VOV4.Êđê- Hruê mbruê 30/12, čar Dak Lak mkŏ mjing leh klei kƀĭn trông bi mklin 20 thŭn mkŏ mjing hdră mtrŭn mrô 13/2002 mơ̆ng êpul khua bruă Đảng gưl dlông gưl 9 kơ bruă lŏ mlih mrâo, đĭ kyar leh anăn mđĭ boh tŭ dưn bruă duh mkra êpul, 10 thŭn tui ngă klei bhiăn êpul bi mguôp. Hưn mdah hlăm klei kƀĭn trông anăn, găn 20 thŭn tui ngă hdră mtrŭn, hlăm čar ară anei mâo 608 êpul bi mguôp, hlăm anăn mâo 390 êpul bi mguôp bruă lŏ hma, 218 êpul bi mguôp kơ bruă mkăn. Bruă duh mkra êpul dưi brei bruă mă kơ 21 êbâo čô mnuih mă bruă, prăk ba wĭt đĭ 10 blư̆ hlăm wưng anei.

Blŭ hlăm klei kƀĭn, Nguyễn Đình Trung, khua bruă Đảng gưl dlông, khua bruă Đảng čar Dak Lak mtă kơ dŭm gưl bruă, alŭ wăl hlăm čar lŏ dơ̆ng mtrŭt mđĭ bruă hâo hưn, mtrŭt mjhar kñăm mđĭ klei thâo săng kơ bruă duh mkra êpul, êpul bi mguôp, hmar ruh mgaih dŭm klei dleh dlan, klei kpăk gun, mkŏ mjing klei găl kơ êpul bi mguôp dưi đĭ kyar. Mkŏ mjing dŭm klei bi hmô hlăm wưng bruă tuh tia 4.0.

Pô mblang: Y-Ƀel Êban