VOV4.Êđê- Hluê ngă Asăp mtrŭn mnơ̆ng bruă Đảng čar Dak Lak, mơ̆ng thŭn 2004 truh ară anei 1.194 anôk bruă, êpul bruă ti Dak Lak mjĕ mjing hŏng 758 ƀuôn mnuih djuê ƀiă. Leh giăm 17 thŭn siă suôr, hŏng dŭm hdră đru klă sĭt, ƀô̆ mta dŭm boh ƀuôn ƀrư̆ hruê ƀrư̆ jăk siam, klei hdĭp mnuih ƀuôn sang dưi mđĭ, ênoh gŏ êsei ƀun hrŏ.

Hmei mbĭt hŏng phung knuă druh, phung mă bruă ti knơ̆ng bruă pui kmlă Dak Lak nao čuă ƀuôn mjĕ mjing ƀuôn M’Briu ti să Čư̆ Nĕ, kdriêk Ea Kar. Gưl anei, phung mă bruă mơ̆ng knơ̆ng bruă pui kmlă Dak Lak mđup brei čhiăm guôm ƀô̆, êa drao mdjiê kman, mnơ̆ng ƀơ̆ng huă leh anăn hâo hưn dŭm hdră êlan gang mkhư̆ klei ruă tưp Covid-19 kơ mnuih ƀuôn sang. Mbĭt hŏng anăn, pô bi ala êpul khua kiă kriê knơ̆ng bruă lŏ mđup brei 2 drei êmô mjeh mâo ênoh 40 êklăk prăk kơ 2 gŏ sang ƀun ƀin hlăm ƀuôn.

Y Suk Niê, khua bruă Đảng nah gŭ ti ƀuôn M’Briu, să Čư̆ Nĕ brei thâo, dŭm thŭn êlâo dih, klei hdĭp mnuih ƀuôn sang hlăm ƀuôn mâo lu klei dleh dlan, hnơ̆ng gŏ sang ƀun ƀin jing lu êdi, kyua mâo klei uêñ mĭn mơ̆ng Đảng leh anăn knŭk kna, klei đru mơ̆ng anôk bruă mjĕ mjing, ară anei hnơ̆ng gŏ sang ƀun ƀĭn hrŏ leh ti gŭ 5%. Hlăm wưng klei ruă tưp Covid-19 ti knhal jih mlan 9/2021, hlăm ƀuôn drông wĭt 146 čô mnuih mă bruă kbưi mơ̆ng dŭm čar krĭng dhŭng, dŭm gưl bruă sang čư êa alŭ wăl leh anăn knơ̆ng bruă pui kmlă Dak Lak hriê đru leh kơ hmei.

“Knơ̆ng bruă pui kmlă Dak Lak mjĕ mjing hŏng ƀuôn M’Briu mơ̆ng thŭn 2004 leh anăn mâo lu hdră êlan đru kơ ƀuôn anei. Knơ̆ng bruă mâo nanao klei êmuh čuă, mđup brei mnơ̆ng dhơ̆ng hlăm dŭm wưng krah yan hla luh, dŭm hruê knăm lehanăn wưng Tết. đru kơ mnuih ƀuôn sang mơ̆ng êsei huă djam ƀơ̆ng wăt kơ sang adôk amâodah asăr mjeh leh anăn êmô mjeh kơ dŭm gŏ sang ƀun ƀin. Ƀrư̆ ƀrư̆ hnơ̆ng gŏ sang ƀun ƀin hlăm ƀuôn mâo klei hrŏ. Gưl anei diñu mđup brei čhiăm guôm ƀô̆, êa drao mdjiê kman, hâo hưn kơ mnuih ƀuôn sang dŭm hdră êlan gang mkhư̆ klei ruă tưp, ngă djŏ 5 klei mtă mơ̆ng phŭn bruă mdrao mgŭn, truă čhiăm guôm ƀô̆, amâo bi dôk lu mnuih. Mnuih ƀuôn sang ngă jăk dŭm bruă anăn, truh kơ ară anei hlăm ƀuôn ka mâo ôh mnuih ruă.”

Êpul mă bruă hlăm Knơ̆ng bruă pui kmlă Dak Lak mđup brei mnơ̆ng đru kơ mnuih ƀuôn sang gang mkhư̆ klei ruă tưp

Ƀuôn M’Briu ti să Čư̆ Nĕ, kdriêk Ea Kar ară anei mâo 268 gŏ sang hŏng êbeh 1300 čô. Êbeh 95% jing mnuih Êđê. Trần Văn Thuận – khua kiă kriê knơ̆ng bruă pui kmlă Dak Lak brei thâo, tui si asăp mtrŭn mơ̆ng bruă Đảng čar Dak Lak, thŭn 2004 knơ̆ng bruă nao mjĕ mjing hŏng ƀuôn M’Briu. Čiăng đru kơ ƀuôn mjĕ mjing, grăp thŭn hlăm grăp wưng knăm, Tết, knơ̆ng bruă ngă nao klei êmuh čuă, mđĭ ai, mđup brei mnơ̆ng dhơ̆ng kơ dŭm gŏ sang ƀun ƀin, gŏ sang knŭk kna dlăng ba, mkŏ mjĭng dŭm hdră êlan klă klơ̆ng đru kơ mnuih ƀuôn sang mđĭ kyar klei hdĭp mda, lăm lui, bi hrŏ klei ư̆ êpa.

