VOV4.Êđê- Hlăm wưng anei, anôk ba čhĭ mnơ̆ng dhơ̆ng Têt Nguyên Đán Nhâm Dần 2022 ti čar Dak Lak mphŭn kdrăm kơah. Mnơ̆ng dhơ̆ng dưi ba čhĭ lu jơr kơ mta, hnơ̆ng jăk, mâo lu klei đru mdul čiăng hmao mkăp kơ phung blei yua.

Dôk hlăm brô sa mlan truh yơh đến Tết nguyên đán 2022, ƀiădah amai Huỳnh Thị Hương ti ƀuôn hgŭm Thành Nhất, ƀuôn prŏng Ƀuôn Ama Thuôt nao truh leh ti dŭm sang mnia mblei prŏng čiăng duah dlăng leh anăn ruah mă dŭm mta mnơ̆ng yua. Hluê si Amai Hương, blei ară anei srăng mâo ênoh djŏ, mnơ̆ng dhơ̆ng mâo hnơ̆ng tŭ jăk.

“Leh truh têt, grăp boh sang blei sơăi êa mih, bêñ ƀơ̆ng amâodah kpiê wĭt yua. Ƀuh mâo lu mta mdê mdê, dăp tring dlăng siam, ênoh ăt djŏ mơh.”

Lu mnuih ƀuôn sang ti ƀuôn prŏng Ƀuôn Ama Thuôt nao mprăp leh mnơ̆ng Tết

Leh klei ksiêm dlăng hlăm anôk mnia mblei leh anăn dŭm sang mnia čhĭ hliê ti alŭ wăl ƀuôn hgŭm Thành Nhất leh anăn Thành Công, ƀuôn prŏng Ƀuôn Ama Thuôt brei ƀuh, dŭm mta mnơ̆ng dhơ̆ng kreh yua hlăm wưng tết dôk mâo klei mđĭ ênoh. Ƀiădah klei čiăng blei ba yua mơ̆ng mnuih ƀuôn sang ăt ka đĭ ôh. Amai Nguyễn Thị Trúc Phương, pô kiă kriê sang mnia mblei Ngọc Khánh 2, ƀuôn hgŭm Thành Nhất, ƀuôn prŏng Ƀuôn Ama Thuôt brei thâo, kyua hmăi mơ̆ng klei ruă tưp Covid-19 thŭn anei amai amâo jhŏng blei mkăp lu mnơ̆ng dhơ̆ng ôh:

“Mnơ̆ng dhơ̆ng thŭn anei mĭn tĭng srăng ƀiă hĭn mkă hŏng grăp thŭn kyua boh sĭt dôk găn klei ruă tưp msĕ sơnei, knŏng mâo ƀiă mnơ̆ng dhơ̆ng. Ênoh ênil mnơ̆ng dhơ̆ng ăt đĭ hĭn mkă hŏng grăp thŭn, hluê si mta mnơ̆ng dhơ̆ng, mâo mta bi hơĭt ênoh, mâo mta mrâo.”

 Dŭm sang mnia pioh leh sơaĭ anôk hjăn čiăng rang mdah mnơ̆ng Tết

Mdê hŏng dŭm sang mnia mblei điêt leh anăn dŭm anôk mnia mblei đưm, hlăm dŭm sang mnia mblei prŏng msĕ si Go, Co.op Mart, VinMart, MM Mega Markit...,dŭm mta mnơ̆ng dhơ̆ng hlăm wưng tết msĕ si kpŭng, kpiê, êa mih mâo lu sơnăk. Dŭm sang mnia mblei prŏng anei dăp anôk jăk dlăng pioh dưm dŭm mta mnơ̆ng dhơ̆ng wưng tết. Ênoh mnơ̆ng dhơ̆ng ăt mâo klei bi hơĭt. Ayŏng Bùi Văn Quân, khua kiă kriê sang mnia mbei prŏng Go Ƀuôn Ama Thuôt brei thâo:

“Mnơ̆ng dhơ̆ng đĭ 14% mkă hŏng thŭn 2021, mĭn tĭng klei blei ba yua hlăm anôk mnia mblei anei knŏng đĭ mơ̆ng 5 truh kơ 10% đuč, bi kơ ară anei klei blei ba yua ka mâo klei đĭ ôh. Ênoh ênil ăt dôk krơ̆ng msĕ hŏng dŭm thŭn êlâo, tơdah anôk mnia mblei djŏ tuôm hŏng bruă dŭ mdiăng amâodah mkra mjing mơ̆ng dŭm anôk mkăp brei, mmông anăn srăng mâo klei mlih êdei, ƀiădah ară anei ăt dôk gĭr krơ̆ng ênoh msĕ hŏng êlâo dih.”

Kyua klei ruă tưp Covid-19 ăt dôk dleh dưi ksiêm dlăng, mbĭt hŏng bruă čŏng mkăp mnơ̆ng dhơ̆ng, dŭm anôk mnia mblei prŏng dôk mtrŭt mđĭ klei čhĭ mnia online, ba mnơ̆ng truh kơ sang đru kơ klei blei ba yua mơ̆ng mnuih ƀuôn sang. Nguyễn Ngọc Hiệp, khua kiă kriê MM Mega Markit Buôn Ma Thuột brei thâo:

“Ară anei hlăm sang mnia mblei hmei dôk mkŏ mjing lu mbah čhĭ mnơ̆ng dhơ̆ng, boh nĭk mđĭ kyar mbah čhĭ mnia online, ba mnơ̆ng dhơ̆ng truh kơ sang, mkă hŏng thŭn dih mbah anei đĭ 300% kơ ênoh phung blei ba yua leh anăn hnơ̆ng čhĭ mnơ̆ng dhơ̆ng.”

Čiăng bi hơĭt ênoh mnơ̆ng dhơ̆ng wưng knhal jih thŭn, mâo ênŭm klei čiăng blei ba yua mơ̆ng mnuih ƀuôn sang hlăm wưng Tết Nguyên đán Nhâm Dần 2022, ară anei mâo leh 10 knơ̆ng bruă prŏng ti čar Dak Lak ƀuăn mkăp pioh mnơ̆ng dhơ̆ng hŏng ênoh giăm 271 êklai prăk. Dŭm mta mnơ̆ng dhơ̆ng anăn mâo braih, kđeh čĭm ŭn, boh mnŭ, boh bĭp, êa prăi, mnơ̆ng bi mƀăt, djam mtam, êa săng, êa pui, kpŭng… Hruê mmông bi hơĭt ênoh mâo 2 mlan mơ̆ng hruê 15/12/2021-28/2/2022.

Pô mblang: Y-Ƀel Êban