăm 15 kdriêk, wăl krah, ƀuôn prŏng. Kmeh gơ̆ng jing phung knuă druh bruă mặt trận, êpul êya alŭ wăl. Bruă klam mơ̆ng dŭm êpul covid yang ƀuôn jing ksiêm dlăng dŭm čô mrâo wĭt mơ̆ng anôk mâo klei ruă tưp, ngă klei bi ktlah ti sang, hâo hưn, mtrŭt mjhar mnuih ƀuôn sang ngă djŏ dŭm hdră êlan gang mkhư̆ klei ruă tưp. H’Kim Hoa Ƀyă, khua êpul čung ba mnuih ƀuôn sang, khua gĭt gai mặt trận čar Dak Lak brei thâo, êngao kơ bruă bi kna dŭm bruă gưl nah gŭ, mặt trân lŏ bi lar bruă klam hlăm bruă iêo mthưr ai dưi đru kơ bruă gang mkhư̆ klei ruă tưp ti anôk anăn, mkŏ mjing dŭm klei bi hmô jăk, hŏng klei mbruă kñăm đru kơ dŭm êpul êya ba anăp bruă gang mkhư̆ klei ruă tưp. “Dưi bi lar ai tiê bi khăp, bi pap hlăm yang ƀuôn, boh nik grăp čô leh anăn grăp gŏ sang srăng mâo bruă klam hĭn hlăm bruă gang mkhư̆ klei ruă tưp. Tal 2 jing mâo lu klei đru mơ̆ng êngao msĕ si, đru mguôp êsei huă hŏng ênoh 0 prăk. Grăp čô ăt mâo klei thâo săng hĭn bruă gang mkhư̆ klei ruă tưp Covid-19, đru kơ bruă sang čư̆ êa iêo mthưr ai dưi kñăm đru kơ dŭm anôk bi ktlah ăt msĕ hŏng dŭm anôk gak răng ti anôk kwang dar.”

Phạm Minh Tấn, K’iăng khua bruă Đảng čar Dak Lak lač, bruă mặt trận dŭm gưl ti čar Dak Lak dưi bi lar jăk leh bruă bi mguôp dŭm gưl mnuih ƀuôn sang hlăm bruă gang mkhư̆ klei ruă tưp Covid-19 hlăm alŭ wăl. Hlăm mbah mđung mơ̆ng mặt trận, truh kơ ară anei, čar Dak Lak tŭ mă leh mơ̆ng dŭm anôk bruă, êpul êya, knơ̆ng bruă, phung mâo ai tiê kmah ênoh bi mguôp êbeh 34 êklai 500 êklăk prăk, 10.000 hnư mnơ̆ng bi hơĭt, 200.000 kdrăp ksiêm mkă kman hmar, mbĭt hŏng lu kdrăp mdrao mgŭn klei ruă tưp Covid-19 mkăn. Bruă mặt trận ăt mâo klei iêo mthưr leh anăn ba dŭm êtuh tôn mnơ̆ng ƀơ̆ng huă đru kơ mnuih ƀuôn sang dôk hlăm anôk kwang dar, đru kơ êpul nao hgŭm hlăm bruă gang mkhư̆ klei ruă tưp. Mặt trận čar kwar ngă jăk leh boh klei anei, hŏng klei iêo mthưr bi mguôp mnơ̆ng dhơ̆ng kơ mnuih ƀuôn sang dôk hlăm klei dleh dlan. Bruă Đảng čar, bruă sang čư êa dŭm gưl, dŭm gưl bruă Đảng leh anăn wăt kơ bruă kđi čar čih yap sơăi klei êdah gưl mơ̆ng mặt trận čar kwar hlăm hruê mmông êgao. Drei mâo klei đăo knang, tơdah bi lar klei bi mguôp prŏng djuê ana, srăng dưi msưh kdŭn klei ruă tưp Covid-19.

Bi lar klei bi mguôp djuê ana, bi kƀĭn jih jang mnuih ƀuôn sang, dŭm gưl bruă mặt trận ti čar Dak Lak ăt dôk gĭr jih ai mbĭt hŏng bruă sang čư êa kriê dlăng, đru kơ mnuih ƀuôn sang. Klei sa ai, klei bi mguôp leh anăn klei thâo săng mơ̆ng grăp čô mnuih ƀuôn sang srăng dưi mkŏ mjing ai ktang, hrăm mbĭt gang mkhư̆, msưh kdŭn klei ruă tưp, ba wĭt klei hdĭp msĕ si yăng đar.