VOV4.Êđê- Hruê 5-1, Anôk dlăng bruă Đảng čar Dak Lak mkŏ mjing Klei bi kƀĭn online ksiêm dlăng dŭm hră mơar mơ̆ng gưl dlông leh anăn Bruă Đảng čar kơ knuă druh kmeh gơ̆ng ti čar. Hluê si Phạm Minh Tấn, K’iăng Khua bruă Đảng čar Dak Lak, ti anăp klei ruă Covid-19 dleh ktuê dlăng, bruă Đảng čar, Êpul gơ̆ng kơ mnuih ƀuôn sang, Knơ̆ng bruă sang čư̆ êa čar bi mklă dŭm klei dleh dlan, lông dlăng dưi kčah leh anăn hmaŏ mtrŭn, mkra, mbŏ, lu hră mơar čiăng gĭt gai hluê ngă bi jăk “hdră kñăm mdua” gang mkhư̆ klei ruă Covid-19 êjai, mđĭ kyar bruă duh mkra ala ƀuôn êjai. Mjưh ruê̆ thŭn 2021, đĭ kyar bruă duh mkra 5.1%, GDP kah knar grăp čô mnuih đaŏ tĭng mâo giăm 50 êklăk prăk/čô. Hnơ̆ng prăk ba čhĭ kơ ala tač êngao mâo êbeh 1.100 êklăk USD.

Hlăm klei bi kƀĭn anei, knuă druh kmeh gơ̆ng čar Dak Lak srăng dưi hriăm, hâo hưn, mtô mblang, ksiêm dlăng 12 hră mơar mơ̆ng Gưl dlông leh anăn mơ̆ng čar djŏ tuôm kơ dŭm boh phŭn: mđĭ ktang klei gĭt gai gang mkhư̆ klei ruă Covid-19 hlăm boh klei mrâo; hdră msir mgaih klei kčŭt hưn ƀuah mkra hlăm Đảng; klah čŭn mơ̆ng Phŭn bruă kđi čar kơ klei mtrŭt mjhar răng mgang knuă druh pral kdal, mbruă kyua klei tŭ dưn mbĭt; asăp mtrŭn mơ̆ng Anôk dlăng bruă Đảng čar kơ klei mđĭ hnơ̆ng thâo mbruă Đảng viên hlăm wưng ară anei leh anăn dŭm thŭn kơ anăp…

Pô mblang: H’Zawut Ƀuôn Yă