VOV4.Êđê- Kñăm mtrŭt mđĭ dŭm hdră ba anăp kyua yang ƀuôn mđing truh kơ phung hđeh lehanăn mnuih ƀuôn sang mâo klei hdĭp dleh dlan hlăm čar, phung êdam êra čar Dak Lak pŏk leh Hdră ba anăp Yan Puih hŏng lu bruă ngă klă sĭt. Hluê anăn, dŭm gưl dhar bruă hlăm čar pŏk ngă leh bruă mtrŭt mđĭ hdră hâo hưn gang mkhư̆ klei ruă Covid 19 kơ mnuih ƀuôn sang; mtrŭt mjhar djăp ai dưi, klei mâo čiăng mđup brei dŭm êtuh hnư mnơ̆ng lehanăn ao mđao, abăn msam kơ phung hđeh ƀun, mđup brei hnư prăk đru mphŭn čô̆ kơ bruă kơ phung êdam êra, đru kơ phung êdam êra tuôm ngă soh lŏ wĭt hdĭp ñu kma hŏng yang ƀuôn.

Bruă Êdam êra čar Dak Lak ruah leh să Êa Riêng, kdriêk Mdrak čiăng mkŏ mjing hdră anei gưl čar lehanăn mđup brei 50 hnư mnơ̆ng kơ gŏ sang mâo klei hdĭp dleh dlan, 10 boh êdeh wai jơ̆ng mbĭt hŏng ao mđao, abăn msăm kơ phung hđeh. Hlăm hdră anei, bruă Êdam êra čar Dak Lak rŭ mdơ̆ng leh 2 boh sang khăp čiăng kơ gŏ sang đoàn viên êdam êra dôk dleh dlan kơ sang dôk ti kdriêk Krông Pač lehanăn Êa Kar. Ênoh prăk hluê ngă hdră anei gưl čar êbeh 200 êklăk prăk./.

Pô mblang: H’Nêč Êñuôl