“Hluê si hdră mjĕ mjing, grăp thŭn anôk bruă mâo leh dŭm hdră êlan ngă bruă bi hơĭt klei hdĭp yang ƀuôn leh anăn mđing kơ dŭm gŏ sang knŭk kna dlăng ba, gŏ sang knap mñai čiăng mđĭ kyar klei hdĭp mda. Bi hŏng ƀuôn M’Briu, hmei thâo klă leh dŭm klei dôk dleh dlan hlăm ƀuôn ară anei leh anăn mâo dŭm hdră êlan đru klă klơ̆ng hŏng mnuih ƀuôn sang leh anăn mkŏ mjing ƀuôn sang dhar kreh.”

Bi ala Knơ̆ng bruă pui kmlă Dak Lak mđup brei êmô kơ gŏ êsei ƀun ti ƀuôn M’Briu

Ƀuôn B’hôk, să Yang Tao, Kdiêk Lak, mâo klei mjĕ mjing hŏng Sang mđung asăp blŭ Việt Nam krĭng Lăn Dăp Kngư (VOV krĭng Lăn Dăp Kngư) mơ̆ng thŭn 2004. Ƀuôn anei ară anei mâo giăm 270 gŏ sang hŏng êbeh 1000 čô, lu hlăm anăn jing mnuih Mnông. Hluê si Y-Mor Kuăn – khua ƀuôn B’hôk, mơ̆ng hruê mjĕ mjing hŏng Sang mđung asăp blŭ Việt Nam krĭng Lăn Dăp Kngư, mâo nanao klei hrăm mbĭt, đru kơ mnuih ƀuôn sang hlăm ƀuôn. Mbĭt hŏng klei nao čuă êmuh, mđup brei mnơ̆ng dhơ̆ng hlăm grăp wưng hruê knăm, Tết, VOV – krĭng Lăn Dăp Kngư mâo klei iêo mthưr dŭm knơ̆ng bruă rŭ mdơ̆ng 5 boh sang klei khăp hŏng ênoh 400 êklăk prăk kơ dŭm gŏ sang ƀun ƀin, gŏ sang knŭk kna dlăng ba. Leh klei ruă tưp Covid-19 bluh đĭ hlăm knhal jih mlan 9/2021, hlăm ƀuôn drông giăm 200 čô mnuih mă bruă mrâo wĭt kơ ƀuôn sang pô, pô bi ala mơ̆ng VOV – krĭng Lăn Dăp Kngư mâo leh klei nao đru kơ mnuih ƀuôn sang.

Ƀuôn B’hôk ngă klei kwang dar 14 hruê, amâo thâo bĭt êlan nao mă bruă, kbah lu mta mnơ̆ng. Anôk bruă mjuăt mjing VOV- krĭng Lăn Dăp Kngư hriê ti ƀuôn, mđup brei kơ grăp gŏ sang 10 kg briah, 1 giêt êa prăi, sa hruh bột ngọt, êa msĭn, kan krô, mbĭt hŏng čhiăm guôm bô̆, êa drao mdjiê kman…mnuih ƀuôn sang ti nei mơak sơnăk. Lŏ mâo thiăm mnơ̆ng ƀơ̆ng huă čiăng dôk ti sang ngă klei bi ktlah, gang mkhư̆ klei ruă tưp, đru kơ mnuih ƀuôn sang mâo klei hơĭt bi leh hruê mmông bi ktlah.”

Bi ala kơ êpul mă bruă VOV- Lăn Dap Kngư mđup brei mnơ̆ng kơ mnuih ƀuôn sang ƀuôn Bhôk kwang dar

Vũ Nam Trang, pô čih klei mrâo ti sang mđung asăp blŭ Việt Nam krĭng Lăn Dăp Kngư brei thâo, hlăm gưl klei ruă tưp thŭn 2021, mbĭt hŏng klei đru mguôp mơ̆ng phung knuă druh công đoàn, leh anăn phung mâo ai tiê kmah bi mguôp hŏng knơ̆ng bruă mdrao mgŭn Dak Lak êbeh 200 êklăk đru blei mnơ̆ng dhơ̆ng, kdrăp yua bruă mdrao mgŭn, êa drao gŭn mkăp kơ bruă gang mkhư̆ klei ruă tưp. Mđup brei 5 tôn mnơ̆ng ƀơ̆ng huă kơ mnuih ƀuôn sang ti ƀuôn mjĕ mjing hlăm hruê mmông ngă klei kwang dar.

“Hŏng bruă klam jing pô ngă bruă klei mrâo, hmei dưi bi lar bruă iêo mthưr kơ phung mâo ai tiê kmah, phung mâo klei khăp, bi mguôp wăt ai tiê pô čiăng đru kơ mnuih ƀuôn sang krĭng taih kbưi ngă klei kwang dar kyua klei ruă tưp Covid-19. Ăt mâo mơh klei myun kyua phung mâo ai tiê kmah hrăm mbĭt nanao hŏng phung ngă bruă klei mrâo, nao truh hlăm dŭm anôk kwang dar, anôk taih kbưi, đru kơ mnuih ƀuôn sang mâo klei hmăi kyua klei ruă tưp Covid-19.

Bi ala khua gĭt gai VOV-Lăn Dap Kngư mđup brei mnơ̆ng kơ mnuih ƀuôn sang bi mjing ƀuôn Bhôk

Giăm 17 thŭn êgao, hŏng klei đru mguôp mơ̆ng knơ̆ng bruă pui kmlă dak Lak leh anăn VOV - krĭng Lăn Dăp Kngư, 2 ƀuôn mjĕ mjing ƀuôn M’Briu leh anăn ƀuôn B’hôk mâo dŭm klei mlih klă klơ̆ng, klei hdĭp mda mnuih ƀuôn sang mâo klei mđĭ, boh nik hlăm wưng klei ruă tưp Covid-19.

Pô mblang: Y-Ƀel Êban