VOV4.Êđê- Klei ruă tưp Covid-19 ăt dôk dleh dưi ksiêm dlăng ti alŭ wăl čar Dak Lak, ti anăp klei anei, lu phung hđeh sang hră gưl prŏng bruă mdrao mgŭn bi klă čŏng nao đru bi mdrơ̆ng hŏng klei ruă tưp, hrăm mbĭt hŏng phung ngă bruă mdrao mgŭn ba anăp bruă gang mkhư̆ klei ruă tưp.

 Giăm 2 mlan êgao, sinh viên Trần Ngọc Hải leh anăn êpul sinh viên čŏng ngă bruă mơ̆ng Sang êa drao hlăm sang hră gưl prŏng Lăn Dap Kngư đru kơ bruă gang mkhư̆ klei ruă tưp ti Anôk bruă mdrao mgŭn ti ƀuôn prŏng Ƀuôn Ama Thuôt, čar Dak Lak. Grăp hruê mă bruă mơ̆ng êpul mphŭn mơ̆ng 7h30 mnĭt aguah leh anăn truh 23 mmông mlam, boh nik mâo dŭm hruê truh 4 mmông aguah hruê êdei kơh mjưh ruê̆. Bruă diñu ngă jing mbha mta, mă mta ksiêm mkă leh anăn čih klei hâo hưn. Trần Ngọc Hải brei thâo, thâo klei hâo hưn mơ̆ng Knơ̆ng bruă mdrao mgŭn iêô jak phung sinh viên đru gang mkhư̆ klei ruă Covid-19, ñu čih anăn nao đru leh anăn 2 blư̆ nao ti anôk mâo lu klei ruă tưp.

          Kâo čih anăn đru hgŭm gang mkhư̆ klei ruă tưp mâo 2 gưl, gưl tal êlao jing kâo nao ti Bình Dương, leh anăn kâo wĭt, čih anăn nao ti ƀuôn prŏng Ƀuôn Ama Thuôt. Kâo ƀuh jing sa čô hriăm ngă aê mdrao snăn brei pô čih anăn đru gang mkhư̆ klei ruă tưp čiăng ala čar pral jih klei ruă tưp hĭn, leh anăn pô duh myơr hlăk ai mda asei pô kơ lăn čar hŏng jih ai tiê.

 Mbĭt hŏng dŭm êpul mkăn, phung hđeh hriăm aê mdrao ti Dak Lak dôk gĭr jih hruê mlan đru gang mkhư̆ klei ruă tưp

Ăt msĕ si Trần Ngọc Hải, mơ̆ng mlan 6 truh ară anei mâo leh dŭm êtuh čô phung hriăm aê mdrao ti Dak Lak nao čih anăn đru hgŭm hlăm anôk phŭn gang mkhư̆ klei ruă tưp. Mbĭt hŏng klei đru kơ čar Bình dương, phung čŏng ngă bruă lŏ dưi mbha ai đru ti Anôk bruă mdrao mgŭn ƀuôn prŏng Ƀuôn Ama Thuôt, Anôk bruă ktuê dlăng klei ruă tưp čar, hyuă kjăp đru kơ bruă ksiêm dlăng klei ruă tưp, čih anăn, ksiêm mkă Covid-19, đru ksiêm mkă pral kơ mnuih ƀuôn sang hlăm dŭm krĭng kwang dar… Hgao dŭm klei suăi êmăn mơ̆ng bruă knuă leh anăn klei huĭ hyưt tưp klei ruă, phung aê mdrao ƀuh mơak leh anăn ktưn hưn kyua asei mlei pô đru mguôp sa kdrêč ai tiê hlăm bruă gang mkhư̆ klei ruă Covid-19. Anei ăt jing klei găl čiăng kơ grăp čô hđeh hriăm bruă ba yua klei thâo hriăm leh hlăm boh sĭt ăt msĕ mơh mƀĭn lu klei thâo hlăm boh sĭt kơ bruă anei. Pô hriăm bruă Nguyễn Thị Thanh Nga, Hriăm aê mdrao, Sang hră gưl prŏng Lăn Dap Kngư, brei thâo:

Mơ̆ng leh Knơ̆ng bruă mdrao mgŭn iêô mthưr phung đru gang mkhư̆ klei ruă tưp snăn kâo čih anăn čiăng đru kơ phung ayŏng adei bruă mdrao mgŭn, yap truh ară anei ăt mâo leh 4 mlan. Kâo ăt čiăng dưi đru sa kdrêč ai pô čiăng đru kơ ƀuôn prŏng msưh kdŭn klei ruă tưp anăn kâo čang hmăng Dak Lak ăt msĕ si ƀuôn prŏng Ƀuôn Ama Thuôt hnưm msưh kdŭn klei ruă tưp.

