VOV4.Êđê- Knơ̆ng bruă lŏ hma leh anăn mđĭ kyar krĭng ƀuôn sang čar Dak Lak mkŏ mjing leh Klei bi kƀĭn ksiêm wĭt thŭn 2021, pŏk ngă bruă klam thŭn 2022. Hluê si klei hâo hưn hlăm klei bi kƀĭn, thŭn 2021, wăt tơdah tuôm hŏng lu klei dleh dlan kyua Covid-19, boh klei ruă tưp hlăm mnơ̆ng rông ăt mâo, ênoh ênil, klei ba yua dŭm mnơ̆ng dhơ̆ng lŏ hma ka hơĭt kjăp ƀiădah dŭm hnơ̆ng kčah mơ̆ng bruă lŏ hma, dliê kmrơ̆ng, kan hdang mâo giăm 4% mkă hŏng thŭn 2020; pla dliê mâo êbeh 146% hdră kčah; klei mnơ̆ng ngă kơ ana pla mjing, klei ruă kơ mnơ̆ng rông dưi ktuê dlăng, ênoh să djăp hnơ̆ng čuăn krĭng ƀuôn sang mrâo êbeh 46%.

Dŭm klei tŭ anei đru mguôp yuôm bhăn hlăm klei đĭ kyar bruă duh mkra- ala ƀuôn mbĭt ti čar. Hluê si Knơ̆ng bruă lŏ hma leh anăn mđĭ kyar krĭng ƀuôn sang čar, thŭn 2022 Dak Lak lŏ dơ̆ng gĭr mđĭ ktang mkra mđĭ bruă lŏ hma, kčah leh anăn hluê ngă hdră kñăm đĭ kyar 4,56%.

Pô mblang: H’Zawut Ƀuôn Yă