VOV4.Êđê- Čiăng djăp hnơ̆ng blei ba yua mơ̆ng mnuih ƀuôn sang hlăm wưng knhal jih thŭn 2021 leh anăn wưng tết Nguyên đán Nhâm Dần 2022, ară anei mâo leh 10 knơ̆ng bruă prŏng toi alŭ wăl čar Dak Lak ƀuăn rơ̆ng mkăp pioh mnơ̆ng dhơ̆ng yua hŏng ênoh êbeh 270 êklai prăk. Dŭm mta mnơ̆ng anăn mâo: Braih mkuê̆, kđeh čĭm ŭn, mnŭ, boh mnŭ, êa prăi, kpŭng bi mbăt leh anăn dŭm mta djam mta, êtak êbai, êa săng, êa pui, bêñ kẹo. hruê mmông ngă klei bi hơĭt ênoh mâo 2 mlan mơ̆ng hruê 15/12/2021 – 28/2/2022.

Hlăm wưng klei ruă tưp Covid-19 ăt dôk dleh dưi ksiêm dlăng leh anăn sui, knơ̆ng bruă tuh tia čar Dak Lak mtă kơ dŭm knơ̆ng bruă, êpul bi mguôp, sang mnia mbei rơ̆ng mkăp pioh mnơ̆ng dhơ̆ng leh anăn wăt kơ bruă gang mkhư̆ klei ruă tưp Covid-19. Ară anei, mnơ̆ng dhơ̆ng ênŭm leh hnơ̆ng blei ba yua mơ̆ng mnuih ƀuôn sang leh anăn đăo knăl srăng djăp hlăm wưng Tết. knơ̆ng bruă tuh tia ăt hưn mdah leh hŏng bruă sang čư êa čar Dak Lak ksiêm dlăng, bi klă hdră êlan tui ngă hdră bi hơĭt ênoh dŭm mnơ̆ng dhơ̆ng hlăm wưng knhal jih thŭn 2021 leh anăn Tết Nguyên đán Nhâm Dần 2022.

Pô mblang: Y-Ƀel Êban