VOV4.Êđê -  Tlam hruê 27-12, Knơ̆ng bruă Dhar kreh - mjuăt ktang asei mlei leh anăn hiu čhưn ênguê čar Dak Lak mkŏ mjing klei bi kƀĭn hŏng dŭm anôk bruă hiu čhưn ênguê čiăng bi trông kơ dŭm hdră iêô jak phung tuê hiu čhưn, kơrŭ wĭt bruă hiu čhưn ênguê leh dŭm klei hmaĭ kjham mơ̆ng klei ruă Covid-19. Hluê si klei hâo hlăm klei bi kƀĭn, thŭn 2021, Bruă hiu čhưn ênguê Dak Lak hmaĭ kjham kyua Covid-19.

Hnơ̆ng tuê hriê ti čar knŏng hlăm brô 414 êbâo gưl, ênoh hrui mă mơ̆ng bruă hiu čhưn ênguê đaŏ tĭng 355 êklai prăk, bi hrŏ mkrah wah mkă hŏng thŭn 2020. Čiăng kơrŭ wĭt bruă hiu čhưn ênguê, Knơ̆ng bruă sang čư̆ êa čar Dak Lak mtrŭn leh hdră kčah, hdră msir rơ̆ng êđăp ênang kơ hdră gang mkhư̆ klei ruă Covid-19, gĭr đru ruh mgaih klei dleh dlan čiăng kơ anôk bruă hiu chưn ênguê hnưm hơĭt kjăp, grăp knhuang kơrŭ wĭt. Čar srăng mđĭ ktang bruă hưn mdah hiu čhưn ênguê hŏng dŭm čar msĕ si Khánh Hoá, Đà Nẵng hŏng dŭm hdră mđĭ hiu čhưn ênguê. Mđĭ jih hnơ̆ng mnơ̆ng dhơ̆ng hŏng ênoh yuôm leh anăn hdră bruă bi djŏ guôp.

H’Zawut pô mblang