VOV4.Êđê - Aguah 26/11, Knơ̆ng bruă pui kmlă Dak lak bi hgŭm hŏng Knơ̆ng bruă sang čư̆ êa kdriêk Ea Kar mkŏ mjing mđup brei êmô đru kơ gŏ êsei ƀun ti ƀuôn M’Briu, să Čư̆ Huê rông mnơ̆ng mđĭ kyar bruă duh mkra hgao klei dleh dlan kyua klei ruă tưp.

 Ƀuôn M’Briu, să Čư̆ Huê, kdriêk Ea Kar, čar Dak Lak mâo 268 gŏ êsei, hŏng êbeh 1.300 čô mnuih, lu jing mnuih Êđê. Hlăm dŭm thŭn êgao, kyua mâo Đảng, Knŭk kna mđing dlăng duh bi liê, klei đru mơ̆ng anôk bruă bi hgŭm anăn klei hdĭp mnuih ƀuôn sang dưi bi mđĭ, ênoh gŏ êsei ƀun adôk ti gŭ 5%. Gưl mđup brei êmô anei, dua gŏ êsei ti ƀuôn M’Briu tŭ mă dua drei êmô ana hŏng ênoh giăm 20 êklăk prăk.  Y Don Mlô ti ƀuôn Mbriu mgei ai tiê brei thâo “Gŏ sang kâo jing gŏ êsei ƀun ti ƀuôn M’briu, klei ruă tưp dleh ktuê dlăng amâo dưi nao mă bruă ôh, klei hdĭp dleh dlan. Dưi mđup breo êmô gŏ sang kâo mơak snăk. Dŭm hruê êlâo phung hlăm anôk bruă pui kmlă Ea Kar nao hưn hŏng gŏ sang dưi mâo êmô anăn nao ngă war êning leh anăn akâo asăr rơ̆k mjeh ba pla. Hruê anei mă êmô kâo ƀuăn rơ̆ng gĭr kriê dlăng čiăng êmô mđai, adei anăo lŏ mâo thiăm prăk čhĭ êmô.”

Mbĭt anăn, Knơ̆ng bruă pui kmlă Dak lak lŏ dơ̆ng mkŏ mjing êmuh hrăm, mđĭ ai leh anăn mđup brei mnơ̆ng kơ dŭm gŏ êsei knŭk kna dlăng ba, mđup brei  kdrăp mdrao mgŭn, êa rao kngan leh anăn hâo hưn mtô mblang kơ mnuih ƀuôn sang ƀuôn M’Briu, să Čư̆ Huê, mđĭ klei thâo săng gang mkhư̆ klei ruă tưp Covid-19.

Y - Ƀel pô mblang