VOV4.Êđê- Hruê mbruê 10/12, dŭm alŭ wăl ti čar Dak Lak kčưm ngă leh bruă tlŏ mgang vaccine gang mkhư̆ klei ruă tưp Covid-19 kơ phung hđeh sang hră gưl 2 mơ̆ng 12 truh kơ 15 thŭn. Kluôm ênoh hđeh mâo klei tlŏ mgang gưl anei hlăm brô 120 êbâo čô hđeh, bruă tlŏ mgang vaccine mkŏ mjing hluê si ênoh thŭn mơ̆ng dlông truh kơ gŭ. Hluê anăn, hlăm hruê kăm anei, srăng tlŏ mgang tal êlâo kơ phung hđeh sang hră adŭ 8 leh anăn adŭ 9, hruê kăm êdei srăng tlŏ kơ phung hđeh adŭ 6, adŭ 7 leh anăn phung hđeh adŭ 6 ênŭm 12 thŭn.

Čiăng rơ̆ng kơ bruă gang mkhư̆ klei ruă tưp Covid-19, ngă djŏ 5 mta klei mtă, knơ̆ng bruă mdrao mgŭn čar Dak Lak mâo leh klei mă bruă hŏng dŭm sang hră, ngă bruă hâo hưn kơ jih jang phung amĭ ama mprăp nao tăt anak tlŏ mgang djŏ hruê mmông, amâo bi dôk lu mnuih. Mbĭt anăn dăp mnuih mă bruă ksiêm dlăng klei êa drao ngă leh klei tlŏ mgang leh anăn êdeh dŏng mdrao čiăng mâo mgaih msir dŭm klei êa drao ngă leh tlŏ vaccine.

Pô mblang: Y-Ƀel Êban