VOV4.Êđê - Dak Lak srăng gĭr ktưn iêo mthưr dŭm ai dưi čiăng đru kơ mnuih ƀun ƀin mâo sa yan tết kluôm ênŭm, anei jing sa hlăm dŭm mta phung dưi mtrŭt mjhar mơ̆ng bruă mặt trận čar Dak Lak hlăm klei kƀĭn bi mklin bruă ngă thŭn 2021, ba mdah hdră êlan ngă bruă thŭn 2022 hlăk hruê mbruê 28/12. Hluê si klei hưn mdah hlăm klei kƀĭn trông, dhar bruă mặt trận dŭm gưl čar Dak Lak dưi mtrŭt mđĭ leh bruă hâo hưn, mtrŭt mjhar mnuih ƀuôn sang ngă jăk dŭm hdră êlan gang mkhư̆ klei ruă tưp Covid-19.

Iêo mthưr leh anăn tŭ mă enoh prăk êbeh 35,3 êklai prăk, kdrăp yua bruă mdrao mgŭn leh anăn mnơ̆ng yua hlăm bruă gang mkhư̆ klei ruă tưp Covid-19 hlăm čar. Aduôn H’Kim Hoa Byă, khua êpul đru čung ba mnuih ƀuôn sang Đảng čar, khua kiă kriê dhar bruă mặt trận čar Dak Lak brei thâo, hŏng dŭm klei dleh dlan leh anăn klei hmăi amâo jăk mơ̆ng klei ruă tưp Covid-19, hruê mmông kơ anăp, bruă mặt trận leh anăn iêo mthưr dŭm ai dưi čiăng đru mdul ƀiă klei dleh dlan kơ mnuih ƀun ƀin leh anăn phung awăt êdu. Ti anăp jing gĭr ktưn kriê dlăng mnuih ƀuôn sang, boh nik jing mnuih ƀun ƀin mâo sa yan tết kluôm ênŭm.

Y-Ƀel pô mblang