Phung hđeh hriăm aê mdrao ndưi ba nao đru kơ Anôk bruă mdrao mgŭn ƀuôn prŏng Ƀuôn Ama Thuôt

Hŏng ai tiê hur har phung hlăk ai, phung hđeh čŏng ngă bruă jih ai tiê leh anăn đua klam. Klei diñu hur har mâo mnuih ƀuôn sang čih yap leh anăn bi mni. Nguyễn Thị Thanh Hương - Khua ƀuôn Alê A, ƀuôn hgŭm Ea Tam, ƀuôn prŏng ƀuôn Ama Thuôt brei thâo:

Hlăm wưng êgao snăn ƀuôn hmei mâo phung hđeh hriăm bruă ti Sang hră gưl prŏng Lăn Dap Kngư wĭt bi đru jăk snăk, hur har leh anăn ngă jih bruă klam.  Klei bi mguôp plah wah ƀuôn leh anăn phung hđeh jăk snăk. Êlâo kơ diñu hriê tinei snăn kâo ăt bi blŭ hrăm čiăng grăp čô mnuih thâo ti anôk test. Phung hđeh čŏng hriê leh anăn jăk snăk, jih ai tiê hŏng mnuih ƀuôn sang.

 Khădah tlă anăp hŏng klei huĭ hyưt ƀiădah phung hriăm aê mdrao ti Dak Lak ăt hruê mlan gĭr jih ai tiê hŏng êpul aê mdrao ngă bruă ti anôk phŭn mdrơ̆ng hŏng klei ruă tưp. Diñu ăt knŏng čang hmăng hŏng klei đru mguôp pô srăng đru hnưm msưh kdŭn klei ruă tưp čiăng kơ pô hŏng phung aê mdrao dôk ngă bruă hnưm dưi wĭt kơ gŏ sang; dŭm krĭng mtah, krĭng êđăp ênang srăng ƀrư̆ dưi pŏk mlar leh anăn klei hdĭp srăng hnưm lŏ wĭt msĕ aguah tlam. Leh klei ruă tưp dleh ktuê dlăng, snăn hŏng ai tiê leh anăn bruă klam, phung hriăm aê mdrao ăt srăng lŏ dơ̆ng ba anăp čiăng đru kơ anôk phŭn. Nguyễn Đức Duy, hriăm aê mdrao, sang hră gưl prŏng Lăn Dap Kngư bi mklă klei gĭr:

Hlăm wưng kơ anăp klei ruă tưp adôk lŏ dơ̆ng dleh ktuê dlăng snăn kâo ăt srăng đru. Sĭt đru snăn kâo čang hmăng pô srăng đru mguôp ai tiê pô čiăng boh klei ruă tưp pral jih čiăng drei dưi lŏ wĭt klei hdĭp msĕ yang đar.

Êpul hriăm bruă ti Sang hră gưl prŏng Lăn Dap Kngư nao đru ti čar Bình Dương đru gang mkhư̆ klei ruă tưp

 Mơ̆ng gưl klei ruă Covid-19 tal 4 bluh mâo truh ară anei, čar Dak Lak iêô jak leh 800 čô hđeh hriăm bruă, knuă druh leh anăn mnuih mă bruă mơ̆ng dŭm sang hră gưl prŏng hlăm čar čiăng đru kơ dŭm êpul hlăm anôk phŭn gang mkhư̆ klei ruă tưp. Hŏng ai ktang, ai tiê ba anăp, hgao klei dleh dlan, suăi êmăn leh anăn huĭ hyưt, phung hriăm aê mdrao ba yua klei thâo mdrao mgŭn ngă bruă klam, đru msưh kdŭn klei ruă Covid-19 čiăng hnưm ba klei hdĭp lŏ wĭt msĕ aguah tlam.

Pô mblang: H’Zawut Ƀuôn Yă