VOV4.Êđê -. Leh êbeh 2 mlan mtrŭt mjhar hdră “Êlan pui kmlă dăng kông leh anăn măi tĭnh kơ adei”, knơ̆ng bruă mtô mjuăt bi hriăm čar Dak Lak dưi bi mguôp leh 4 êklai 500 êklăk prăk hlăm bruă mkăp brei đĭng blŭ thâo mĭn kơ phung hđeh sang hră mâo klei hdĭp dleh dlan. Hluê si knơ̆ng bruă mtô mjuăt bi hriăm čar Dak Lak, ti anăp klei dleh dưi ksiêm dlăng mơ̆ng klei ruă tưp Covid-19, čar Dak Lak bi klă hdră hriăm online jing hdră mâo klei hơĭt hĭn.

Khădah sơnăn, ƀiădah čar Dak Lak mâo êbeh 268.000 čô hđeh sang hră amâo mâo klei găl dưi hriăm online. Hlăm anăn hđeh sang hră gưl 1 amâo mâo kdră hriăm online mâo êbeh 60%. Knơ̆ng bruă mtô mjuăt bi hriăm dôk mâo klei iêo mthưr phung mâo ai tiê kmah, phung ngă klei bi mguôp lŏ đru kơ dră anei, mbĭt anăn dưi mđĭ hnơ̆ng tŭ dưn mơ̆ng hdră, mđing truh bi leh bruă klam “Mdei nao sang hră ƀiădah amâo mdei hriăm hră”.

Y - Ƀel pô mblang